يوقا نهاية السنة 🧘

مع نهاية سنة حافلة بالإنجازات والركض يمين ويسار، ما يبيلها إلا التليّن، وفكفكة المسامير اللي تربّطت هالسنة. 🔩🤣

فقررت خلال الثلاثة أسابيع الماضية أسوي رحلة تجارب لليوقا بأنواعها المختلفة، وكانت رفيقة الرحلة أخصائية العلاج الطبيعي ومدرّبة اليوقا وصايف الحناكي لتقييمها.

كان في قائمتنا أكثر من 10 استديوهات، عكسنا تجربة خمسة استديوهات مميزة! وجبنا لك توصيات لأدوات اليوقا🤸🏻‍♀️

عشان أبدأ هذي التجارب قلت لازم يكون معي أحد مختص، يقيّم معي الاستديوهات بعين متخصصة بالمجال، فقرَّرت آخذ وصايف الحناكي معي. وصايف مدرّبة يوقا من 2018، وهي شغوفة بالمجال هذا من مدّة طويلة؛ تدرّب وتعطي حصص خاصة. 

دخولها لعالم اليوقا كان بالصدفة. تعرّض أخوها لحادث سيارة، وبعدما كانت تحضر معه حصص علاجه الطبيعي. قرّرت تتخصَّص بالعلاج الطبيعي بالجامعة. وفي آخر السنوات، بدأت عندها نوبات الهلع، وبوادر قلق وتوتّر، فقرّرت تجرب حصة يوقا. وكان عكس اللي توقعته أنها عبارة عن تنفس وتأمل فقط. تقول كانت كثير من الوضعيات اللي نسويها في اليوقا هي وضعيات درستها في تخصصي، ونسويها للمرضى! وآمنت بعدها أن اليوقا مو بس تتأمل وتتنفس، هذا جزء منه فقط، إنما هو عالم أكبر بكثير.

بعدها بدأت مشروعها الخاص «بوب اب اكسبيرينس»، يسوون تجارب يوقا مختلفة في عدّة أماكن، ويدمجون معها فعاليات مختلفة، مثل يوقا داخل قبّة الفراشات، ويوقا بعد جولة سياكل، وغيرها. 🧘‍♀️

مالكم بالطويلة، أخذت وصايف معي، وبدأت جولتنا الاستكشافية حول استوديوهات اليوقا في الرياض، كان على وصايف تقييم المدربة، وعليّ تقييم المكان. وكثير من المرات بغينا ننقفط بسبب خبرة وصايف ومعرفتها للوضعيات بشكل سريع. 😁

اخترنا من عشرة استديوهات خمسة نجربهم بمعايير معينة، اللي هي: 

• نظافة وشمولية المرافق والأدوات الخاصة. 🫧

• حرص وشطارة المدربات. 🧘‍♀️

• سهولة الحجز والتواصل. 📆📞

• التفاصيل الصغيرة مثل صوت الموسيقا، وسعة وجمالية المكان ومدى كونه شرح. ☀️

استديو منتي

📍حيّ النخيل - 11:00 الصباح.
نوع اليوقا : «هاثا فنياسا» مع المدربة راما.
سعر الحصّة : 175 ريال. 💵

المكان عبارة عن استديو، في الدور الثاني من عمارة. بتشوفين فيها اسم الاستديو من برى، توصلين لها من الخلف بمدخل من عند المواقف.

كانت التجربة الأفضل من بين كل التجارب. من البداية أول ما تدخلين، المكان شرح ورائحته مريحة – وأركّز على الرائحة لأن لاحظت كثير من الاستديوهات يبالغون بالروائح العطرية لدرجة تصير مزعجة أحيانًا. 😖

المكان ملموم، وبنفس الوقت شَرح. رشّحت وصايف هذي التجربة من البداية لحبها للمكان وشراحته، ولثقتها في مؤسسة المكان وصاحبته، شيخة، وهي طبيبة ومدربة يوقا، وتحرص على اختيار المدربات في الاستديو بنفسها... وبعناية.

الشمس تدخل على المكان من كل جهة، والنباتات كلها طبيعية. تحجزين عن طريق تطبيقهم الخاص. التطبيق سهل استخدامه، ويوضّح كل حصة كم مدتها وسعرها والمدربة ووصف للحصة.

عجبني أنهم يحرّصون على أن الحضور يكون قبل الحصة بعشر دقايق. بهذا الوقت المدربة تشرح لك أكثر عن الحصة، وتسمع منك عن جسمك وطبيعة مرونته، وأيش اللي في بالك من هذي الحصة. وتكمّل حسب طبيعة جسمك ومزاجك اليوم.❤️

مستوى الموسيقا كان مناسب.
وأقول هذا الكلام لأن هذا من الأسباب اللي خلتنا نستبعد استديو معين.❌
مستوى صوت الموسيقا كان يعلو وينخفض بنص الحصة فكان يأثر على التركيز. فهذي معايير عرفنا أهميتها بعد ما جبرنا عدّة أماكن.

الحصة اللي أخذناها تجمع ما بين يوقا الهاثا والفنياسا. وتقول وصايف: «الأولى تركّز على المرونة والبطء والوضعيات الأساسية لليوقا مع التنفس. والثانية وتيرتها أسرع شوي، وفيها كارديو خفيف ونشاط رياضي ومقاومة أكثر.» 

كانت المدربة حريصة، وتتأكد من الوضعية في كل تمرين، وما تنسى تذكرك تتنفس مع كل حركة.🥇

يوفرون لك مياة مجانية، ومناديل مبلّلة، وشاي بأنواع مختلفة. وفيه خزائن خاصة تقدر تحط فيها أغراضك. والمرافق كانت شاملة ونظيفة.

والحلو بعد أنهم يبيعون أدوات اليوقا، لكن بخليها لك في التوصيات. 😉

العمارة اللي فيها الاستديو فيها مواقف. 🚗
وأقرب محطّة مترو : محطة واحة الملك سلمان. Ⓜ️

بعدها جربنا تجربتين لليوقا الهوائية في مكانين مختلفين، والحقيقة ما كنّا ناوين نجرّبها مرتين.. لكن أُلغي حجز حصّة كنا حاجزينها لـ«اشتانقا يوقا»، فاضطرينا ناخذ كلاس يوقا هوائية مرتين. 🤷🏻‍♀️

واليوقا الهوائية هي نوع من أنواع اليوقا اللي تستخدم فيها قطعة قماشية أشبه بالأرجوحة «الهامك» معلّقة بالسقف، كنوع من الدعم. تساعدك تسوين الوضعيات وأنتِ مرفوعة جزئيًّا عن الأرض وتخفف ضغط على المفاصل. وتحسسك أنك تطيرين. 🤣

بيور يوقا

📍حيّ الملقا - 11:00 الصباح.
نوع اليوقا : يوقا هوائية مع المدربة لينا.
سعر الحصة : 201 ريال. 💵

أول انطباع أخذته عن المكان هو ردهم السريع. كان في غلط في حجزنا، وتواصلت معهم قبل ساعات دوامهم الرسمية، وبسرعة ردوا، وعدلوا لي الحجز بكل سلاسة وبساطة. ☑️

الاستديو في مجمع حوله وحوالينه مطاعم ومقاهي. نصيحة على الطاير لا يغرّك وتتقهوين أو تاكلين قبل الحصة بساعتين إلى ثلاث ساعات، عشان الشقلبات ما تجيب فيك العيد. 🏃🏻‍♀️

وصلت المكان، ووصلت بعدي وصايف. أول شيء بتلاحظينه إذا دخلتِ هو الجزء الخارجي من الاستديو المخصص للحصص الخارجية؛ شَرح خصوصًا مع الأجواء هذي اليومين.

وأول تعليق قلناه لبعض كان عن جمال ووضوح الجو الخارجي في المكان. 🌥️

بتستقبلك موظفة الإستقبال وتتأكد من حجزك، بعدها توجهك للمكان الخاص لعبايتك وأغراضك. ما عندهم خزائن خاصة، ولا غرف تبديل ملابس.

بدأنا الحصة في وقتها مع المدربة لينا، كانت حصة تمطيط وعلى كلامها، المفروض نطلع من الحصة وطولنا زايد 2 سم. 🤣

كنا تقريبا 11 متدربة. ورغم هذا قدرت المدربة توازن بين جميع الموجودين. وتقول وصايف «السيطرة والتركيز على هذا العدد من الأشخاص في اليوقا الهوائية يعتبر تحديّ! وهي شخصيًّا ما تاخذ هذا العدد إذا بتعطي حصة يوقا هوائية. وكانت المدربة جدًّا ممتازة في هذي النقطة.»

الجميل أنهم وقت الحجز يوضحون لك شدّة الحصة: منخفضة الشدّة - متوسطة الشدّة - عالية الشدّة.

انتهت الحصة والجميع يضحك من الأدرنالين، بعدما تشقلبنا ونزل الدم لروسنا لمدّة خمس دقايق متواصلة. 🤸🏻‍♀️

في النهاية جلسنا بصمت داخل «الهامك»، ومسحت على معصم كل واحدة مننا زيت الخزامى، يساعدك على الاسترخاء.🪻

نهاية الحصة يوفرون لك مناديل مبللة، ومياة مجانية. 

فرع الملقا فقط فيه استديو «بيلاتيس»، تقدرين تحجزين الحصة عن طريق التطبيق.
عندهم ثلاث فروع: الملقا - غرناطة - المحمدية.📍

فيه مواقف أمامية لنفس المجمع. 🚗
أقرب محطة مترو: محطة د. سليمان الحبيب. Ⓜ️

استديو ايكسهيل 

📍حيّ السفارات - 03:00 العصر.
نوع اليوقا : يوقا هوائية مع المدربة أمجاد.
سعر الحصة : 170 ريال. 💵

كانت تجربتنا الثانية لليوقا الهوائية. كنّا نبي نجرب «الاشتانقا يوقا» مع لولو حجازي، أفضل مدربة تقدم هذا النوع على شهادة وصايف. لكن أُلغيت الحصة بآخر لحظة.

إذا وصلتِ ساحة الكندي، بيكون فيه حولك مطاعم ومقاهي، وأعيد عليك التوصية السابقة: القهوة والأكل بعد الحصة. 😜
بعد مشي ثلاث إلى خمس دقايق بتوصلين المكان.

الحجز كان عن طريق التطبيق. الغريب أن التطبيق ما كان يوضح أسعار الحصص، فيه حصص يذكر أسعارها وحصص لا. 🤔

الدفع يكون في الاستديو قبل بداية الحصّة. وعندهم يوقا وبيلاتيس وحصص خاصة. 
يطلبون منك بالبداية تحطين أحذيتك في المكان المخصص، لأن ممنوع تمشين فيها في المكان. وفيه منطقة للخزائن ودورات مياة مجهزة ونظيفة.

تأخرت الحصة ربع ساعة، لكن يتصلون عليك قبلها في حال كان فيه تأخير أو تعديل في وقت الحصة.
بدأت الحصة وكان عددنا صغير مقارنة بالحصة في بيور استديو؛ كنا فقط ثلاثة أشخاص، فبالنسبة لي كانت أمتع بكثير.🥇

قدرت المدربة تركّز بشكل أكبر على كل وحدة مننا، فقدرنا نرفع المستوى شويّ.

كانت التجربة رائعة أقيّمها أفضل من الأولى. المرايات كانت على الجهتين، ففيه مجال تتأكدين من وضعيتك بشكل أكبر. والمدربة أمجاد كانت شاطرة. تركّز على كل وحدة وين مناطق القوة في جسمها، وتعطيها وضعية تناسبها، وتتحداها، وتركز على أنك تستمتعين أهم من أي شيء. 🧘‍♀️

بعد الحصة في منطقة الانتظار يقدمون لك قهوة ومويا ومكسرات وتمر محشي يسوونه بنفسهم ويحشون بعضها قطع بروتين بار. 😋

الساحة فيها مواقف أرضية. 🚗
وأقرب محطة مترو للسفارات: محطة جامعة الملك سعود. Ⓜ️

كياني 

📍حيّ السفارات - 02:00 العصر.
نوع اليوقا: يوقا فلو.
سعر الحصة: 145 ريال. 💵

التجربة في كياني كانت مختلفة شوي، لأنك بالبداية بتدخلين المحل الخاص فيهم. بتلقين عندهم خيارات ملابس رياضية، مو بس لليوقا، عندهم ملابس للركض والتسلق وحتى للسفر.

الاستديو عندك خيارين توصلين له، إما من الباب الرئيسي للمحل، أو من المواقف مباشرة عن طريق المصعد يوصلك مباشرة للداخل. 🚀

حجزت عندهم حصة يوقا فلو «Yoga Flow» عن طريق التطبيق. وهي حصة «ين يوقا» اللي تركز على التنفس بشكل كبير، مع حركات بطيئة جدًّا، ونثبت على وضعية معينة مع النَفس لمدة دقيقة الى ثلاثة دقائق لكل وضعية.

إذا وصلت بيوجهونك تروح جهة الممر الأزرق اللي يوصلك للاستديو. 🌀

عندهم خزائن خاصة، وغرف تبديل ملابس نظيفة ومجهزة بالكامل بمجففات شعر. 💆🏻‍♀️

بدأنا الحصة وكنا ثلاثة أشخاص فقط. صارحتنا المدربة أنها بتغير توجّه الحصة حسب استجابتنا معها. وقالت: «حنا بالعادة نحط الحصة "يوقا فلو"، بعدها حسب مستوى الموجودين نقرّر مدى شدّة وحدّة الحصة، بحيث تتناسب مع الجو العام لمزاج الاشخاص وقدرتهم.»

ولأننا كنا في الصباح، وبأوج طاقتنا، قدرنا ننتقل لوضعيات أعلى شدّة، وتمددنا وتمطّطنا من قلب. 🤸🏻‍♀️

فيه شاشة بالخلف وبالسقف، فيها مشاهد حيّة لجبال، وبحر تتماشى مع الموسيقا الموجودة.
شخصيًّا أفضّل الشمس الحقيقية. لكن أعتقد مناسبة لو تبي حصة مسائية استرخائية. 🌌

إذا خلصت حصتك، عندهم منطقة جلوس وعمل في نهاية المحل، يقدمون شطائر وسلطات وعصائر طازجة وصحيّة. تقدرين تاكلين وجبتك من عندهم وتكمّلين شغلك. 🥗

فيه مواقف أرضية. 🚗
وأقرب محطة مترو للسفارات : محطة جامعة الملك سعود. Ⓜ️

التجارب عمومًا:

• أشعر أن جزء كبير مني تفكّك، وكنت فعلًا أحتاج هذا المستوى من الاسترخاء والتركيز على كل عضلة وكل نَفس، بعيدًا عن الأفكار والضوضاء المحيطة.😁 

• لاحظت أني صرت أركز بطريقة تنفسي أكثر من السابق، وخف عندي جزء كبير من الضغط على الأكتاف الناتج عن ضغوط الحياة العملية. 👩‍💻

• أنصح تجربين أنواع اليوقا وتستمرين بالنوع اللي يتناسب معك ويناسب سبب رغبتك بممارستها؛ هل تبين مرونة عالية؟ أو مجرد تصفية ذهن؟ أو ودّك تستمتعين وتتمرجحين وبنفس الوقت ترفعين مرونتك؟ فحسب رغبتك بتلقين الخيار المناسب لك. 🧘‍♀️
  شخصيًّا، حجزت حصص يوقا هوائية لثلاثة شهور قدام، استعدادًا للسنة الجديدة. بتغدى عليها قبل تتعشى علي. 🤣

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

اليوقا رياضة مناسبة حتى تسويها في بيتك، مو بس في الاستديوهات.
ومن هالمنطلق، لو ودّك تمارسها في بيتك، أو حتى تبي تكون أدواتك الشخصية معك.

جمعنا لك توصيات من وصايف الحناكي، متاجر إلكترونية ومحلّات 👝 

وحرصنا أنها تكون :

• مجربّة وموثوقة. ☑️

• عندهم خيارات متعددة.

• نوّعنا لك ما بين محلّات ومواقع إلكترونية.

محل (No Added Sugar)

علامة سعودية، متخصصين بالأدوات الخاصة باليوقا والبيلاتيس.

• عندهم خيارات متنوّعة ما بين أغطية عيون وكمّادات رقبة وأكتاف، بتصاميم محليّة جميلة مثل النخل وغيرها. 🌴

• يوفرون أنواع شاي مختلفة، مثل شاي الأعشاب وشاي بنكهات مختلفة وماتشا وأدوات تحضيرها. 🍵

• ساعات العمل: من 08:00 الصباح حتى 07:00 المساء. والجمعة مغلق. ⏰

محل كياني

موجود في نفس استديو كياني في السفارات، يبيعون معدّات اليوقا بالكامل من ملابس وسجاد اليوقا وقوارير مويا رياضية. 💧

• يوفرون خيارات مناسبة للإهداء. 🎁

• ساعات العمل: يوميًا من 10:00 إلى 11:00 المساء. ⏰

منتي استديو
في نفس الاستديو يبيعون معدّات اليوقا اللي تحتاجها في أي حصة يوقا، وهي إصدارات خاصة فيهم. 

• عندهم شرّابات، وسجاد اليوقا، وأغطية عيون بريحة الخزامى، ووسادة اليوقا.🪻

• المنتجات اللي يبيعونها هي نفسها اللي يستخدمونها في حصصهم، مو موجودة أونلاين، بتلقاها في الفرع عندهم فقط.☝🏻

• ساعات عملهم متغيّرة، تقدر تأكد منها قبل تروح. ⏰

متجر تمدد🤸🏻‍♀️
متجر إلكتروني لعلامة سعودية متخصصة بسجاد اليوقا والشنط (القماشية تحديدًا)، بتصاميم جميلة.

متجر سعودي يوقا

متخصصين بسجاد اليوقا بتصاميم محليّة، مثل القط العسيري وروضة خريم بلون الخزامى وغيرها.🪻