زيارة لمحمية الملك سلمان في حائل 🏞️

المحميات بالنسبة لي أماكن غامضة، أحسها وجهات برية بس، أو فيها حيوانات نادرة ممنوع نشوفها! 🦌
لكن تفاجأت من كمية المحميات ومساحاتها بالسعودية؛ أهمها محمية الملك سلمان اللي بنكتشف جزء بسيط منها في هالعدد برحلة أخذتنا مرة ثانية لحائل ولكن من جانب مختلف لها. 🏞️

وأنت تقرأ العدد اطرب على طلال يتغنّى بجمال حائل 🎶

كنا مخططين على عدد محميات متخصص، نكتشف فيه كذا محمية، وفعلًا انطلقنا إلى عدة محميات ولكن كلها ما ضبطت معنا لأن معاييرنا للمحمية اللي نبيها تكون:

• فيها مناظر طبيعية متنوعة وثرية مختلفة عن المعتاد. 🏞️

• نظيفة وكبيرة وفيها مجال للاكتشاف المدهش. 🫡

• نقدر نلقى فيها أماكن فاضية وبعيدة عن الزحمة. 🫶🏼

أول فكرة خاطئة لاحظتها وأنا أسولف مع اللي حولي، أنهم يظنون المحميات أماكن مسوّرة أو أنها بحجم الرياض بس، بينما هي عبارة عن مساحات شاسعة متنوعة التضاريس، وقد تضم قرى ومحافظات بداخلها، ولكل منها حدود تعرفها من خلال اللوحات الموضوعة أو من خلال النظر في خرائط المحميات. 🗺️

المهم، كنت أهوجس وش المحمية اللي ودي أستكشفها وأنقل تجربتها. وبعد بحث وتجارب عزمت إني أتوجه لمحمية الملك سلمان الملكية، وبالتحديد الجزء الجنوبي الملاصق لمدينة حائل، لأني حاط عيني على منطقة بعينها ومتحمس لها، فقلت أستكشفها وأنا مرتاح، وبنفس الوقت ممكن أرجع للمدينة لو احتجت لأنها تبعد عن وسط حائل حوالي 60 كيلو ومدة الوصول لها يحتاج ساعة تقريبًا. 🛣️

محمية الملك سلمان الملكية تعتبر أكبر المحميات الملكية بالسعودية، ورابع أكبر محمية برية في العالم. ومن اتساعها، فيها ثلاث محميات قديمة داخلها، يحدها من الشرق سكاكا، ومن الجنوب حائل، ومن الغرب تيماء و تبوك إلى الأردن. مساحة شاسعة جدًّا ومتنوعة بتضاريسها وحيواناتها ونباتاتها.
المحمية فيها  فوق 280 نوع من الحيوانات، اللي للأسف ما لحقت أشوف منها شيء، وأكثر من 450 نوع نباتات، مناطق تشملها المحمية: 

حائل: أشهر معالمها جبال أجا وسلمى، والنقوش الصخرية غير الجبال والنفود. 

الجوف: أشهر معالمها وادي السرحان، وممر تاريخي للقوافل، وفيها غزال الريم.

تبوك: يميزها الجبال والسهول الواسعة، وتشتهر بالطيور المهاجرة.

الحدود الشمالية (حول عرعر): غير السهول الصحراوية فيها الذئب العربي والثعلب.

شمال القصيم: يميزها النفود الشاسعة، ومشاريع إعادة تأهيل الغطاء النباتي.

العجيب أن فيها ثلاث حرّات مميزة ومتوزعة بين كذا منطقة
أولها وأشهرها حرة الحرة وهي أكبر حرة بركانية في شمال سكاكا، فيها صخور سوداء واسعة، وتنوع جيولوجي رهيب. الثانية حرة الخنفة موقعها بين شمال حائل وجنوب الجوف، معزولة وبعيدة عن الناس، وآخرهم حرة الطبيق فيها تضاريس بازلتية وحيوانات كثيرة! هذا غير مئات المواقع الأثرية، وحضارات متنوعة ترجع لآلاف السنين، فهي محمية متكاملة ما يكفيها رحلة سريعة... لكن بنجرب. 🫡

بديت رحلتي برسم مسار تقريبي لمنطقة عندي فضول لاستكشافها، خصوصًا بعد موجة الأمطار القريبة. كنت أقول لنفسي حتى يكون للتجربة قيمة لازم تسوي شيء الناس تخاف منه أو ما تعرفه، فأنت تكسر حاجز لهم وتعطيهم العلم. فوقع اختياري على:

1.  قرية توارن وشعيب توارن. 📜

2. شعيب جو. 🌊

3.  تجربة المبيت بكرفان بالنهايد. 🛏️

كل المناطق اللي ذكرتها لكم موقعها في الجانب الغربي من حائل، وهي المنطقة الجبلية اللي تشوفونها بالخريطة.

ليه حدّدت توارن وجو بالتحديد؟
بعد تواصلي مع أحد من أهل المنطقة، قلت له أبي مسار يقطع هذه الجبال من الشمال للجنوب، قال ما عندك إلا مدخلين؛ إما من توارن ولّا من جو. قلت في نفسي:  هذين المدخلين لازم أجربهم. 🧭

قرية وشعيب توارن 🪾
صباح يوم الأحد، شغّلت سيارتي بعد ما رسمت لي مسارين كالتالي:

المسار الأول: حائل، ثم قرية توارن، والمرور بمنازل حاتم الطائي، بعده شعيب توارن. 

المسار الثاني: شعيب توارن ثم شعيب جو. 

الجو كان بارد لدرجة حسيت أصابعي تجمّدت، السماء صافية والطرق فاضية، وأول شيء شدني هو تضاريس المنطقة وألوانها. دائمًا أقول لنفسي اللي يبي يعرف شلون يختار الألوان مع بعضها يتأمل خلق ربي؛ الجبال بنية غامقة مرة، والأرض باهتة، والشجر أخضر غامق، خلطة ملائمة من الألوان لكشختك بالشتوية مثلًا! 🧣 

على مدخل قرية توارن وشعيبها هناك أراضي واسعة تحدها الجبال، تنتشر هنا مخيمات للإيجار و مخيمات شخصية، وكل ما لها المساحة الممتدة تضيق، لين توصل لمنازل حاتم الطائي وسد توارن. وفيه مقبرة بجانب منازل حاتم الطائي بس ما فيه معلومات حولها، ويوم بحثت ظهر لي أن واحد منها يُعتقد أنه قبر حاتم الطائي نفسه.

بعدها دخلت منطقة برية وبدأت الشبكة تقطّع. ومن تجربة، كلما يكون المكان اللي تجيه صعب كان أنظف، مو لأن الناس ما تجيه، بقد ما أن محبي الطبيعة والاستكشاف في الغالب عندهم وعي أكبر في حماية المكان ونظافته. 🚮

بعد جولة استكشافية لشعيب توارن، أقدر أقول إنه مكان حلو وملائم للكشاتة، لأن فيه مساحات أرضها منبسطة ووسيعة. 🧺

شدّني أيضًا وجود غرف من الشينكو مبنية للعابرين. ممكن تجلس فيها أو تحتمي داخلها من المطر أو الشمس.

شعيب جو 🏞️

انتقلت بعدها لشعيب جو، اللي له مدخل قريب من توارن. ومن أقدار الله العجيبة إنه استوقفني اثنين من الرجال بسيارة قطرية، كانوا يبحثون عن مدخل لشعيب جو. قلت لهم: كأنكم تدرون إني رايح له، الحقوني وخلونا نستكشفه سوى. 🫡

هذا هو المسار اللي كنت راسمه لشعيب جو، بحيث أدخل من الشمال وتطلع من الغرب تقريبًا.

أول شيء لمحته في شعيب جو هو أن وجود الماء فيه ذكّرني بوادي الديسة في تبوك، ولكنه أضيق من شعيب توارن وهذا اللي يخليني أقول إن شعيب توارن أنسب للمبيت، لكن جو ممكن تتكي فيه مع بيالة شاهي أو تتمشى. 🫖

أول شيء يصادفك هو صخرة الدندانة أو الحصاة الرنانة، وسميت بهالاسم لأنها تطلع صوت إذا ضربتها بسبب تجويفها الداخلي! 🤔

أيضًا لفتني أن المسار كامل تقريبًا كله أخاديد طويلة وصخور ملساء ومياه جارية. إضافة إلى مسيلة «مجرى الماء» وأرض منبسطة تشبه وادي الديسة، تزداد وعورة في نهايتها. 🌴

بعدما أخذت جولة في الشعيب، قرّرت مع الأصدقاء الجدد إننا ناخذ لنا بيالة شاهي في وسط الشعيب ونتعارف وناخذ علومهم. كانت جلسة من الآخر.
وهذه التقاطة للجلسة من أحمد اليافعي. 🤳🏽

أمور حطها في الحسبان لدخول شعيب توارن وشعيب جو:

- تحتاج سيارة دفع رباعي بسبب وعورة الشعيبين. 💨

- خل عزبتك واللّمة، لأنك بتحصل أماكن تناديك لفنجال قهوة ولّا مضغوط حاشي. 🐪

- لا يوجد شبكة نهائيًّا. 📴

- وجود خريطة معك مهم، حتى تعرف المخارج والمداخل. وارسم مسارك قبل الدخول. 🗺️

- يفضل تكونون سيارتين، بحيث لو تعطل أحد الثاني يساعده. 🚗🚙

-  وأخيرًا دع المكان كما كان أو أنظف. 🗑️

المبيت في الكرفان 🛏️

بعدما أخذنا بيالة شاهي، صرت أهوجس بموضوع النومة والمبيت. وخصوصًا إني لحالي، فما رشحت إني أنام داخل الشعيب. لكن بنفس الوقت كان ودي أجرب التخييم في المحمية!

فيه شيء عجبني بحائل، وهو أن فيه أشخاص تكلمهم وتحدد مكان التخييم ويجون يطقّون الخيمة ويفرشونها، ولو تبي عامل يساعدك تلقاه، وتحصلهم هنا. ⛺️

أنا من جهتي كنت بجرب المبيت بكرفان! وهذا اللي حصل. تواصلت مع كرفان روف، واخترت موقع جميل عند جبل النهايد، ووصيته يخلي واجهة خيمة المجلس غربية بحيث تطل على النفود، وأقدر أشوف الغروب وبنفس الوقت جبل النهايد كان مثل الذرى لي من الهواء الشمالي. 🌄

وما نسيت أخوياي اللي من قطر، لزّمت عليهم يكونون معي على العشاء. الحقيقة أبهرني الشاب اللي ماسك ترتيب الكرفان باهتمامه بالتفاصيل والترتيب والتنسيق؛ من طاولة ومباخر وكراسي وفرشة. 🪔

الكرفان كلاسيكي، يعطيك شعور إنك بفِلم من التسعينيات. مع دورة مياه ضيقة شوي بس يغفر لها وجود الماء الحار، وفرن غاز وكنبتين ممكن يناسبون للنوم. ما أقول إنه شيء فخم لكن عتيق ونظيف. 🧼

المكان صاد جدًا وبالكاد يمر أحد، ولكن الشبكة ضعيفة. تعشينا حميسة لحم تدفينا. وسعدت جدًّا بضيوفنا، ولا أخفيكم إنهم خففوا شوي من شعور الوحشة والوحدة.

الجو بالليل كان لطيف، وخفّت موجة البرد والحمد لله. 🌌
لو سألتني: هل أكرّر تجربة الكرفان؟
بقولك لا. مب لقصور فيها، ولكن لأني أبي أخوض تجارب أخرى من التخييم، مثلًا المبيت في بيت شَعَر.

أمور لازم تعرفها قبل حجز الكرفان:

• سعر المبيت في الكرفان بـ660 لليلة. من 04:00 العصر إلى 12:30 ظهر اليوم التالي. 💳

• الكرفان يكفي ثلاثة أشخاص للمبيت. 🧑‍🧑‍🧒

• الكرفان مجهّز ببروجيكتر وخيمة هوائية وجلسة خارجية مع موقد نار، وسواتر ومكينة قهوة ودفاية. 🔥

• للحجز تواصل معهم واتساب على هذا الرقم: 0500363223‬  ☎️

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

صحيح أن المحمية بعيدة عن وسط حائل ومنقطعة، لكن لا بد نتمشى ونتذوّق ونكتشف بعض الأماكن، وكانت معاييرنا هالمرة مختلفة شوي:

• وجهات تجمع الأكل والتجارب. 🫰🏼

• قرب جميع الوجهات لبعضها. 🗺️

• حائل يعني أكلات شعبية لذيذة. مريت مطعم نكهة ديرتنا وذقت الكبسة الحايلية على لحم الحاشي، وكانت لذيذة. المكان وسيع ونظيف والأطباق لذيذة بأسعار معقولة. 🥘

• مطعم تنور الديوانية. لقيته وأنا أدور خبز غير التميس، ولقيت عندهم خبز أحمر بتخمير طبيعي، والصراحة كان لذيذ وخفيف مرة، وبسعر حلو. 🫓

• وبما أن رحلتنا في محمية، كان مهم نلقى أحد يقدم مغامرات رياضية ممتعة، صح ما لحقنا نجربها، لكن رملة يقدمون تجربة السفاري في توارن، أو البقيات في النفود سعرها 380 ريال، ياخذ فيك جولة رهيبة لمدة ساعتين تشمل وجبة خفيفة. 🏎️

• مقهى ومحمصة بيكوك، أول فرع له فتح في حائل بعدها جاء للرياض، المكان هادي وجلساته لطيفة ومناسبة للعمل بعد، قهوتهم مضبوطة وعندهم مادلين مستكة لذيذ ونكهته مميزة. 🥮

ولأن زيادة الخير خيرين، زرنا أماكن كثيرة في عدد حائل السابق تقدر تشوفها من هنا 🔗 💡

وأنا أتجول شدتني مباني طينية قديمة ومتفرقة لقيتها بأكثر من موقع متناثر في حائل، ولما دخلت على قوقل ماب لقيت أن هالمباني تسمى مقصورات، وكل مقصورة تنسب للأسرة اللي قائمة عليها.
 فحددت مقصورة القنون في قرية عقدة، والحلو إنها تقع ضمن حدود محمية الملك سلمان، رحت على حزة العصر، وعجبني أن أهل المكان موجودين ببيت شعر ملاصق للمقصورة ومنهم «سعود القنون»، سولفنا عن المكان وتاريخه وعرفت أن عمره حول ميتين سنة، ترمم كذا مرة بطريقة تحافظ على أصالته، السواليف معهم ما تنمل، وأخذوني بجولة داخل المقصورة اللي مبنية بتصميم نجدي رهيب.

للتواصل معه سعود القنون: 0504101159