وين تشرب شاهي يقعد الراس بالرياض؟ 🫖

الشاهي ما له وقت، صيف شتاء، صبح ومساء.. ومع أني من محبي القهوة أكثر، إلا أن الشاهي له جو خاص بالأيام الشتوية. ⛈️

كثرت محلات الشاهي وصارت المنافسة شديدة، وما عاد الواحد يدري وين يشرب شاهي. 🤔

في هذا العدد جمعت من بعض الأصدقاء اللي أصنّفهم شرّيبة وخبراء شاهي، عدد من محلات الشاهي اللي تقدم لك تجربة مختلفة، أو بأقل حال تلقى عندهم شاهي تقول عنه «يقعد الراس». وجرّبتها محل محل، وكاسة كاسة، كله عشان أجاوب عن سؤال واحد: وين تشرب شاهي يقعد الراس بالرياض؟ 🫖

يقول طلال مداح رحمة الله عليه:
«حرّك قلبي، ودوّب قلبي
مثل السكر في فنجان شاهي»

 عشان أجهّز لهذا العدد جمّعت قائمة من عشرين محل، وطلعت جولة على مدار ثلاثة أيام متواصلة أجربهم واحد واحد..

بديت جولتي في 2 ديسمبر يوم الثلاثاء المساء، وانطلقت 🚗🗺️

وبعد الصولات والجولات بين محلات الشواهي بالرياض، هذي أربع تجارب مميّزة أشوف أنها الفائزة من بين العشرين تجربة.🥇

وكانت فائزة لعدة أسباب : 

• أماكن تقدّم أنواع شاهي وطريقة تحضير مميزة.

• بعضها لها قصص وأشخاص مغمورين خلفها.

• أماكن التجربة داخلها تحسسّك أنك في البلد اللي يصنع هذا الشاهي تحديدًا.

التجربة الأولى: سماور، الشاي الحضرمي 🇾🇪

📍حيّ خنشليلة «المنصورة حاليًّا» بجنوب الرياض.

جتني أكثر من توصية على «سماور» اللي يقدم الشاهي الحضرمي.

المكان قديم، وصدق ما قدرت أوصّل لمعلومة محددة عن تاريخ بدايته. ولكن أول ما تدخله تشعر إنك رجعت بالزمن 15 سنة. 
الباب القديم، وبتشوف صندوق جريدة الشرق الأوسط والرياض، والكراسي والجلسات وكل تفصيلة بالمكان تعطيك هذا الشعور بقدم المكان.

الشاهي الحضرمي يختلف عن غيره من الشواهي بالأدوات وطريقة التحضير. 🫖

يتكون من «السماور» -ومنه جاي اسم المحل- وهو الأداة اللي يحضر فيها الشاهي، وفيه البعض يسميه «بخاري» وفوقه الإبريق.

تقول القصة: إن أصل الشاهي من روسيا، ثم انتقل إلى أذريبيجان، ثم تركيا، حتى وصل لحضرموت عن طريق التجار، واكتسب من خلالها أهل حضرموت هذه الطريقة بصنع الشاهي. يجي الشاهي ثقيل جدًّا، فيُصَب تقريبًا ربع أو نصف الكاسة شاهي، ويُخفَّف بالماء.

العجيب إن عِدَّة الشاهي الحضرمي حاجة إلزامية بكل بيت، ويتفنّنون بأشكالها وطقوس ترتيبها. وقريت معلومة إن أسعار العدة قد تصل أحيانًا إلى 20 ألف ريال حسب جودتها!

مو أول مرة أجرب الشاهي الحضرمي، بس قليل اللي يضبطه، لأن فيه احتمال كبير يطلع «عاقد» ويجفِّف الحلق. بس في هالمحل، كان الشاهي موزون وفيه نكهة عطرية مميزة تبقى ببالك بعد ما تخلص الكاسة.

وصدق إني ضربت له مشوار كلّفني ساعة و40 دقيقة، بس يستاهل العنوة. سواء للشاهي نفسه أو حتى لتجربة المكان المختلفة.

1. «سماور» يفتح 24 ساعة.

2. جلساته كلها داخلية وفيه قسم فيه شاشة للمباريات.⚽️

3. إذا ودّك بالعدة، تراه يبيعها وتبدأ أسعارها من 250 ريال.

4. أقرب محطة مترو : محطة مستشفى الإيمان.Ⓜ️

التجربة الثانية: شاي ريش 🇪🇬

📍حيّ الروضة

إذا سبق ورحت لمصر، أكيد مريت منطقة الحسين الشهيرة وشفت مقاهي الشاهي الشعبية هناك.

شاهي ريش، مقهى شاهي مصري يقدم شاهي كشري بالدماغ. كل تفصيلة بالمكان تشعرك إنك بمصر؛ تصميم الجلسات، الديكورات والصور، الأغاني اللي يشغلونها، والمخبوزات اللذيذة اللي يقدمونها.

رحت له الظهر وكان فيه زباين، بس من بعد العصر تبدأ الزحمة تكثر بالمكان، والعشاء هو وقت الذروة عندهم.يعني عادي تجي وما تلقى لك طاولة رغم وسع المكان وكثرة جلساته.

الرهيب إن عندهم كل ألعاب الطاولة: شطرنج وضومنة وورق وغيرها. بس عليك تطلب شاهيك وتجلس تلعب مع أصحابك.

1. المحل يفتح 24 ساعة.

2. فيه جلسات داخلية وخارجية، ومساحة لعرض المباريات.⚽️

3. أقرب محطة مترو : محطة الأندلس. Ⓜ️

ولو أبي أوصيك على طلب من عندهم: شاهي كشري مع سمسمة جبن سايل، وادعِ لي.

التجربة الثالثة: شاي أبو تركي 🪵🫖

📍في شرق الرياض وتحديدًا في حيّ المونسية.

لو تسألني: أنت وين تشرب شاهيك؟ بقول لك عند شاهي أبو تركي. شاهي على أصوله. 

بدأ أبو تركي يبيع الشاهي قبل قرابة 15 سنة بالبرحة اللي قدام محله. وبعد ما ترتب وضعه فتح هالمحل. وللأسف الرجال هذا «طير بر» وكان كاشت. بس لقيت ماجد، وهو عامل اشتغل مع أبو تركي من 11 سنة في هذا المحل.

ميزة ماجد تجيه مرة واحدة بس، يحفظ اسمك وطلبك، واترك المزاج عليه. الشاهي على جمر، ويجيك فيه طعم تدخينه على خفيف. شاهي أحمر يقعّد الراس بدون فلسفة، وهو الشاهي المعتمد عندي وعند صديقي ذوّيق الشاهي، فيصل الشويمان، يساعدنا على فرفرة الهواجيس بالليل.

• يفتح المحل 24 ساعة كل يوم، عدا يوم الجمعة يفتحون من 02:00 الظهر.

• ما عندهم جلسات وفيه خدمة طلبات السيارات من جانب المحل. 🚗

لو وراك هواجيس وتبي لك شاهي يساعدك عليها، خذ لك كاسة من عند أبو تركي وانسَ الموضوع.

التجربة الرابعة: مخبوزات حساوية وشاي لومي ساخن من Tea Lab 🥖☕️

📍حيّ العارض 

أحيانًا تهفّك نفسك على شيء دافي، بس مو شاهي ولا قهوة ولا شيء يسهرك بالليل. لقيت عند «Tea Lab» الطلب المناسب لهذه الحالة.

جربت عندهم شاهي لومي دافي، كان منعش ولذيذ، ولا فيه لذعة الليمون المزعجة. أيضًا جربت عندهم فطائر خبز حَمَر، وهو الخبز المشهورين فيه أهل الأحساء.

ويكون من دقيق بر وتمر ونخالة وحبة البركة وهيل وزعفران.

أخذت من عندهم فطيرة خبز حَمَر بالجبنة، وكانت خفيفة وطازجة. ويقدم المحل مخبوزات طازجة برضه من خبز الرقاق والسمبوسة والمسخّن، وساندويتشات مناسبة للفطور.

1. يفتح المحل من 09:00 الصباح إلى 02:00 الفجر. 

2. ميزته إنه يوفر جلسات خارجية كبيرة للي يتابعون مباريات، وجلسات داخلية هادئة ما تسمع فيها صخب اللي برى.

3. أقرب محطة مترو : البنك الأول. Ⓜ️ 

لو تسألني من بين عشرين تجربة فقط عجبتك أربع أماكن؟ بالنسبة لي هذي الأربعة هي اللي تميزت بميزة فارقة عن المحلّات الثانية.

وبعد هذي التجارب كلها، وعدد أكواب الشاهي اللي شربتها، أحتاج تحليل حديد. 😆
بس كل شيء يسوى لعيون البحث عن تجربة مميزة.

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

«تي رود» - Tea Road - حيّ القيروان.
مكان مناسب إذا تحب تبدأ صباحك بشاهي ومخبوزات طازجة. وعندهم كذلك تنوّع ما بين الفطائر والسمبوسة والمسخن.☀️

📍عندهم 7 فروع في أنحاء الرياض. يفتحون 24 ساعة يوميًّا، ما عدا الجمعة يقفّل 11:00 الصباح، ويفتح بعد صلاة الجمعة.

يجي شاي - حيّ قرطبة.
عندهم مخبوزات لذيذة وطازجة على مدار اليوم، وشاهي بجودة عالية. المحل دورين والفرع شرح وتدخله الشمس بشكل جميل. يفتحون 24 ساعة يوميًّا.⏰

شاهي طرب - حيّ الملك فيصل. 

إذا جوّك نكهات جديدة ومختلفة عن المعتاد عندهم شاي مخلوط بلذعة دارسين تبقى ببالك يوم كامل.  يفتحون 24 ساعة يوميًا.⏰

ستين شاي - حيّ الرمال. 

من اسمهم، عندهم 60 نوع شاهي وبمذاقات ما تطري على بالك. وعندهم جلسة تطل على طريق الثمامة، ومنظره بالليل حق جلسة هواجيس. 🌃 يفتحون 24 ساعة يوميًا.⏰

«شاي تي جاذر» صح فازوا علينا المغرب، بس ترى شاهيهم له لذّة. خذ شاي مغربي منهم. 

وإذا تهمك الجلسة؟ وتدور جلسات بمطلّات 🪑

نبتة الشاي - حيّ عرقة. 

المكان مناسب مع هذي الأجواء. يطل على بلدة عرقة القديمة.

ساعات عملهم ⏰: 
من الأحد إلى الخميس: 4:00 العصر حتى 1:30 الليل. الجمعة والسبت: 3:30 العصر حتى 2:00 الليل.

شاهي لمة - حيّ الياسمين.
يطل على الرياض وأبراجها. 🌆 
يفتحون 24 ساعة يوميًّا.

وما نسينا راعين الهواجيس من توصياتنا 💭:

إذا كانت هواجيسك يبي لها خط؟ عندك رفيق الليلوشاي فيصل وشاهي أبو تركي ورمق الشاي، كلها أماكن تاخذ منها شاهيك على الماشي 🚗
وإذا تبي تهوجس وأنت جالس، شاي سجّة تسجّ أنت وهواجيسك بجلساتهم الخارجية الرايقة.

وإذا تحب تسوي شاهيّك بنفسك، أقول لك بسيطة.💁

بيت الشاي 🫖

•  متخصّص بأنواع شاي تصل إلى 1,000 نوع وبمختلف درجات الجودة.

• موقعهم حي النسيم.📍

• موقعهم الإلكتروني تلقاه هنا.

الورقة السحرية 🍃
كان أحد ضيوفنا في حلقة توصيات معيشية من معيشة ثمانية. وهو خبير بالشاي الصيني.

• عنده أنواع شاي صيني بجودة عالية جدًّا. 🥇

• تقدر تطلب من موقعهم الإلكتروني، تلقاه هنا .

وترى الشاي الصيني مو بس أخضر، فيه أنواع ما تخطر على بالك. وكلا الاثنين عندهم عدّة الشاي اللي تحتاجها من أباريق وكاسات وغيرها.