أيش بتشوف في نور الرياض؟ 🌌

من يومي صغيرة وأنا أنبسط لا صار فيه عروض ألعاب نارية باليوم الوطني، ولّا بالأعياد. الشروخة أو الطراطيع أعتبرها أكثر فقرة تحمّس في العيد كله؛ تعطيني إحساس بالبهجة وشعور الاحتفال اللي يخليه يوم مختلف عن غيره. 🎇

هالعدد جا من سؤال تكرّر من الكثير حولنا، وش محطات «نور الرياض»؟ ولو بنروح كيف بنروح؟ ووش يميز كل منطقة عن الثانية؟

في هذا العدد الخاص من دليلة الرياض، أستكشفنا كل الستة مناطق الحاضنة لأعمال نور الرياض وجبنا لكم زبدة جولاتنا.

يوم 19 نوفمبر الماضي حضرنا الحفل الخاص لافتتاح «نور الرياض» في نسخته الخامسة، اللي أُقيم في محطة مترو «STC». كان فيه تعريف عن الاحتفال وعن المناطق الحاضنة لأعمال الفنانين هذي السنة، والإطلاق الأول للميدلي الخاص بهذي النسخة اللي بتسمعه في المترو طوال أيام احتفالات نور الرياض.🎼

ليه يهمنا «نور الرياض»؟
لأنه من المشاريع اللي تقدر تشوفها حاضرة في مناطق مختلفة في الرياض، يتفاعل معها الجميع بلا استثناء.

فكرته هي احتفال سنوي بالفنون الضوئية. يعرض فيها أعمال فنّانين من مختلف العالم على شكل عروض ليزر، وفنون تفاعلية. واحدة من رسائلهم هي تحويل الرياض إلى «معرض بلا جدران»؛ فبتلاحظ اندماج الفنون بالأماكن حولها، وتداخل الفنون مع العمارة، والمباني.

السنة هذي شارك 59 فنان من 24 دولة، أعمالهم موزَّعة على عدّة مناطق. وبعنوان «في لمح البصر» 🌌

وهذي السنة لاحظنا أنهم ربطوا المترو بالاحتفال، بمناسبة مرور سنة كاملة على افتتاح المترو. 🎊

وأكبر ثلاث مناطق من الاحتفال تبدأ جولتها من المترو. 🚅

طيّب، أيش توزيع الست مناطق؟ 

•  ثلاثة منها عبارة عن أعمال من فنانين مختلفين. 🧑‍🎨👩‍🎨

• ثلاثة متخصصة بفنان واحد فقط.  🧑‍🎨

1. مركز الملك عبدالعزيز التاريخي (تبدأ في محطة المتحف الوطني) - وهي الأكبر فيها 24 عمل.

2. منطقة محطة قصر الحكم - ثاني أكبر منطقة فيها 16 عمل.

3. محطة «STC» - فيها 15 عمل.

هذي الثلاث محطات عبارة عن مناطق تأخذ فيها جولة حول الأعمال كاملة لعدّة فنانين مختلفين، وكلها تبدأ جولتها من محطة المترو، وتنتهي في نقطة محددة. Ⓜ️

بينما:

1. الرياض آرت هب، حي جاكس.

2. محطة المركز المالي «كافد».

3. الفيصلية.

هي مناطق فيها عمل لفنان واحد فقط في كل منطقة.

زرنا كل المحطات على مدار أربعة أيام لتوثيق الجولة بشكل متكامل.

•  محطة «STC» في اليوم الأول.1️⃣

• الرياض آرت هب في اليوم الثاني.2️⃣

• مركز الملك عبدالعزيز التاريخي في اليوم الثالث.3️⃣

• كافد، ومحطة قصر الحكم، والفيصلية في اليوم الرابع.4️⃣

تعمّدنا نزورها في أيام متفاوتة، حتى نركّز في تفاصيل كل منطقة، وثانيًا لأن المحطة الواحدة تحتاج منك أقل شيء ساعتين حتى تنتهي من الأعمال كاملة. وفيها مسافة جيّدة من المشي. شخصيًّا، قفّلت خطواتي في كل الأيام.🚶‍♂️

اليوم الأول من جولتنا كنا في محطة «STC» الأعمال كلها موجودة في الساحة الخارجية للمحطة. لما توصل، المكان مجهّز بلافتات توضّح لك المسار، ومنظّمين يساعدونك.

📍منطقة محطة «STC».
Ⓜ️ محطة «STC» - المسار الأزرق.
المدّة المتوقعة للجولة : ساعة ونصف. ⏳
عدد الأعمال : 15 عمل.

إذا وصلت المنطقة اللي بتبدأ جولتك فيها، بتلقى منطقة استعلامات، وجّه لها.☝🏻

بيعطونك «بروشور» فيه خريطة للجولة كاملة 🗺️ من وين تبدأ الجولة ووين تنتهي، ونبذة عن الفنّانين المشاركين وأعمالهم.

📍منطقة مركز الملك عبدالعزيز التاريخي.
Ⓜ️ محطة المتحف الوطني - المسار الأزرق.
المدّة المتوقعة للجولة : ساعتين ونصف. ⏳
عدد الأعمال : 24 عمل.

عندهم خدمة لطيفة، في حال حبيّت أحد ياخذ فيك الجولة حول الأعمال كلها، ممكن تطلب مرشد دليل فنّي خاص معك. ياخذ فيك جولة في المنطقة كاملة ويشرح لك الأعمال ويدلّك.

تقدر تطلب الخدمة من منطقة الاستعلامات.

وإذا تحب تستكشف بنفسك؟ فيه لوحات وصفية عند كل عمل فني، وفيه شخص يشرح لك عن العمل بالكامل لو حبيت. وكلّه مجاني.💸

📍منطقة قصر الحكم.
Ⓜ️ محطة قصر الحكم - المسار الأزرق.
المدّة المتوقعة للجولة : ساعة ونصف. ⏳
عدد الأعمال : 16 عمل.

من بين كل الجولات الثلاث عجبتني جولة منطقة قصر الحكم. يمكن لأنها آخر محطة زرتها في اليوم الأخير. لأن وقتها عرفت الجو، وبديت أدل. بدأتها بعملين داخل المحطة، بعدها استقبلني عمل للفنان السعودي زياد الروقي اسمه «الظل الكامن». والصدق ما ودّي أحرق عليك الأعمال عشان تستمتع بجولتك.😉

وفي هذي المنطقة أكبر عمل موجود في الاحتفال كامل «حين تلامس السماء الارض.» ⚡️

بس العمل اللي خلاني أكمل جولتي وأنا مستمتعة، هو عمل اسمه «قلب مزدوج». قبل أوصل له، كنت أسمع من بعيد صوت غريب ومتكرّر «تك، تك، تك» بصوت عالي وفيه كورة بلاستيكية كبيرة 🤔 لما وصلت وسألت وش السالفة؟

شرحوا لي الفكرة، وهي عمل تفاعلي بين شخصين، كل واحد يكون داخل الكبسولة، ويحطون على يدينكم حسّاسات، تتبع نبضات القلب، وتعكسها على شكل ضوء وصوت.. والصوت اللي كنت اسمعه كان صوت قلوب الشخصين داخلها!

والكورة البلاستيكية تقدر تشوف داخلها ظل الشخص اللي جالس. كانت تجربة عجيبة، خلتني أكمل جولتي باستمتاع.♥️

بعدها كمّلت جولتي على الأعمال، ومرّيت في نفق يوديني منطقة الدحو اللي فيها أغلب الأعمال في المنطقة، اللي بعدها نوصل للمنطقة الأخير وهي قصر المصمك — فيها العمل الأخير من هذي الجولة.

واحدة من الأشياء اللي كنت متخوفة منها أني أضيع بالمنطقة لأنها كبيرة، والمسار فيها طويل. لكن عجبني الترتيب، مسكرين الممرات بشكل يخلي الطريق سلس وواضح، حتى بالنهاية وأنت موجّه لساحة الصفاة، حاطين أنوار على الممر تتبعها لين توصل قصر المصمك.

بالنهاية وصلت للعمل الأخير رقم 16 وهو عمل الفنان السعودي عبدالرحمن السليمان على قصر المصمك. 

لفتني مشهد العوائل وهي مستمتعة بالمنظر، وهذا أكثر شيء لاحظته في جولتي.

منطقة قصر الحكم، ومركز الملك عبدالعزيز التاريخي، هي أكثر منطقتين مناسبة للعوائل، لأن الأعمال اللي فيها أغلبها تفاعلية. 🧑‍🧑‍🧒

في منطقة الرياض آرت هب، مع أنه من المناطق اللي تضم عمل لفنانة واحدة، لكن المنطقة فيها أكثر من عمل تفاعلي. كذلك يقام فيه لقاءات وحوارات مع الفنّانين المشاركين والمهتمين في المجال.

كان في زيارتنا لقاء مع عدّة فنانين مختلفين، وكانت تدير اللقاء «نوف المنيف» مديرة احتفال نور الرياض.

محطة كافد والفيصلية هي أعمال تشوفها من الخارج، لا تغلط غلطتنا رحنا لها كنا نظن أن الأعمال داخل المحطة بينما العمل كان مشاهدته من الخارج.. بس ما فقدنا الأمل، رحنا ممشى الغديرعشان نطلّ على العمل من زاوية مثالية.

عن التجربة بشكل عام:

• الدخول مجاني لكل عروض نور الرياض. 

• بتلقى هـنا خريطة للمناطق كلّها مع صور وأوصاف الأعمال الموجودة. 🗺️

• الاحتفال مستمر يوميًّا حتى تاريخ 6 ديسمبر 2025.

• العروض تبدأ من 06:00 المساء حتى 12:00 الليل. لا تروح بدري وتتحمس زينا. 🤭

• الأجواء باردة، ننصحك تلبس لبس ملائم لو كانت وجهتك  محطة قصر الحكم أو مركز الملك عبدالعزيز التاريخي لأنها خارجية.❄️

• الوصول لكل محطات الجولات الثلاث عن طريق المسار الأزرق في المترو. Ⓜ️

• إذا كنت مهتم باللقاءات والحوارات والأنشطة العائلية الموجودة في كل منطقة بتلقى تفاصيلها في إنستقرام.

وعشان نسهّل عليك جمعنا لك قائمة لجميع المواقع 👈🏻 هنا 📍 

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.