بداية السنة في Six Flags 🎢

أحب شعور الروحة للملاهي.
أذكر من كنت أروح مع أمي لملاهي البرجون سابقًا والحكير وستار سيتي.
كمية الحماس، وشعور الألفة العائلية، اللي كان يلفتني من الدنيا... ما أتذكر أحد يصيح رايح للملاهي، الكل سعيد ومتحمس ومبسوط.

هالعدد يتكلم عن وجهة كنت متحمسة أكتشفها، وش ملاهي 6 فلاقز؟ وش بنشوف فيها؟ بنجاوبك عن كل الأسئلة اللي في بالك 🎢

وصلت لفريق دِليلة الدعوات الرسمية لتجربة ملاهي (6 فلاقز: مدينة القديّة) «Six Flags; Qiddiya City» قبل افتتاحها الرسمي، أمس، 31 ديسمبر. وقرّرنا ناخذ فريق معيشة بالكامل، ونروح نجرّب مدينة الألعاب مع بعض. 🕺

بالبداية اللي ما يعرف «6 فلاقز» هي واحدة من أكبر شركات مدن الألعاب في العالم. بدأت من أمريكا، تحديدًا ولاية تكساس من عام 1961 — متخصصة ومعروف عنها الألعاب الحركية والأفعوانات الثقيلة، ومرجع عالمي في الأفعوانيات عالية السرعة، والألعاب اللي تكسر الأرقام القياسية بأنها أكبر أو أطول أو حتى أسرع الأفعوانيات في العالم. وجاء اسمها «الأعلام الستة» من الستة اعلام اللي حكمت ولاية تكساس عبر التاريخ.

وفيها ثلاثة أفعوانيات كسرت أرقام قياسية.

الثلاثاء 9 ديسمبر.
مسكنا خطّنا، ولعلنا ما حسبنا حساب الزحمة والطريق، أخذ مننا تقريبًا ساعة من شمال الرياض عشان نوصل بعد الزحمة، لكن اللي شفع لنا جمال السماء وقتها.

وصلنا هناك حوالي 06:00 المساء. الطريق كان مهيأ وواضح رغم أن القديّة ما زالت تحت الإنشاء. بتشوف المعالم من بعيد، هذا دليل أنك وصلت وأنك بالطريق الصحيح...  🏗️
الموقع بياخذك إلى المواقف مباشرة.

عندك خيارين للوصول للمكان، إمّا بسيارتك الخاصة:
توصل للمواقف، بعدها تمشي مسافة 5 دقايق لين توصل للحافلات اللي توديك من المواقف حتى البوابة مباشرة. مدّة 6 دقايق في الباص. 🚌

أو عن طريق المترو: Ⓜ️
توصل محطة جدة، بتكون فيه حافلات خاصّة توصلك مباشرة من المحطة إلى بوابة المكان. مدتها 40 دقيقة تقريبًا. 

ركبنا الحافلة من المواقف ووصلنا للبوابة، ودخلنا. كان الطاقم «خدمة الضيوف» على يمينك، يساعدونك لو بغيت تشتري تذكرة إضافية، أو تعطي تذكرتك صلاحية «Go fast» اللي بتعطيك الأولوية في الألعاب.

وتقدر تحجز تذاكرك جميعها عن طريق الموقع الخاص فيهم. 
سعر التذاكر: 🎟️

• 325 ريال للبالغين والأطفال من عمر 12 سنة وطالع. 

• 275 ريال للأطفال من 4-11 سنة. 

• وتذكرة «Go fast» الإضافية سعرها 310.

شاملة الدخول، وركوب جميع الألعاب بدون حدود. 🔁

أول شيء بتلاحظه أول ما تدخل جمال جبال طويق في الخلف ⛰️ تداخل منظرها مع الأفعوانيات كان شيء ساحر ولافت ويشبه هوية المكان.❤️

«سيتاديل»

وهي المنطقة الوسطى اللي تتوسّط كل الستة مناطق وتجمع البوابات لكل منطقة، أو زي ما سميناها «السقف البنفسجي»، فيها 4 مطاعم ومقاهي، و5 محلّات هدايا وتذكارات. وتقدر تعتبرها محطة الإستراحة بين منطقة ومنطقة، ارجع لها، وبدّل بين المناطق.. 🕺

 «ديسكفري سبرينقز» 

• فيها 6 ألعاب. 🎢

• 3 مطاعم. 🍲

• محلين تسوق: تذكارات - صور - هدايا. 🛍️ 

تعتبر منطقة مائية. 🌊
فيها العاب مثل «بيق سبلاش» و «زوما فلوما» مناسبة للعوائل وبعضها تناسب الأطفال. هذي المنطقة تحديدًا استكشفناها من بعيد لبعيد، لأن ما بنلعب ألعاب مائية في هذا الجو البارد. 🥶

في كل منطقة فيه شاشة إرشادية كبيرة. توضح لك المنطقة وأيش بتلقى فيها، ووين تلقاه.
طل عليها في كل منطقة، بتختصر عليك كثير. ✅

منها انطلقنا لأكثر منطقة كنّا فضوليين تجاهها، كنا نشوفها من بعيد، ونسأل الموظفين، «كيف نروح لها؟» وبعدما وجّهونا، وصلنا لغايتنا؛ أفعوانية «راتلر» في منطقة.. 

«ستيم تاون»

• فيها 5 ألعاب - واحدة منهم محطة أرقام قياسية. 🎢

• 6 مطاعم. 🍲

• 5 محلات تسوق: تذكارات - صور - هدايا. 🛍️ 

أفعوانية «راتلر»، كانت أكثر شيء متحمسين له؛ فهي أسرع وأطول أفعوانية مائلة في العالم!
بعدما قال لنا الموظف اقرؤوا التحذيرات، صارت التحذيرات تخّوف أكثر، فقررنا ندخل بدون ما نفكر مرتين. 😝

عطينا أغراضنا للمتخوّفين من فريق دليلة، اللي ما رضوا يجربون، لأن خايفين على حياتهم. لكن تقدر تحط أغراضك في الخزائن الخاصة... قدام كل لعبة فيه منطقة خزائن مجانية تقدر تحفظ فيها أغراضك، لين تخلّص من اللعبة.🗄️

انتظرنا في الصف أربعين دقيقة تقريبًا، لكن ما حسينا بالوقت، كان فيه شاشات عرض تعرض لك الفكرة من اللعبة بأسلوب ظريف وممتع، وثيمة المكان كشركة تعدين تخلّي الوقت يمشي وأنت تتأمل التفاصيل. ⛏️ 

كانت تجربة غير طبيعية! أفعوانية تبدأ بشكل طبيعي لين توصلك أعلى قمّة، بتشوف منها المنظر خلّاب للمدينة كاملة من الأعلى، بعدها بكل بطء تغيّر اتجاهها وتميل من الأمام إلى الأسفل. ⬇️
وبسرعة 118 كم في ساعة بتنطلق فيك يمين ويسار وتتشقلب عدّة مرات لين توصل خط النهاية.🚀

تجربة بتحبس نفسك، وبتخلي صوتك يبح من الصراخ. راحت أصواتنا بعد هذي اللعبة.
تعتبر ثاني أسرع أفعوانية في 6 فلاقز مدينة القدية — فيه اللي أسرع منها بعد! وبقولك عنها بعد شوي.

المنطقة فيها 4 ألعاب ثانية، أثنين منها مناسبة للأطفال. 

«توايلايت قاردن» 

• فيها 4 ألعاب. 🎢

• 4 مطاعم؟ 🍲

• 3 محلات تسوق: تذكارات - صور - هدايا. 🛍️

بعد ضخ الأدرينالين اللي صار في «راتلر»، بتحتاج منطقة هادية، مريحة للعين والسمع. هذي المنطقة بتكون خيار مناسب.

كأنها واحدة من الأفلام السحرية وأفلام حوريات البحر. 🧜‍♀️
نوع الإضاءة وشكل الألعاب مناسبة للأطفال والعوائل أكثر. 

«فالي اوف فورتشن» 

• فيها 4 ألعاب. 🎢

• 4 مطاعم. 🍲

• 3 محلات تسوق: تذكارات - صور - هدايا. 🛍️ 

فيها ثاني أفعوانية في 6 فلاقز ؛ «سبتفاير»، طول مسارها 582 متر وكسرت رقم قياسي في فئتها تحديدًا «الأفعوانيات الدوّارة»، وهي أسرع وأعلى أفعوانية دوارة بالعالم! 🥇

وفيها «سكاي واتش» وهي خيمة طائرة كأنها منطاد، ترتفع ببطئ وتعطيك منظر خلّاب للمدينة كاملة من أعلى.

مثل كل منطقة، فيها مطاعمها الخاصة، ومحلّات بيع الهدايا والتذكارات. كل منطقة لها محلّات خاصة فيها، تبيع تذكارات بثيمة المنطقة نفسها، وفيه محل خاص بثيمة 6 فلاقز بالكامل.

«قراند إكسبو»

• فيها 5 ألعاب. 🎢

• 4 مطاعم. 🍲

• 3 محلات تسوق: تذكارات - صور - هدايا. 🛍️ 

هذي المنطقة فيها واحدة من الألعاب المميزة في 6 فلاقز وهي «جيروسبين» : أرجوحة عملاقة تتأرجح بإرتفاع 53 متر.

وجربنا فيها «طيّار الأكسبو» اللعبة الأخيرة اللي لعبناها. تشجّعنا نلعبها بعدما شفنا إن كل اللي راكبينها أشخاص بالغين. 😂

بعدما خلصنا آخر لعبة في هذي المنطقة، انهد حيلنا شوي، وجعنا.. 
ولقينا مطعم عنده «فيش أند تشبس» عليه الكلام! 😋
يجيك سمك وبطاطس مقلي.

طلبنا معه دجاج مقلي، وكان عادي الصراحة، لكن أوصّيك على الفيش اند تشبس، بتدعي لي. 🐠🥔

«سيتي أوف ثريل» 

• فيها 4 ألعاب. 🎢

• مطعمين 🍲

• 3 محلات تسوق:تذكارات - صور - هدايا. 🛍️ 

ومن اسمها، منطقة مثيرة، فيها أهم وأكبر لعبة في المكان! بتشوف مسارها حواليك وأنت تمشي في المكان. صحيح أن على حظنا كانت مقفلة، لكن قطعًا برجع لها مرة ثانية بس عشان أركب هذي الأفعوانية.

أفعوانية «فالكون فلايت»: أطول وأسرع أفعوانية بالعالم. طول مسارها 4,325 متر.
وسرعتها 250 كم/ساعة — تقارب سرعة سيارات فورميلا 1! 🏎️

المنطقة فيها ألعاب مميزة مثل «برج سيروكو»، وأفعوانية «الأدرينا-لاين».

بعد ما انتهت جولتنا وطلعنا، صورنا صورة جماعية.🤣 حط في بالك أنك بتصور الناس بعدك. تجربة سياح لكن حلوة... أنصح.

التجربة بشكل عام:

• خيار رهيب تبدأ فيه السنة بكسر مخاوفك. 😉

• ميزة الملاهي أنها تجربة تنفع جميع الفئات العمرية، والأهم أنك ما تكون لحالك.

• المكان كبير ويبي له مشي، واستكشاف، أوصّيك تفضّي له يوم كامل، عشان تستمتع وتلحّق تشوف كل شيء.

• مهم تلبس جزمة مريحة ومناسبة.👟

• موفرين منطقة تأجير عربات للأطفال. 👦🏻👧🏻

ساعات العمل: ⏰

• الأحد - الأربعاء : 04:00 المساء إلى 12:00 الليل.

• الخميس - السبت : 04:00 المساء إلى 01:00 الليل.

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.