وين تجرّب صناعة الفخار في الرياض؟
تجربة متكاملة لصناعة الفخار في «أوتا» وقصّة مؤسسها عبدالله الصايغ.
أنا شخص عقله ما يوقف، يفكر في ألف شيء في وقت واحد، لدرجة عندي تصور بصري لشكل عقلي كيف يعمل. وطبيعة عملي تحتم علي أضعاف هذا المزيج من الأفكار. 🤫
في الفترة الأخيرة صرت أحاول أجرب تجارب تخليني أفكر في شيء واحد فقط في ذيك اللحظة. جربت أتعلم التزلج، وطحت واجد. غصت في البحر لساعات، وجربت رياضات جديدة عليّ. كلها في سبيل أني أركز في شيء واحد لمدة من الزمن.
لكن كل تجاربي السابقة يبي لها تخطيط مسبق، ومشوار، وأحيانًا سفر. فكنت أتساءل: وين ممكن أجرب تجربة تعطيني هذا الشعور، وتكون قريبة مني وأقدر أقرر فجأة أني أسويها؟ 🤔
قبل فترة، اكتشفت محل «أوتا» وأنا مارّة من شارع هشام بن عبدالملك في حيّ الملك فهد. ولأن واجهة المحل من القزاز، قدرت ألمح بشكل بسيط وش اللي داخله. كانت الجلسات تشبه جلسات المقاهي، لكن الجهة اليسار من المحل واضح أنها مخصصة لبيع المنتجات، وكنت أشوف الناس داخله لابسين مريلة (مئزر)، فخمّنت أن فيه تجارب داخله.
عرفت أنه دار حِرفة أسسها عبدالله الصايغ، متخصصة في بيع الأكواب والأواني الفخارية بطابع سعودي وهوية ثقافية مستوحاة من مناطق السعودية. بدايتهم كانت في 2018، لكنهم كانوا متخصصين وقتها في الاستيراد والتصنيع والبيع. وفي 2024 قرروا يقدمون ورش صناعة الفخار للناس بسبب كثرة الطلب عليها.
لمّا عرفت أن بدايتهم من ثماني سنين، جاني فضول: كيف كان المجال ذاك الوقت؟ ومن وين جت الفكرة؟ وليش هذي الحرفة بالذات؟
عبدالله الصايغ، قبل يبدأ أوتا، كان موظف في البنك وشريك في أحد المقاهي، وكان يلاحظ أن الناس تسأل بشكل متكرر عن الأكواب والأطباق المستخدمة في المقهى؛ لأنها كانت قطع مميزة يستوردونها من حرفيين بشكل خاص لهم.
قرر عبدالله بعدها يستورد هذي القطع ويبيعها للناس، في الفترة اللي زاد فيها اهتمام الناس بركن القهوة في البيوت والمكاتب. وكان حريص على أن تكون القطع مميزة بتصاميم وألوان تشبهنا وتشبه ثقافتنا؛ أكواب بتصميم جذع النخيل، وكوب مقبضه ساعة عنيزة، وفناجين بنقوش نجدية وجنوبية.
بدأ عبد الله بفرع في القصيم، وافتتح فرعه في العلا، وقبل شهرين فتح في الرياض في حي الملك فهد.
وقبل يبدأ يقدم تجارب صناعة الفخار للناس، سافر عشان يجربها في عدة أماكن، وكان عنده هاجس: كيف يبسّط العملية للناس؟ يقول: «ثلاثة أرباع اللي يسوي التجربة غير مهتم أنه يكون حِرفي، هو يبغى يستمتع».
لذلك كان حريص أن مراحل التجربة كلها تصير في زيارة واحدة: التشكيل على العجلة، ثم النحت، ثم التلوين. بعكس الشائع في بعض الأماكن اللي تقدم التجربة في إطار تعليمي قد يكون ممل، وتخليك تنتظر عدة أيام عشان تكملها. 🤷♂️
والمثير للاهتمام أنه قال: «فيه ناس ما تستلم قطعها بعد ما تنتهي من التجربة، ونلاحق وراهم عشان يجون يستلمونها». لأن بالنسبة لهم أخذوا اللي يبونه فعلًا: التجربة داخل المكان.
وعلى طاري المكان، زرته يوم السبت الساعة 8:00 المساء. قررت أجرب هالتجربة معهم وحجزتها من موقعهم الإلكتروني.
وصلت المكان واستقبلتني «إخلاص» ووجهتني لطاولتي. كان المكان هادي ودخلت لطاولتي مباشرة.
لكن الفريق جربوا في يوم ثاني وانتظروا تقريبًا ساعة قبل ما يجي دورهم. ولما سألنا إذا الوضع دايم كذا، قالوا إن أيام الأسبوع عادة أهدأ.
فإذا قررت تروح، خصوصًا في الويكند، الأفضل تفرغ نفسك للتجربة وتروح وأنت رايق وما وراك شيء.
أيضًا يوم زيارة الفريق كان المكان مليان أطفال وعوائل، فخذ بالحسبان أن الأجواء تختلف حسب اليوم والزحمة.
لاحظت أن تقسيم الطاولات يشبه طاولات المقاهي، مو نفس تقسيم أماكن الورش غالبًا. ولما قلت لإخلاص عن هذي النقطة قالت: «حنا متعمدين هذا الشيء، عشان الناس تحس أنها في مقهى بس تسوي شيء ثاني غير أنها تتقهوى».
وكانت سعيدة وهي تسولف لي عن حبها لأوتا، وأن حتى مقابلتها الوظيفية معهم كانت جديدة عليها؛ خلوها تجرب الحرفة معهم قبل المقابلة. وقالت: «كنت مبسوطة لدرجة لو ما قبلوني كان عادي عندي، لأني استمتعت».
وصلتني قهوتي، وهي مقدمة (مجانًا) ضيافة مع التجربة، وأدواتي كانت موجودة على الطاولة.
عطتني إخلاص شرح بسيط عن اللي بنسويه، وهي ثلاث مراحل:
تشكيل القطعة على العجلة.
النحت على القطعة.
التلوين.
بعدها دخلنا على العجلة على طول، وهي المرحلة اللي كنت متحمسة لها! لأنها المرحلة اللي معوّلة عليها أنها بتخليني من شدة التركيز، عقلي يفصل. 😁
عطوني مئزري والقطعة اللي أغطي فيها أكمامي عشان ما تتوسخ من الطين، وجلست في مكاني.
عجبني اهتمامهم بالتفاصيل، حتى حامل الجوال موجود بمكان مناسب عشان اللي مهتم يصوّر نفسه وقت التشكيل.
وكان معي في هذي المرحلة «مبارك».
قبل سنة من اليوم، كان مبارك مقدم قهوة في الفرع، لكن مع الأيام أعجبته الحرفة لدرجة أنه كان يجلس خارج ساعات عمله ويتعلمها، لين حبها وأتقنها وصار يعلمها الناس. واليوم هو مدير التشغيل في فرع الرياض، وأهم حِرفي فيه.
مبارك كان رهيب، يعلمك بدون ما يأخذ منك شعور التجربة الأولى، صبور وبشوش ووسيع صدر. والكل يعرفه بالاسم، فتلقى كل شخص بالمكان يناديه لأي مساعدة أو عون.
يقول عبدالله إنه يعتمد عليه بشكل كبير، ويثق فيه حتى في تسعير القطع. ففي حال كنت تبغى تسوي قطعة خاصة، أو تضيف صحن لكوبك، أو تفاصيل إضافية، مبارك يساعدك فيها.
شكّلت كوبي بعد صولات وجولات من المحاولات، وكانت تجربة ماتعة. شعور أنك تشتغل بيدك في زمن يغلب فيه شعور يدينا على لوحة المفاتيح، شعور فقدناه.
لكن فيه نقطة مهمة عن العجلة تحديدًا: وقتي عليها كان تقريبًا من 15 إلى 20 دقيقة، والتعليم عليها مباشر وسريع نسبيًّا. فإذا كان ودك بتجربة تتركك تحوس على العجلة بنفسك، وتجرب وتغلط لمدة ساعة أو أكثر، فالتجربة مو بالضرورة الخيار الأنسب لك.
تركيز التجربة هنا على أنك تمر بالمراحل كلها في زيارة واحدة أكثر من التعمق في مرحلة العجلة وحدها، لهذا قد تكون التجربة جيدة لك لو تبي تجرّبها بدون تعمّق، لأنهم يساعدونك طول الوقت.
أخذت كوبي وانتقلنا للمرحلة الثانية وهي النحت. كانت فيه خيارات عديدة، وتقدر تطلب منهم عبارة خاصة يطبعونها لك بالليزر على كوبك. والليزر والتلوين ضمن سعر التجربة، فما تحتاج تدفع على كل مرحلة بشكل منفصل.
بعدها بدأت أشكّل التفاصيل الصغيرة اللي ودي أنحتها على كوبي. هذي المرحلة أخذت غالب الوقت؛ أخذت مني أكثر من ساعة ونصف.
لكن الواقع يعتمد على سرعتك وتجربتك. وأنا الصدق أخذت راحتي لأني كنت مستمتعة. وهذا شيء إضافي عجبني بالمكان: الأريحية في الوقت. ما يحدونك بوقت معين تنتهي فيه، فتقدر تأخذ راحتك مع اللي حولك.
لاحظت في الطاولات حولي أصدقاء، وعوائل مع أطفالهم، وأزواج، وكل أحد كان في وتيرته الخاصة.
ريحة البخور في المكان، والقهوة الحارة يجددونها لك كل فترة، والموظفون يشيكون عليك إذا تحتاج مساعدة بين فترة والثانية.
يقول عبدالله الصايغ عن هذي النقطة لما سألته عنها: «حنا شعب يحب الحفاوة، وإذا فيه شيء أكرره على الموظفين دايم هو: احشموا الناس اللي تجي». عشان كذا يهتم أن الموظفين في أوتا يشتغلون لأنهم يحبون الحرفة نفسها. ❤️
انتهيت من كوبي وتلوينه وسلمتهم إياه، والمفترض أستلمه بعد 14 يوم، بعد ما ينتهي من الحرق ويكون جاهز للاستخدام.
والصدق؟ بالنسبة لي طلعت من أوتا وأنا أخذت الشيء اللي جايه أدور عليه من البداية: كم ساعة وأنا مشغولة بشيء واحد قدامي، أشتغل عليه بيدي، وأفكر في القطعة لوحدها بدون ما أفكر في أي شيء ثاني.
للأدب.. كُل الأماكن📍
تحوّل مبادرة «الشريك الأدبي» الأماكن العامة في المدن السعودية إلى مساحات للقاء القراء والحوار حول الأدب؛ قد تذهب للمقهى لاحتساء قهوتك، فتجد الجميع يناقشون رواية 📚
اطّلع على جدول الفعاليات. أو تعرف على المزيد
📍موقع «أوتا» في حي الملك فهد
⏰ ساعات العمل:
طول أيام الأسبوع: 12:30 الظهر إلى 11:00 المساء.
الجمعة: 01:00 الظهر إلى 11:00 المساء.
عندهم ساعات محددة من اليوم للتجارب، والحجز عن طريق موقعهم الإلكتروني.
يبيعون أكواب جاهزة ومجموعات فناجين وقطع فخارية أخرى.
يستقبلون الأطفال بحجوزات خاصة.
سعر التجربة للبالغين: 139 ريال 💵
سعر التجربة للأطفال: 95 ريال 💵
وعندهم خيارات قطع جاهزة تشكلها وتلونها بنفسك، تلقى تفاصيلها في موقعهم.
وعندي نصيحتين لك:
البس شيء ما عندك مشكلة يتوسخ؛ المئزر وأغطية الأكمام موجودة، لكن الطين والغبار ممكن يوصلون لملابسك، فما أنصح يكون وراك طلعة مهمة مباشرة.
قص أظافرك قبل تروح، عشان تكون التجربة أكثر سهولة وإتقان.
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.