آثار حائل 📜

 حائل، في ذهني، مدينة الأساطير والقصص والكرم، مثل أسطورة «أجا وسلمى»، وحكايات النقوش اللي عمرها عشرات آلاف السنين اللي ترسم حيوانات ما عادت موجودة. وطبعًا كرم حاتم الطائي اللي قال في أحد أبياته:
«وَإِن لَم أَجِد لِنَزيلي قِرىً..قَطَعتُ لَهُ بَعضَ أَطرافِيَه»

في هذا العدد، تتبّعنا شيء من تاريخها، ومرينا على جبل أم سنمان وشفنا نقوشه، وتمشينا في محمية الديدحان. 🌺

وأنت تقرأ هذا العدد، اطرب على سامري حايلي. 🎶

ليه اخترنا حائل؟

• تاريخ عريق يحكي قصص المنطقة. 📜

• تنوّع التضاريس وبرودة الجو بحكم موقعها. 🌨️

• قرب الوجهات لبعضها. 🚗

بين جبال حائل، حضارات عمرها آلاف السنين ⛰️

قضيت سنوات الجامعة كلها في حائل، وأعترف بتقصيري تجاهها. أعرف أن فيها آثار وتاريخ وحضارات ولكنها معلومات سطحية وعامة.

في رحلتي هذه، قررت أتعرف على وجه حائل التاريخي، بعيدًا عن الصورة النمطية وإنها ديرة مكاشيت مثالية (وهي معلومة صحيحة بالمناسبة). ⛺️

جُبّة والفنون الصخرية 🪨

كنت على تواصل مع الأستاذ تركي المحيفر قبلها بأيام، وهو شخص مهتم بتاريخ حائل وآثارها. وصلت المطار، وانطلقت مباشرة إلى جُبّة، اللي تبعد عن حائل قرابة الساعة. 🚘

تضاريس حائل عجيبة، متنوّعة رغم كثرة الجبال فيها. تشوف الجبال بألوان مختلفة، والنفود والمزارع، ولو زرتها بشهر فبراير ومارس بتكون ربيع على مدّ النظر. 🌼

بس ليش جبّة مهمة؟

 تُعد جبّة من محافظات منطقة حائل، وفيها آثار قديمة قِدَم الإنسان، ويرجع الاستيطان البشري فيها تقريبًا إلى 80 ألف سنة قبل الميلاد! وكله موثّق في اليونيسكو. 🧾

وجهتنا كانت لجبل «أم السنْمان»، وسُمّي بهذا الاسم لأن شكله يشبه سنام الجمل. 🐪

تشكيل الجبال في المنطقة مذهل، سبحان الخالق. ⛰️

خلوني أسولف عن الأستاذ تركي شوي...
 أبو حمود أستاذ في الشريعة، وقضى حياته المهنية في التدريس. عنده جانب شغوف تجاه علم الإنسان «الأنثروبولوجي». هالشغف ودّاه لأماكن ما كان يتصوّرها من التعرّف على آثار حائل والسعودية. 🗺️

قطع «درب زبيدة» كامل، ويعرف تفاصيله معرفة عميقة. وما اكتفى بهذه المعرفة، فتعلّم اللغة الثمودية قراءةً وكتابة! وصار يتتبّع كتابات الثموديين ويترجمها. ومن نظرة متفحصة للأثر، سواء كان كتابة أو رسم، يعرف لأي عصر ينتمي. 🔍

ولمّا سألته: ليش تسوي كل هذا، أيش الهدف؟

سكت شوي، ثم جاوبني جواب ما توقعته، قال: «أقدر أشبّهها إنها رحلة للبحث عن الذات، ومن أنا ووش تاريخي.» ❓

وقفنا طويلًا عند هذا الرسم، واسمه «ملك جبّة». ويتضح من تفاصيله أنه لابس التاج وقلادة كبيرة، ويلتف حول خصره حزام. وأمامه شخص صغير الحجم. يقول أبو حمود: «كبر حجم الملك مقارنة بالشخص الواقف قدامه، دلالة على تعظيم هذا الملك»، ويعد أشهر رسم في جبال جبّة. 👑

إضافة إلى الكثير من الرسومات اللي ترجع لنفس العصر. ويُقال أن تمركز الشعب وقتها في المنطقة يرجع لتجمّع الماء فيها، حتى صارت محاطة بالبحيرات، فاستقرّوا قريبًا لمصادر المياه فيها، وصاروا يصيدون من حيواناتها. 🏹 🌊

أما الكتابات الأخرى فترجع للعصر الثمودي. وهي كتابات ورسوم تحكي تفاصيل حياتهم. لاحظت أن بعض الكتابات شخصية مرة، أحدها كان لامرأة ثمودية اسمها «ودعة» وتقول: «أرسل أشواقي إلى بخيت» وموقّعة باسمها «ودعة».📜 

إضافة إلى رسوم تعكس الطبيعة حولهم مثل النعام والغزلان والذئاب.🦌 

فيه ملاحظة لفتت انتباهي، في بعض العصور كانوا أهلها يرسمون البقر، لكن الثموديين رسموا الجِمال! ويُقال أنهم أول من استأنس الجِمال، وكانت قبلهم حيوانات وحشية تنفر من الإنسان. 🤔
قصص كثيرة وحكايات من أوقات مختلفة ترجع لآلاف السنين، تشوفها في هذه النقوش والآثار، وتحسسك بشكل غريب بمرور الزمن. ⏳

بعد ما خلّصنا توجّهنا إلى متحف العيادة التراثي في جبّة. صاحبه أبو محمد رجل كريم فتح مكانه وبيته للناس والسيّاح، وصار يستقبلهم ويضيّفهم وياخذ فيهم جولة تعريفية ببيته الطيني، اللي عمره يتجاوز 150 سنة. يزور المتحف سياح من دول كثيرة، ويستقبلهم بصدره الشمالي الرحب، ويعرّفهم على تراث جبّة وحائل. 🏠

في هذه الرحلة عرفت أن جبّة تشتهر بصناعة الشداد والمباخر، وتتمّيز مباخرهم إنها تُصنع من قطعة واحدة من خشب الأثل، وتُزيّن بنقوش تاريخية لجبّة. 🪵
والشداد هو أداة خشبية يثبتونها على السنام لتسهيل ركوب الجِمال. 🐪

• أفضل وقت لزيارة جبل أم السنمان في الصباح، ويفتح مكتب هيئة التراث هناك الساعة 08:00 صباحًا. ☀

• الأفضل زيارة الجبل بسيارتك بدل وسائل توصيل الركاب؛ عشان ما تتورط وقت الرجعة. 🚙

• مهم الجزمة تكون مريحة. 🥾

رجعت أريّح شوي، وبعد المغرب طلعت لمتنزه الأدهم. 🌄

يوم وصلت لاحظت الجبال المحيطة بالمنتزه وتداخل الإضاءة في الممرات، المزيج خلاه مكان فاتن بالليل. فيه مطاعم ومقاهي وألعاب، والجلسات خارجية مع الجو تطرد الهواجيس، تحس إن الحياة عبارة عن كوب قهوتك أو شاهيك اللي قدامك وبس. ☕️

شفت مقهى الأدهم، وقابلت باريستا رواندي اسمه باول، بشوش ولطيف وتحسّه أخذ من أهل حائل صدورهم الوسيعة. له قرابة السنة بحائل وبعد ما يسوي لك القهوة يقول: «تفضل يا بعد حيي».😂

• منتزه الأدهم يفتح من العصر إلى 12:00 منتصف الليل. ⏰

• إذا رحت بالليل خذ معك جاكيت لأن الجو يبرّد شوي. 🧥

• لا تفوّت السوق اللي بالمنتزه، فيه منتجات محلّية ومصنوعات يدوية وبأسعار حلوة. 🛍️

محمية الديدحان 🌼

من بكرة الصبح طلعت للخطّة، وهي محافظة صغيرة تبعد عن حائل 60 كيلو تقريبًا، وهدفي أستكشف المحميات والمزارع هناك. 🌾

ولقيت محمية الديدحان، والديدحان زهرة برية لها عدة مواقع بالسعودية وتشتهر بالشمال أكثر، يُقال إن لونها الأحمر الساطع بسبب آفة مرضية! وهي نفسها زهرة الخشخاش. 
التباين بين الزهور البرّية والنفود الكبير من خلفها منظر غريب وجميل 🌻🏜️

قابلت صاحب المحمية أبو ضاري وقال لي قصتها: «بديت أزرع زهور برّية بسيطة عشان الوالدة رحمة الله عليها. وكنت أحط خيمتها بين الورد تجلس فيها. الوالدة تحب البر والربيع وكانت الفكرة أني أهيئ لها مكان تنبسط فيه. ثم كبّرنا المساحة وصاروا الناس يجون يجلسون فيها. وبعد وفاة الوالدة الله يرحمها حوّلتها لمشروع.» ❤️

• تفتح المحمية من الصباح وحتى العشاء، وفيها خيام للإيجار، بدون مبيت. 🏕️

• المكان فيه ضيافة ودورات مياه نظيفة، وما يحتاج تحجز للزيارة. 🚪

• فيه أكواخ راح يصير فيها مبيت، يبدأ استئجارها في ديسمبر. 🏘️

• تواصل مع أبو ضاري على هالرقم للحجز والاستفسار عن الأسعار: (0555158827) 📞

قلعة إعيرف وقصر القشلة 🏰

في منتصف مدينة حائل تقريبًا، فيه جبل على رأسه قلعة اسمها «قلعة إعيرف»، وسُمّيت بهذا الاسم نسبة للجبل اللي بُنيت عليه. ⛰️

يرجع تاريخ بنائها لأكثر من 240 سنة، وكان هدفها حماية المنطقة واستطلاع الأهلّة وإطلاق مدفع رمضان. 🌙

بناء القلعة بسيط من الحجر والطين والخشب، بس أكثر شيء لفتني الأبواب وتزيينها. والاختلاف بين باب حائل والباب النجدي أن النجدي تجي فيه 3 أعمدة خشب بالعرض، بينما باب حائل 4 أو 5. وتلاحظ من خلال الصور طريقة تزيين الباب والاهتمام بتفاصيله الفنّية. 🚪

القلعة فيها فتحات بالجدران تُسمّى«كُوى الرمي»، والهدف من بنائها التصويب لردّ العدو بدون ما يكشف الشخص نفسه، وبنفس الوقت يكون محتمي بالقلعة.

ومن فوق سطح القلعة تشوف حائل من الأعلى، مكان مثالي لاحتراف التصوير. 📸

خلصت جولتي ومشيت لقصر القشلة، وهو يبعد 5 دقايق بالسيارة عن القلعة. القصر أمر ببنائه الملك عبدالعزيز -طيب الله ثراه- ويُعدّ من أكبر المباني التراثية في الشرق الأوسط. يتكون من دورين و 136 غرفة، كلها مطلّة على الساحة. ويختلف بناؤه عن قلعة أعيرف، لأنه صُمم على طريقة البناء النجدية.

بداخله مسجد الأولين، اللي يتكوّن من مصلى وسطح وقبو «خلوة». ورغم التجديدات اللي صارت فيه، ما زال محافظ على عمارته التقليدية.
مساحة القصر شاسعة، وتقيم فيه هيئة التراث بين فترة وأخرى فعاليات متنوعة، مثل الفعالية اللي صادفتها «المستكشف الصغير»، ويستهدفون فيها الأطفال لتثقيفهم حول تراث حائل وتاريخها ومصنوعاتها اليدوية.

• المكانين متاحين للزيارة من 08:00 صباح إلى 05:00 العصر. 🕰️

• موظفين هيئة التراث موجودين لو احتجت شخص يشرح لك قصة المكان. 🧑🏻‍💼

حايل ما يكفيها يومين، والتاريخ والحضارات اللي مرّت فيها تحتاج استكشاف أكثر، وبوجود هيئة التراث وأشخاص مثل الأستاذ تركي المحيفر، نستكشف كل يوم قصص هذه المنطقة. 
وإذا قرّرت تزور حايل تعال من نوفمبر إلى أبريل، الأجواء تصير شتوية تردّ الروح وتشرح الخاطر. ❄️

ودّعتها وأنا أردد بيت مساعد الرشيدي رحمة الله عليه: «سلام يا حايل، حبيبة طي». 🛫

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

 قبل لا أزور حائل، كلّمت بعض أصدقاء الجامعة يرشّحون لي أماكن أزورها. وبعد تجربة قائمة طويلة، بعضها خلاني أفكّر أقطع علاقتي مع اللي اقترحها، والبعض الآخر فاق توقعاتي؛ اخترت هالأماكن بناءً على:

• استكشاف أوجه عديدة لحائل، ما بين عمارة ومذاقات وأسواق شعبية. 🫶🏼

• سهولة الوصول للوجهات. 🚙

• بعد ما خلصت من جولتي في قلعة «أعيرف»، لقيت مقهى بتصميم حايلي جميل، اسمه ثمد. تقهويت فيه مع إطلالة جميلة على القلعة، والكوكيز كان حكاية. 🍪☕️

• تجي حائل وما تذوق طبخها؟ جربت مطعم الوادي المبارك. ذقت عندهم دجاج بالفرن مع الرز والقرصان، وطبعًا الهريس، وكل واحد ألذ من الثاني. 😋 

•  الأسواق الشعبية عنصر مهم في كل مدينة، سوق برزان وبسطاته رهيبة. عندهم منتجات شعبية ومحلية مثل الإقط وصرار حايل، وهي مو موجودة بالمحلات. 🛍️

• مطل حاتم الطائي في منتزه السمراء، المطل بديع وقت الغروب، وفيه مطعم ومقهى وجلسات. تقهويت وطلبت من المقهى حنيني بورليه وكان لذيذ. ⛰️

في منتزه الأدهم بالصدفة لقيت سوق صغير فيه علامات تجارية محلّية، من ضمنها محل اسمه «غصون الأثل»، وقابلت عبدالعزيز الخزام.

عبدالعزيز شاب يشتغل بمحل والده، وهم متوارثين المصنوعات الخشبية من جَدهم.

يقول عبدالعزيز: «أغلب اللي تشوفه بالمحل من الأثل.» يصنعون منها الأبواب ومبرادة القهوة والعصي والمباخر. وحوّلوا بعضها لميداليات وحامل أكواب وقلادات. 📿

القطع عندهم بعضها سعرها 30 ريال، وبعضها توصل فوق 3,000 ريال، حسب الصناعة وجودة الخشب المستخدم. 🪾

حاولت أستفزّه شوي، وقلت له ليش ما تجيب لك عامل يبيع وترتاح؟
قال لي: «العامل ما بيرحّب ويهلّي بك ويشرح لك كل قطعة وش تعني لنا ولتراث أهل حايل.» 🫶🏼

• المحل يفتح من العصر وحتى 12:00منتصف الليل. 🕛