تجربة استكشاف واحات الرياض🌴

أحب تجارب المتاحف والمعارض، وهي تجربة لازم أخوضها وين ما سافرت، لأنها جزء يعلمك عن ثقافة أي بلد، وتعطيك تصوّر عن الديرة واهتمامها.

وأكثر أسلوب يعجبني في تجارب المتاحف، الأسلوب التفاعلي اللي يخليك تجربّ وتحس وتسمع ويمكن حتى تذوق وتشمّ، يخليك جزء من القصة، وتعيش التجربة كاملة.

في  هالعدد تجربة الأسبوع كانت في معرض «فودسفير» من واحات الرياض، توصيات لمشاتل تعطيك تجربة مختلفة. 🪴

تجربة الأسبوع، كان غرضها فضولي. كلما مريت من الشارع أشوف مبنى واحات الرياض.

بعد ما تصير مركّز مع شيء يصير يطلع لك في كل مكان، تحس أنّ كل شي يتخاطر معك، حتى الإنستقرام طلع لي منشور منهم.

قلت بس، وجب الاكتشاف.

بعد البحث عرفت أن واحات الرياض هو مشروع تابع لأمانة منطقة الرياض. عبارة عن ثمان واحات موزعة في أشهر أحياء الرياض، وهدفهم يبنون معارض تفاعلية حيّة. ولكل واحة طابع مختلف.

واحة فودسفير، في التحلية

هي الواحة الأولى في المشروع، طابعها يركّز على العلاقة بين الطبيعة والأغذية كمنظومة مترابطة.

حجزت تذكرة الدخول عن طريق «webook» الساعة 05:00 المساء، ووجّهت له. 
أول ما لاحظت أن المكان مليان منظمين، مستعدين يساعدونك ويوجهونك متى ما احتجت.

لكن التجربة غالبًا تعتمد عليك، أنك تستكشف المكان بنفسك لأنه مجهّز بالمسارات الواضحة، خاصة وأن المكان ملموم. بس هم يساعدونك بمعلومات بسيطة قبل تدخل أي منطقة، والباقي عليك.

تقرأ وتسمع وتشمّ. ولما أقولك «تشم»، صدقني هذي أكثر حاسة اشتغلت عندي في فودسفير، على أني توقعت العكس. بذوق لأنه أكل؟ 

بس بالبداية خليني اقولك أن فودسفير عبارة عن ثلاث مناطق: 

1. الواحة. 🌴

2. المنطقة الحيوية. 🦋

3. المنحل. 🐝

*تنويه قبل أروح الواحة تعمّدت أني ما أبحث عنها عشان ما أحرق على نفسي. ولأن ما ودي أحرق عليك حتى أنت، بعطيك لمحات عن التجارب بدون تعمّق عشان تكتشفها بنفسك.✋🏻

تبدأ الجولة بـ «سحابة الترحيب» في المنطقة الأولى. وهي غرفة مغلقة، أول ما دخلتها جاتني دوخة لأنها كانت عبارة عن دخان حولك وحواليك وما تدري أنت بأي اتجاه، من كمية البخور.

بعدها انتقلت لمنطقة القهوة، وأول ما قرّبت هبّت عليّ روائح القهوة بأنواعها، والحلو أنك تكتشف في هالمنطقة أنواع التحميص والقهوة والنكهات في مختلف مناطق السعودية. 

كملت جولتي في المنطقة ودخلت «الكبسولة»، بتشوف عيونك تتنقل بين الصور في عُشر من الثانية كم مرة.

وهي عبارة عن كبسولة تدخلها، وتحاوطك صور من مصورين سعوديين، واللي قدرت أميز منهم صور إبراهيم سرحان. فيها وصف بصري عن طريقة زراعة البُن الخولاني في جازان، من البداية، إلى تقاليد تقديم القهوة. 📸 

بعدها دخلت مكتبة التمور والنخيل، تجربة توضح لك أنواع التمور، وأسماءها، ووش يتميز فيه كل نوع، بأسلوب مختلف في كل مرة. تحس أنك داخل مكتبة بس المعلومات (3D).📚 

وتختمها بأسئلة تجاوبها تختبر معلوماتك «التمريّة».  🌴

رحنا بعدها للمحطة الثانية.

المنحل🍯 

من اسمها، تركز على النحل والعسل، فخلّك مستعد تشوف النحل، وتبدأ رحلة البحث عن الملكة. 🐝

بديت الجولة بدون مساعدة من المنظمين، لأن ودّي أعيشها لحالي. لكن هذي وحدة من التجارب اللي علّقت فيها، لين اكتشفت طريقتها. بمساعدة صديقة... كانت وحدة جنبي، جلست أنا وياها نحاول نفهم وش السالفة، لين دلينا. 🤣

فيه تجربة اسمها «من قلب الخلية»، تجاوب عن سؤال: أي من النحل تشوف؟ نحلة عاملة، ولّا نحلة ذكر، ولّا النحلة الملكة. 

وتراهم ما يقصدون النحل.😉

وصلت بعدها آخر منطقة:

المنطقة الحيوية 🦋

هذي المنطقة الوحيدة اللي دخولها برسوم، منطقة منفصلة، فيها عدة تجارب، وفيها التجربة اللي فازت بالمركز الأول بالنسبة لي... 🤫

تبدأ الجولة باستكشاف التربة، وتقنية جديدة تستخدم في صناعة تربة مخصّصه للأراضي الخصبة في المناطق الجافة، اللي يصعب الزراعة فيها. 

يخلونك تجرّب تلمس اللي حولك وحواليك.... منها التربة. 

بعدها مرّينا في ممر ضبابي... له قصته اللي ألتزم أني ما أحرقها عليك. 

أنا ما أحب الحشرات عمومًا، وفكرة لمسها مستبعدة تمامًا. لكني قلت وش ورانا؟ خلنا نجرب. طبعًا بعد كم سؤال يطيّب الخاطر مع المسؤول. محد راح يموت قبل يومه، ولّا؟ 

سويتها ووقفت على يدي مو فراشة وحدة، وقفوا ثلاث! شعور غريب ومدهش.

كملنا جولة داخل القبّة، وعرفت كمّية معلومات عنهم. مدري وش بسوي فيها... بس عرفتها. 

وفي هذي الأثناء صرت أعز أخويا الفراشات، وصار بينّا عيش وملح وميانة، كمّلنا الجولة ووحدة منهم على كتفي، والثانية على خشمي.👃

الصدمة بعد هالعشرة، قال لي المسؤول إن الفراشات عمرها في هالمكان ما بيتعدى أسبوعين!!💔

وفي الطبيعة عمومًا شهر. ورّاني فراشات ميتة مجمعها على جنب للتحنيط. 😔😔

وعلى طاري التحنيط، عندهم ورش تحنيط الفراشات بين فترة وفترة. إذا كنت مهتم، تلقى تفاصيلها في موقعهم وانستقرام. 

ورّاني أغرب فراشة شفتها هناك، أجنحتها على شكل بومة! سبحان الله🦉 

وتستخدمها الفراشة وسيلة حماية وتمويه، ولو تلاحظ جناحها اليسار، فيه شكل لحيوان ثاني.

بعد ما انتهت الجولة، وأنت طالع تشوف ركن التصوير، خذ لك صورة للذكرى. من ما يحب الصور؟

لاحظت غالبية الزوّار عوائل مع أطفالهم، ولعلّي كنت الشخص البالغ الوحيد اللي جاي لحاله. المنطقة مهيّأة جدًّا للعائلة. لو بعيدها؟ حتمًا بجيب أحفاد العائلة. بتصير ممتعة أكثر أنك تشاركهم الدهشة. ❤️

التجربة بشكل عام: 

• ممتعة، والمكان مرتّب والمنظمين مضيافين.

• ساعات العمل من 09:00 الصباح الى 11:00 المساء طول أيام الأسبوع، ما عدا الجمعة يفتحون من 04:00 المساء.  

• يتطلب حجز للدخول. ممكن تحجز من موقعهم الإلكتروني أو عن طريق «webook». 

• الدخول مجاني للمكان كامل، فقط المنطقة الحيوية برسوم 75 ريال للبالغين، والأطفال 35 ريال 💸.

• أقرب محطة مترو من فودسفير هي محطة الضباب من المسار الأخضر، تبعد 2 كيلو متر. 🚈

• عندهم مقهى خاص ومشروبات موسمية، وجلسات صغيرة ممكن تتقهوى فيها.🍹

• إذا تهمك تجربة قبة الفراشات، رح لها في النهار، لأن بعد الغروب تنام الفراشات، تقدر تشوفها، بس مو بكثرتها في الصباح أو العصر. 🦋

• ممنوع استخدام الكاميرات الاحترافية بدون تصريح. 📸

• عندهم ورش متنوّعة ولقاءات ينزلون جدولها شهريًّا على حسابهم في إنستقرام.

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

ركّزنا في تجربتها على معيارين: 

• أنها تجربة مختلفة عن المشاتل والمحلّات اللي تقدم نفس الخدمة. 🪴

• تقدر تقضي وقتك فيه، مو بس تتفرج وتطلع. ☕️

مزرعة أمازونيا في العمارية 🌾👨‍🌾
مزرعة ومشتل تقدر تقطف وتاكل من فواكههم وخضارهم، وتستمتع بمشتل الجوري. كل محصول له محمية منفصلة، وقبل ما تبدأ يعطونك علبة، وتبدأ تتخيّر وتقطف.

حط ببالك 💡

• دخول المزرعة مجّاني. الرسوم فقط على تجارب القطف. 💵

• المكان فيه جلسات داخلية وخارجية، ومناسب للعوائل.🪑 

• فيه مقهى ومخبز تشبه المكان, وركن عصائر، وعربة آيسكريم.🍧

•  قبل تروح ، استفسر منهم عن المحاصيل الموجودة، لأنها تختلف على حسب الموسم.📆

• المزرعة مغلقة حاليًّا تجهيزًا لموسم الشتاء، ومتوقع عودتهم منتصف نوفمبر. تواصل معهم قبل الزيارة أفضل. 🔐

• وهنا رقم تواصل معهم: (0501299814). 📞 

مقهى ومشتل حياة الطبيعة، في حطين 🦆🪴

مشتل بدأ من 2018، وكان تركيزهم على تصميم الحدائق وتنسيقها، وخدمات التشجير بأنواعها. وفي 2023 حولوا المكان إلى نصف مقهى ونصف مشتل. 🌳☕️

حط ببالك 💡

• عندهم جلسات داخلية وخارجية.🪑 

•  يبيعون نباتات داخلية وورد وتربة وأدوات زراعية. 🪣🪏 

• عندهم بحيرة بنص المكان فيها أسماك وبط.🐠🦆 

• يوفرون خدمات الحدائق، مثل تنفيذ المسطحات الخضراء، وشبكات الري. ⛲️🌳

ملاحظة: حاليًّا المكان صعب الوصول له بالسيارة، لأن مقابله حفريات. لكن موفرين سيارة قولف تنقلك من المواقف الخلفية لبوابة المكان. 🚧🏗️

مشتل التحابي، في الدرعية 🌵🪴
أخذنا هذي التوصية من فريق نشرة أماكن من جولتهم في الدرعية 🤎

حط ببالك 💡

• المشتل واسع، بخيارات كثيرة، وحلو للتمشية. 🫶🏼🌿

• عندهم حوالي 15 نوع صبّار وأشجار كبيرة. 🌵🌳

• يوفرون خدمة توصيل للمواقع القريبة من الدرعية. 🚚 📦

• هنا رقم تواصل معهم: (0558402553). 📞