كشتة في الجيوبارك شمال الرياض ⛰️

الأسابيع الماضية كانت حافلة بالروحات والجيّات وضغوطات العمل بحكم نهاية السنة.
فقلت ما لها إلا مكان صاد وهادي، لكن في نفس الوقت لازم يكون قريب من الخدمات، حتى أصفصف فيه أفكاري وأعيد تهيئة نفسي.
ومن هنا وصلنا للجيوبارك في شمال الرياض، وتركنا لكم توصيات على أماكن متنوّعة ما بين مغارات رياض وشعبان ونفود.

بالبداية كنت محتار بين عدّة وجهات، فقررت أستكشف الوجهات قبل أختار مكان التجربة. جرّبت هالمكان مرة ومرتين وثلاث. ورحت له رابعة عشان أصوره في سلسلة وين نكشت. ووقت وصول هالعدد عندك، بكون رايح أوثق هالمكان للحلقة الجديدة. 

كانت معاييري لمكان الكشتة:

• سعة المكان والتنوّع الجغرافي فيه. ⛰️🏜️

• سهولة الوصول له، بسيارة دفع رباعي أو عادية. 🚗

• تنوّع الفعاليات اللي ممكن تقضيها فيه، من كشتة ومبيت ومسار مشي واستكشاف. 🧗

جيوبارك شمال الرياض🪨

أكبر منتزه جيولوجي في شمال الرياض! ⛰️

ولما نقول منتزه جيولوجي -بحسب معايير اليونيسكو- فهذا يعني أنه منطقة محمية ذات أهمية جيولوجية دولية؛ فيها صخور وتضاريس تدمج بين الحفاظ على البيئة والتنمية المستدامة.
تمتد مساحة جيوبارك شمال الرياض 3,221 كم مربع. ويبعد حوالي 150 كم من وسط الرياض. ويقع في منطقة ثادق تحديدًا.📍

من توافيق ربي إني لقيت أحد المسؤولين في مركز المنتزه، وهو الأستاذ عبدالله العيسى، وتواصلت معه وكان ينتظرنا عشان يعرّفنا ويأخذ فينا جولة.

أول ما تدخل بوابة ثادق بيشدك منظر الغطاء النباتي من الأشجار المتنوّعة والممتدة على كامل شعيب عبيثران من الجنوب الشرقي إلى السد، شرق ثادق.

وبيلفت نظرك المضافات في الشعيب، والغرف المبنية داخل الجبال وكأنها مجلس جبلي!
بإطلالات جميلة، وهي موزعة على يمين وشمال الطريق العام. 🌄

في الجيوبارك، 14 مضاف و 20 مغارة — والمضاف عبارة عن غرف مبنية من الحجر أو تكون محفورة بالجبال مثل مضاف الطلح.
أما المغارات، فهي تجويفات طبيعية في الجبال، وفيه مغارات  تستحمل 20 سيارة تكون بداخلها مثل غار قارة مريحة. 🚗

قابلنا الأستاذ عبدالله، وأعطانا فكرة عن المنتزه. كنت سعيد لمثل هذي المشاريع، لأننا نحتاج مكان طبيعي يجمع كل هالتنوع، وغبطته على كل شجرة ساهم بزراعتها.🌳❤️

التنوع البيئي والجيولوجي في المكان يخليك تحتار وش تختار ما بين المغارات والنفود والشعبان عشان تكشت وتبيت فيه.🤔

ممكن يصعب عليك تحديد وجهة كشتتك الجاية. لكن توصيتي كل مرة حدِّد لنفسك قسم من المنتزه، تستكشفها وتاخذ وقتك في قراءة الخريطة وفحص تكوينات المكان، بعدها استكشفها ميدانيًّا.

لقينا شعيب عبيثران ومملحة القصب ونفود عريق رغبة وعريق البلدان. — و «عريق» هو تصغير عِرق من النفود. وفيه تنوّع في طبيعته. ففيه النفود والأرض المنبسطة والجبلية والشعبان. في موقعهم الإلكتروني حاطين خريطة تفاعلية فيها شرح أدق عن طبيعة المكان، لازم تقراها لو ودّك تعرف كل المواقع:

لاحظت إنك كلما اتجهت شرق وجنوب تزداد الوعورة، وكلما اتجهت شمال وغرب بتحصل انحدار واتساع في الأرض.

وهنا كان الرفيق، رياض الغامدي على اليمين، والأستاذ عبدالله العيسى. بعدما أخذنا جولة سريعة لبعض الأماكن القريبة، ودَّعت صاحبي، واخترت أبات في شعيب عبيثران وأسمتمع بأشجاره وطبيعته. وكانت ليلة هادية، أهيئ فيها نفسي لمغامرة بكرة؛ وهي صعود قمة جبل خشم الحصان اللي يقع ضمن نطاق الجيوبارك. 🧗

بعد المنظر الساحر من داخل الخيمة، جهّزت لي وجبة شهية يتعذّر عليّ تصويرها... وبدون إحراجات. 🤣

رتبت أغراضي وودعت أشجاري، وانطلقت لجبل خشم الحصان. 💪🏻

استقبلت جبل خشم الحصان اللي ما يبعد إلا دقائق عن مكاني. وصلت وكان هذا المشهد اللي شفته:

أشجار متباعدة وطرييق مردوم، ممكن تمشي عليه جميع السيارات إلى أسفل الجبل.

كنت عارف أن فيه مسار للمشي، لكن ما عندي أي تفاصيل عنه. ولذلك رحت له حتى أجربه بنفسي. أول شيء وقّفت سيارتي، وقرأت اللوحات الإرشادية عشان أقدّر مدى الجهد اللي أحتاج أبذله، وكمية الماء اللي ممكن أحتاجها.

ومن الإحسان أن فيه بوابة لهذا المعلم باسمه، بتشوف لافتة على الطريق العام.

شغلت ساعتي عشان أحسب المسافة بالضبط والوقت اللي أخذته وانطلقنا بسم الله. 

أول ما تبدأ، تلف يسار، وتمشي على مسار بشكل حذوة الحصان إلى أعلى قمَّة الجبل. وفيه ثلاثة أماكن تحتاج منك صعود مدرَّجات: 

•  البداية. 

•  المنتصف.  

• وعند القمة.

وتقديري إنه يحتاج لياقه متوسطة، ومطّارة موية 600 مل بالحد الأدنى. الطريق مع كل خطوة يدهشك بهدوئه وجماله. والمشهد جميل من القمة. 

رجعت وساعتي عطتني الوقت اللي قضيته والمسافة بعد. وأنوّه أني كنت أمشي مشي سريع. فممكن يأخذ منك المسار 3 ساعات إذا حبيت توقّف للتصوير والأكل. 📷

فيه مشاعر خاصة للمشي في الجبال بين الهدوء والسكينة وتحدي النفس؛ فيها شيء من التهذيب والتربية. والصدق أني كنت محتاج  هذي الجرعة من الهدوء مع نهاية السنة والهواجيس اللي تجي معها، وكان شعور الهدوء هو المكافأة بعد ما انتهيت.❤️

قرّرت بعدها أودّع هذا المنتزه الجيولوجي الجميل وأنا أتابع لحظات الغروب الفاتنة في جهته الشمالية الغربية عند نفود رغبة بالتحديد. كانت لحظات صمت وتغذية بصرية.

التجربة بشكل عام

الجيوبارك واسعة ومساحة للاستكشاف. فيها خيارات مِكشات، ومناطق مبيت أكثر. أزعم أن المكان سيكون ملجأ لأهل الرياض بعد سنوات قريبة، وأترقّب اليوم اللي بشوف فيه المنتزه مليان بنباتات متنوعة من أصل المكان.

• أوصيك إنك تمشي عشان تشوف الغروب أو الشروق، بتكون تجربة رهيبة. 🌅

•  فيه بعض المرجان المتحجّر وغيرها موجودة على المسار. 

•  على طريقك، وأنت رايح الجيوبارك، فيه محل مقطع وتوابل. على ضمانتي بيساعدة لتجهيز كشتتك في الجيوبارك. موقعه في ثادق. صدمني لما لقيت عنده أنواع متعدّدة من محاصيل القهوة المختصة والشواهي، وحتى منتجات أفران الحطب موجودة. اللحم لؤطة. 💯 جربنا من عنده الحمام وأوصال لحم الغنم، شيء نظيف وطازج.

• تقدر توصل للمنطقة من خلال سيارات الدفع الرباعي والسيارة العادية، بس لازم تكون حذر. ☝🏻

• الأستاذ عبدالله العيسى مرحِّب باستقبالك بمركز الزوّار، ممكن ياخذ فيك جولة بالآثار والنباتات والحيوانات الموجودة ــــ رقم تواصل مع الاستاذ عبدالله العيسى: 0500112927 📞

• مراكز الخدمة سبعة، وهي عبارة عن مساجد للرجال والنساء بحماماتها وصالات للضيوف وأماكن تعبئة مياه للمتنزهين.🚰

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

توصياتنا استعنّا فيها بفريق «وين نكشت؟» وطيور البر اللي من الفريق عشان نجهزها لك.🦅 

جبنا لك توصيات وركزنا تكون:

•  أماكن يسهل الوصول لها.📍

• مجرّبة من طيور بر، ويوصون فيها.🥇

• تنوع الخيارات ما بين مغارات ومطلّات ونفود وروضات. ⛰️

مغارة قطّار الشعبة

• في حريملاء، وتبعد 95 كم تقريبًا عن وسط الرياض.📍

• تبعد ساعة وربع تقريبًا. 🛣️

• قريبة من الشارع بمسافة 3 كم تقريبًا، جميلة وتتوسط مدخلها شجرة كبيرة ملفته من بعيد. 🌳

• ميزة المغارة صادة، وتعطيك شعور العزلة اللي تبيه. 

• عيبها سوء الشبكة داخلها، بتحتاج تطلع يمين ويسار حتى تحصل شبكة. 🛜

• ما تاخذ أشخاص كثيرين، مجموعة واحدة فقط. فلو جيت ولقيت أحد، غالبًا بتمشي. 

• سهل الوصول لها وما تحتاج تنسيم كفرات أو سيارة دفع رباعي. 🚗

مغارة قارة مريحة

• في ثادق، وتقع في منطقة الجيوبارك. تبعد 110 كم تقريبًا عن وسط الرياض📍

• تبعد ساعة ونصف تقريبًا. 🛣️

• يميزها حجمها الكبير، وتاخذ عشرين سيارة تقريبًا. والمغارة من الداخل حجمها تقريبًا 5 متر وطولها 20 متر. 🧱

• فيه لافتة تدلّك على المكان، وفيها تفاصيل ومعلومات عنها أكثر.

• سهل الوصول لها وما تحتاج تنسيم كفرات أو سيارة دفع رباعي. 🚗

نفود أم الشقوق

• تبعد 120 كم تقريبًا عن وسط الرياض.📍 

• تبعد ساعة وأربعين دقيقة تقريبًا. 🛣️

• يميزها المنظر الجمالي فيها. يقول عنها ثامر السنيدي: «نفود وربيع، وش عاد خلّيت؟»

• توصلها الشبكة بشكل جيد. 🛜

•   ما تحتاج سيارة دفع رباعي بالأيام اللي ما تكون مطر، بس لازم تكون حريص ومنتبه. 🚗

شعيب مزيرعة أو مطل شعيب العمارية

• في العمارية وتبعد 50 كم تقريبًا عن وسط الرياض.📍

• تبعد 55 دقيقة تقريبًا. 🛣️

• اللي يميزها في نهايته مطل ساحر على حواف جبل طويق، تقدر تتأمل منه الغروب على مد البصر. ⛰️

• عيبه الشبكة فيه ضعيفة، وغالبًا ما بتحصل أصلًا. 🛜

•  سهل الوصول لها، ما تحتاج سيارة دفع رباعي. 🚗

روضة الحجايز

• تبعد 65 كم تقريبًا عن وسط الرياض.📍

• تبعد ساعة وعشر دقائق تقريبًا. 🛣️

• يميزها هدوء المكان وبعده عن الضجيج، رغم قربه من الرياض. 

• ننصح تروح لها من جنوب الرياض عن طريق ديراب أفضل. 🛣️

• لكن عيب الطريق مافيه محطّات ولا أنوار، جهّز نفسك وأغراضك من قبل، ويفضل تمشي الصباح. ☀️

•   سهل الوصول لها ما تحتاج سيارة دفع رباعي. 🚗

روضة المسعودي

• في سِعد. تبعد 120 كم تقريبًا عن وسط الرياض.📍

• تبعد ساعة ونصف تقريبًا. 🛣️

• يميزها سهولة الدخول والطلوع منها. 

• توصلها الشبكة بشكل جيد. 🛜

• ما تحتاج سيارة دفع رباعي بالأيام اللي ما تكون مطر، بس لازم تكون حريص ومنتبه. 🚗