شتاء الدرعية 🤎

 رغم أني من مواليد وسكان الرياض، لكن الدرعية منطقة غامضة بالنسبة لي، ما رحت لها إلا كذا مرة ولا أعرف إلا أنها محطة تاريخية مفصليّة في تاريخنا، قررت في هذا العدد أكتشفها بعين جديدة. ✨

وأنا أتمشى بين شوارعها كانت تتردد بذهني أبيات بدر بن عبدالمحسن:
«عاشقٍ طين البيوت .. وفتلة خيوط الوبر
عاشقٍ ما في البشوت .. من عطا وطيب وفخر»

عطتني الرحلة منظور مختلف وتقدير لجمال المكان وعراقته، وكل وجهة مريتها برجع أزورها أكيد. 🤎

وأنا بالطريق لها مع صديقتي، سألتني وش الأغنية اللي تذكّرني بالدرعية؟ قلت طبعًا هذه.

بعد عشرة أعداد من نشرة أماكن، جلست مع الفريق نفكّر وش نسوي عدد نفتتح فيه موسم الشتاء؟ وقلنا ليش نبعد والدرعية عندنا! 🤔

ليه اخترنا الدرعية؟

• منطقة جميلة ليلًا ونهارًا، بالنهار جميل منظر النخل والبيوت الطين، وبالليل الإضاءات المتناثرة بين المباني والمطلّات تعطي لمسة لطيفة للمكان. 🌌

• الدرعية ثرية تاريخيًا، وما تزال تُكتشف فيها آثار. 🏺

شمالات ⛰

خلال بحثي عن وجهات بالدرعية، كنت أبي أماكن مختلفة ووراها قصة - كالعادة - وطحت على مكان اسمه «شمالات» رحته مرتين مع انطباع أنه مقهى ومطعم وعجبني جوّه، ولكن بعد سؤال مدير المطعم وصّلني بشخصية أتواصل معها، واكتشفت أنه أكثر من كذا. 👀

المكان عبارة عن بيت طيني اقتنته الفنانة مها الملّوح عام 2013، الفنانة مها ولدت في جدة وتعيش بالرياض، وارتباطها بالثقافة والهوية المحلية خاصة العمارة النجدية شيء يميزها، شاركت في معارض محلية وعالمية مثل بينالي البندقية، ومعرض الحج بالمتحف البريطاني.

أول ما وصلت لفتني بساطة وأناقة المكان، وكيف أنه دمج الأبواب والنوافذ الزجاجية بالطين، رحت أكثر من مرة وسط الأسبوع ونهاية الأسبوع وكلها كان هادي وغير مزدحم وما يقطع هدوءه إلا موسيقا سعودية رايقة. 🎶

مرتين طلبت منهم بيتزا التميس، وحدة بالفلافل ووحدة بالدجاج، وحبيت الفلافل أكثر، ومرة طلبت مسخّن الدجاج اللي أكلته ونسيت أصوره لأنه ألذ شيء ذقته عندهم، وطبعًا شاهي مع حبق ويجيني مضبوط كل مرة. 🫖🍃

كشخص تهمه التفاصيل استمتعت باكتشاف المكان، المقهى الداخلي بجدران الطين وتزينه ممتلكات الفنانة من تحف وكتب ولوحات فنية وديكورات متنوعة لها قصص، مثل المكتبة اللي بالوسط تقول الفنانة مها: كانت خشب قديم عندي، وصممتها بشكل حديث عشان نوظف القديم بطابع يشبهنا وعصري بنفس الوقت. 🖼️

بين المقهى الداخلي والخارجي باب داخلي يؤدي للساحة الخارجية من البيت «الحوي» السقف مفتوح وتتوسط الساحة طاولة وحواليها جلسات أنتظر الشتاء يجي عشان أجلس فيها. 🌨️

المساحة الخارجية تعكس حقيقة البيت الطيني، فيها أربع غرف، غرفة اجتماعات لها باب تقدر تجلس فيها إذا فاضية، لكنها عادةً للموظفين، المرايات فيها تاخذ نصيب الأسد من السحر. 🚪

الغرفة الثانية حوّلتها الفنانة إلى متجر مصغّر لفنانين صغار تدعمهم لبيع منتجاتهم فيها، تلقى العسل والصوابين الطبيعية ومجوهرات يدوية وعطور وديكورات ومشغولات يدوية منوّعة. 📿

وقبل أطلع أشّرت لي وئام «مساعدة الفنانة» على لوحة جبل، قالت هذا جبل اسمه «شمالات» في القويعية وسُمي المكان تيمنًا به، وبنعرف ليه قررت الفنانة تسميه باسم هالجبل.⛰️
الغرفة الثالثة امتداد للمتجر ولكنها أبسط وأقل مقتنيات، والغرفة الأخيرة مساحة حرة تستضيف فيها الفنانة فنانين وأعمال فنية، قال لي مدير المساحة هذه الغرفة المفضلة للفنانة، ولما دخلتها عرفت ليه، الجدران فيها مسحة من اللون السماوي الأزرق، وأكثر غرفة تعكس روح البيت الطيني فعلًا. 📜

بعد الانغماس في الأجواء القديمة، انتقلنا بانسيابية إلى القسم الثاني من المكان، وهو عبارة عن معرض ومساحة فنية مصممة بشكل حديث جدًا باستخدام حجر الرياض الأبيض، مدموج في بنائها البيت الطيني بذكاء، فتحس التضاد بين البني والأبيض ولكن ما ينفّرك، تستضيف المساحة أعمال فنية لفنانين كثير، وتطل على بيوت طينية ونخيل متناثر .🪟

هذا الدمج بين الماضي والحاضر  والعمارة التقليدية والحديثة هو اللي ألهم الفنانة تسمي المكان «شمالات» على جبل له قمتين في القويعية، ذُكر في الشعر العربي الجاهلي بوصفه شاهد على الزمن، وكأنها تقول ما فيه قمة وحدة نوصلها، قمة الهوية ما نتخلى عنها، وقمة التطور نسعى لها. وهذا الدمج أيضًا كان سبب بفوز «شمالات» بجائزة الأمانة للإبداع المعماري والعمراني. 🏆

• المكان يفتح من 6:00 الصباح إلى 3:00 الفجر. ⏰

• المواقف قليلة ولكن فاضية في النهار غالبًا. 🅿️

• المساحة تستضيف فعاليات متنوعة، وبيتعاونون مع موسم الدرعية هذا الشتاء. 🖼️

• المطعم والمقهى بتشغيل من «تكية». 🍛

فندق باب سمحان 🚪

من ضمن جدول الرحلة كانت تجربة الإقامة بفندق باب سمحان لمدة ليلة، الهدف أننا نعيش شعور السفر بدون ما نطلع من الرياض، نفصل عن الحياة والعمل، ونسترخي ونستمتع بتجربة فاخرة، بكلمة ثانية ندلّع أنفسنا. 🛀🏼

أول ما وصلت على الساعة 4 العصر، استقبلوني في البهو بفنجال قهوة وتمر، وريحة العود تهفهف بكل مكان. تمشّيت بالبهو اللي كان بديكوراته وتفاصيله نجدي، سدو داخل في أقمشة الكنب، المثلثات في الجدران والخشب، طاولة كاملة كلها بخور بأنواعه، وفيه مقهى ومطعم صغير لوجبات خفيفة، بعدها طلعت على الجلسات الخارجية ومن الجلسة الخارجية رحت للمبنى اللي فيه غرفتي. 🛋️🫧

حبيت أن المبنى اللي فيه الغرف يحتاج بطاقة الغرفة للدخول؛ عشان محد يدخل من مبنى ثاني أو من برا، وهذا عطاني شعور إضافي بالأمان. وأنا رايحة للغرفة ما جاني شعور الفنادق اللي يجيب كتمة على خفيف وتحس أنك داخل مكان مقفل، لأنه مبني من ثمانية مباني منفصلة وبينها ساحات مفتوحة ومسارات مشي منورة، كل مبنى فيه مجموعة غرف وأجنحة. 🌇

كل مكان بالفندق بدءًا من البوابة والبهو وحتى ممرات الغرف مزيّنة بأعمال فنية لها ارتباط بالهوية السعودية، زي الخيول والأبواب النجدية والنخيل والسدو، والجميل أن بعضها مكتوب جنبه نبذة مع اسم الفنان. 🖼️🌴

الممرات بين المباني كأنها متاهة، والمساحة شاسعة جدًا عكس ما كنت أتصور يوم شفته من برا. التمشية بين الممرات لحالها ممتعة، وأنت تسمع صوت النوافير وخرير الماء من كل جهة. ⛲️

يوم دخلت الغرفة استقبلتني على الطاولة تارت مُعدّة من مانجو جازان، وفواكه مجففة، وحلويات شرقية منوّعة زي الغريبة والكليجة والمعمول والبقلاوة. 🥮🥭

تجولت بالغرفة لأني مثل ما قلت أهتم بالتفاصيل، لاحظت «قائمة وسائد» تطلب فيها مخدة تناسب احتياجك. 🔍

حطيت أغراضي بالغرفة وحسيت أحتاج شيء منعش أشربه، فرجعت للبهو، شفت القائمة عندهم مجموعة مشروبات خاصة للفندق، طلبت مشروب حسيته مثالي اسمه «ذهب الخلاص» أو «Khalas Gold»: مكوناته مزيج من مانجو جازان وورد برتقال طائفي وتمر خلاص ورشة هيل. وجاني مع مكسرات محمصة ومبهّرة. 🌸🥭 

المشروب لذيذ ومنعش ونكهاته واضحة، والحمدلله أنه بالرياض عشان إذا اشتهيته، ولفتني أن كثير من المشروبات الخاصة من محاصيل محلية. 🍷

بعد القليل من العمل والاستمتاع بالمشروب، قررت أمر السبا، فسألت وحدة من الموظفات عن مكانه لأني بضيع لو قررت أروح من نفسي، وبمشوارنا سولفت معها، قالت حاليًا نقدّم جولة تعريفية بالبجيري والدرعية لسكان الفندق كل يوم جمعة، وننسق لهم رحلات -عند الطلب - لوجهات بالرياض زي حافة العالم. 🌍

سألتها عن مباني الفندق لأنها لفتت انتباهي كيف أنه مب مبنى واحد، قالت مُجملها ثمانية مباني - غير مقصودة - المبنى السادس والسابع مميزين لأنهم مباني قديمة تفوق أعمارهم ميتين سنة، رُمموا بالحفاظ على هويتهم الأصلية، وكل غرفة لها طابعها، ما قدرت أمر أشوفها، لكن لي عودة لها. 🏚️

وإذا رحت ممكن يلفت انتباهك أن المباني مرقمة واحد، اثنين، أربعة، ما فيه ثلاثة! يوم سألتهم قالوا الثالث اكتشفوا فيه آثار تاريخية فوقفنا العمل عليه.🏺

وصلت سبا «نفل الوادي» واستقبلتني الموظفة اللي عطتني جولة تفصيلية، حسيت أن المكان امتداد للفندق بس بنفس الوقت منفصل عنه، يمتد فيه الديكور النجدي بشكل أنيق جدًا وما حسيت أنه مبالغ فيه. ⚜️

 المرافق والخدمات في المكان كثيرة جدًا، غرفة ساونا، جاكوزي، حمام ضباب، حمام بارد، أسرّة وكراسي استرخاء، بلكونة واسعة، وطبعًا أنواع متعددة من المساجات، علاجات البشرة، حمامات الطين وغيرها. 🧖🏽‍♀️

وداخل السبا كذلك فيه نادي مجهّز بأهم الأجهزة، مع شرفة صغيرة لطيفة، والحلو أنك تقدر تنسّق حصة تدريبية مع مدرب أو مدربة يوفرونها لك ضمن حجزك. 🏋🏼‍♀️

احترت وش أختار خدمة، وقلت لهم ودي بخدمة المساج لكن الأنواع كثيرة، فقالوا لي اجلسي مع الأخصائية وتقترح لك. 💆🏻‍♀️

وفعلًا قعدت معي تقريبًا ربع ساعة تشرح كل مساج وش هدفه ومن يحب يسويه وحسيتها فاهمة لأنها سألت عن نمط الحياة والأدوية اللي استخدمها وحالتي الصحية وغيرها، وقدمت لي مشروب السبا الصيفي، «آيسد تي بالعرق سوس»، مع منشفة مبللة بماء بارد وماء ورد.🌸

خلصت جلستي وقررت أتوجه لمجمّع الزلّال مشي لأنه يبعد قرابة 8 دقايق، الجو كان لطيف جدًا وما حسيت بالوقت وأنا أتمشى، وفعلًا كان شعور أني مسافرة طاغي، لما وصلت استوعبت من الزحمة أن ما فيه مجال أتعشى أو أجلس رغم أنه يوم أربعاء، إلا أن المجمّع جميل جدًا وشَرْح، ومكون من كذا طابق ففيه إطلالات حلوة. وأقدر أقول أنه بالليل أحلى من النهار مع تحيّزي للنهار دايمًا، لكن أحلى شيء بالمكان بالنسبة لي أنهم حاطين مسارات ومواقف خاصة للدراجات، فتقدر تستمع بجولتك بوادي حنيفة والدرعية وتجي توقف بالزلال. 🚴🏼‍♀️

ورغم الزحمة لكنه أخف من البجيري، وفيه مجموعة مطاعم ومقاهي مثل «عسيب» و«أولو» و«فيلا فيروز» و«آرتشي». ولقيت كشك اسمه «تُرفة» عندهم آيسكريم بالمستكه والباشن فروت، فقلت هذا عشاي!🍦
وكملت ليلتي بالفندق، التجربة كانت رائعة من جميع النواحي، شعرت فعلًا أني فصلت عن الزحمة والإزعاج وكأني دخلت عالم مُصمم عشان تحس فيه بالاسترخاء والاستمتاع، وأقدر أقول أني بعيد التجربة أكيد. 💯

• الفندق فيه خيارات مطاعم، مطعم «تليد» للشيف مايكل مينا حاصل على نجمة ميشلان ويفتح من 6:30 مساء إلى 11:30، ومطعم «مضيف» فيه فطور وغداء وعشاء. 🍛

• السبا فيه قسم نسائي وقسم رجالي، والنادي فيه قسم نسائي وقسم رجالي. 👸🏻🤴🏻

• المسبح مختلط. 🏊🏻‍♀️

• السبا متاح حتى لغير السكان ولكن يتطلب حجز للخدمة. 📆

• دخول السبا والمرافق مثل النادي، المسبح، وغيرها مجاني للنزلاء فقط، والخدمات بمقابل. 🆓

• السبا والمسبح والنادي تفتح من الساعة 6:00 صباح إلى 10:00 مساء، ولكن حجوزات الخدمات تبدأ من 1:00 الظهر. ⏰

• تبدأ أسعار الفندق من 1871 ريال للغرفة، وتوصل إلى 4910 ريال للجناح، وتختلف الأسعار في منتصف الأسبوع عن الويكند. 💳

• قهوة الفندق مو أفضل شيء، لكن فيه مقهى «هنوفيرين» ملاصق له، والبجيري والزلّال قريب.☕️

• مواقف الزلّال أول 3 ساعات إجباري تدفع 30 ريال حتى لو ما كملت الثلاث ساعات، وبعدها الساعة 10 ريال. 🅿️

• دخول مجمع الزلّال ما يحتاج حجز على عكس البجيري اللي لازم تذكرة عن طريق الموقع. 🎫

وين توجّه بهذا الصيف؟ ☀️

من الشمال للجنوب، ومن سواحل البحر الأحمر لقمم الجبال، كل منطقة لها قصتها وتفاصيلها اللي تستاهل تنشاف.
و كل زيارة ممكن تتحول لرحلة كاملة مع عروض صيف السعودية، وجهات ما جربتها، أكلات ما ذقتها، وأماكن يمكن ما كنت تعرفها أصلاً. وكلها بأسعار أقل من اللي كنت متوقعه.

لوّن صيفك، واحجز الان

بعد بحث، وسؤال أكثر من كذا شخص، وتجربة أكثر من 14 مكان متنوعة بين مطاعم ومشاتل ومتاحف وغيرها، انتقيت هذه الأماكن بناء على هالمعايير:

• تجارب متكاملة تمتّع كافة الحواس. 🪄

• سهولة الوصول للأماكن. 🗺️

• جتني توصية من زميلتي رولا اللي دايم تركض بالدرعية لـ «مشتل التحابي». المكان مو مثل المشاتل الصغيرة المعتادة، واسع جدًا ومناسب للتمشية آخر العصر لأن كثافة الشجر مبردة المكان، عندهم حوالي 15 نوع صبّار، وأشجار كبيرة للبيع، ويوفرون خدمة توصيل للمواقع القريبة للدرعية.🪾🌵 للتواصل: 0558402553. 

• وبما أني عشت شعور السيّاح، وتمشّيت بالطريف لدرجة وصلت خطواتي 14 ألف خطوة، لقيت «متحف الدرعية»، أول ما دخلت أبهرتني عمارته وسط البيت الطيني، المتحف زجاجي حتى في أرضيّاته، وتشوف كيف أنه مبني بدون ما يؤثر على العمارة التاريخية للمكان الأصلي بالعكس، مدموج معها بشكل ذكي وجميل.📜🪞

• خلال زياراتي للدرعية لتحضير العدد، استوقفني «مركز الدرعية لفنون المستقبل» المكان من برا متسق مع طابع الدرعية التقليدي، بس أول ما دخلت حسيت أني سافرت لخط زمني ثاني لأنه مصمم بشكل حديث، حاليًا فيه معرض بعنوان «استمرارية» وتتجدد المعارض فيه دوريًا، وفيه مكتبة تقدر تجلس تشتغل فيها ومرافق كثيرة تخدم الفنانين، هذا غير الورش والإقامات الفنية. 🤖🎨

• في إحدى جولاتي داخل مجمّع الزلّال استوقفني متجر شركة الحرف اليدوية، وتذكّرت أني دخلت فرعهم في السمحانية، لكن الفارق أن متجر السمحانية تشغيلي ومنتجاتهم محدودة، بينما هذا فيه منتجات متنوعة من فنانين سعوديين تتغير بشكل دوري، وعندهم موقع سبق طلبت منه مجوهرات، الجميل أن أسعارهم متفاوتة وكثير منها منطقي كونها صناعة يدوية. 📿🎁

لما رحت في جولتي الاستكشافية للدرعية، كان من أوائل الوجهات على قائمتي «مسجد العفيري» التاريخي، وتعرّفت على شخصيتين مو وحدة. 🕌

المسجد صغير ويقع داخل مزرعة العوّاد وما زال يُصلى فيه، عمره قرابة 300 سنة. فيه قبو يُسمى «خلوة» والدور العادي والسطح المفتوح والمطل على المزارع المحيطة وعلى قصر العوجاء. وبجانبه بئر لا تزال موجودة وفيها تمثيل حكمة لطيفة بخلّيكم تتعرفون عليها إذا زرتوه. 🚰

استقبلنا منصور العوّاد ابن صاحب المزرعة وعطانا جولة تعريفية بالمسجد وتكلّم معنا عن تاريخ الدرعية لما درى أننا مهتمين، وسوى لنا اختبارات سألنا فيها عن أنواع شجر أول مرة نشوفها، منصور شخص مُطّلع على تاريخ الدرعية والسعودية، وحديثه ممتع ونفسه سمحة. ✨

والشخص الثاني هو العم عبدالله العوّاد والد منصور، لقيناه متصدّر مجلس المزرعة اللي مفتوح للزوار وفيه دلّة قهوة تضيّف كل من يمر المسجد، ويجتمع فيه مع عياله وأقاربه يوميًا من سنين. ☕️

العم عبدالله رجل عاش في الدرعية لمدة تسعين سنة تقريبًا، جلسنا نسولف معه ونسأله عن التاريخ والذكريات، وقال لنا من شرينا هالمزرعة ما حطينا عليها باب لأننا نبي نستقبل الناس، ولأن الديرة أمن وأمان، وفعلًا المزارع مفتوحة على بعض وما تحتاج إذن للدخول. 🌴

تلقون العم عبدالله ومنصور يوميًا في المزرعة من العصر لين العشاء تقريبًا، منصور هو اللي بيعطيكم الجولة، والعم عبدالله بيكون موجود كعادته تمرّون تسلمون عليه.