ليلة سامري، وعشاء سالمون في القصيم! 🫶🏼

في تخطيطنا للرحلة الثانية للقصيم، كنا نبي ارتباط ثقافي واجتماعي أكثر، لأن القصيم معروفة بسماحة أهلها، وفي كل مكان تزوره بتسولف معهم وكأنهم يعرفونك من زمان. وهالشيء عكسناه في هذا العدد، في كل مكان رحناه سولفنا وتعرّفنا على شخص من أهلها ومن الغريب اللي تطبّع بأطباعهم.

بتلقى تمشية وفطور في مزرعة، وليلة سامري وعرضة وحوطي، وسالمون يحبه قلبك! 🍣

وأنت تقرأ العدد، اطرب على يا حمامٍ على الغابة ينوحي 🎶

قبل قرابة السنة، سوّينا عدد عن القصيم في نشرة أماكن، وكان محصور فقط بأماكن الكشتات وتوصيات بسيطة في داخل مدنها، هالمرة رحنا اتجاه مختلف بين عنيزة وبريدة. 🌴

اخترنا القصيم في هالرحلة للمعايير التالية:

• تنوّع التراث الشعبي ما بين حِرَف يدوية وأكلات شعبية وطرب. 🥁

• جودة العلامات التجارية المحلية وتنوّعها ما بين قهاوي ومطاعم.☕️

مزرعة الطويرب «ريفا» 🌴

وأنا أجهّز للعدد كنت أدوّر مكان فطور مختلف شوي عن المعتاد، ولقيت «مزرعة ريفا» أو مزرعة أبو عبدالله الطويرب. مزرعة كبيرة بداخلها جلسات ويقدمون فطور فقط، ويفتحون من بعد صلاة الفجر إلى صلاة الظهر، صليت الفجر بالرياض وانطلقت لعنيزة. 🚘

كلما أقبلت على القصيم تظهر لي تشكلات غيوم عجيبة، مثل الصورة هذي. كيف إن الشمس ساطعة على كل الطريق إلا مساحة بالنص تحجبها الغيوم وكأنها ستارة. 🌥️

وصلت المزرعة على الساعة 9:30 الصباح، ورغم إنه وسط أسبوع، المكان حي ومليان. والملفت تنوّع الناس؛ فيه سعوديين وخليجيين وأجانب من جنسيات مختلفة. 

أول ما دخلت استقبلتني أصوات الطيور ومياه تجري ونسمة هواء حلوة. 🌺

دفعت عند الاستقبال 45 ريال لحجز الطاولة، وتوقعت إنها للحجز والدخول فقط، طلعت شاملة للفطور والشاي والقهوة، ولو ما شبعت تطلب إعادة تعبئة للفطور كامل مرة ثانية مجانًا!

أعطيت النادل الفاتورة ورحت أتمشى بالمزرعة. فيها بقر ومعزة ودجاج وطاووس وصقر قدام وجار نار، والكثير من القطاوة.

حجم المزرعة كبير جدًّا، حسبت عدد الجلسات اللي على شكل كوخ، طلعت تتجاوز 50 جلسة، غير الجلسات الخارجية!

أما الفطور، فكل شيء يحضرونه طازج وعلى الطلب، من الشاي والقهوة إلى الخبز وبقية أصناف الفطور. 🍛

أول ما جلست جابوا لي قهوة وتمر، ثم بعدها جاء الفطور ويتكون من: سلطة وشكشوكة وكبدة وفول وفطيرة زعتر وجبن وزيتون. والكميات كافية وزيادة بعد! 🍳

هنا القتيت بصدّام حسين... نعم صدّام حسين، وهو عامل المزرعة الهندي ويسوي كبدة تاكل أصابعك وراها.

جلست أسولف معه، طلع له 6 سنين بالمزرعة مع أبو عبدالله، وتوقعت إنه يستخدم اسم مستعار حق الضحك فقط، الين ما طلّع لي هويته، وتأكدت فعلًا إن اسمه صدام حسين!

يقول لي: «بالثمانينيات كانت شعبية صدام كبيرة وسمّاني أبوي على اسمه.»

ولما سألته عن مواقف صارت له بسبب اسمه، قال: «مرة جو زباين من الكويت، قدمت لهم الفطور وضبّطت لهم السفرة، فقال واحد منهم وش اسمك؟ عشان نمدحك في قوقل ماب. قلت له صدام حسين! قام وقال لي تتمسخر عليّ أنت؟! نادِ المدير! شوي إلا يضحك ويقول أمزح معك. وعشان يتطمن ويتأكد إني ما أكذب عليه، طلّعت له هويتي.» 🤦🏻‍♂️

الفطور كان لذيذ للأمانة، بس الكبدة شيء ثاني. يعني عادي أضرب المشوار هذا كله من الرياض بس عشان الكبدة.

خلصت فطوري، وكان الجو حلو. فجلست استراحة محارب بعد معركة الفطور، وجت هالدجاجة تسولف علي وجلست على الكرسي المقابل.

جلست عندهم قرابة ساعتين، ولو ما وراي جدول وأماكن أزورها، كان يمكن آخذ لي غفوة على أحد الجلسات، لأن الجو كان جميل جدًّا.

أعتقد إن تجربتي الخفيفة هذي سببها إني جيت بنص الأسبوع، لأني قبل لا أجي قريت في قوقل ماب عن شكاوى بسبب الزحمة والانتظار اللي يوصل ساعتين، بس ما صادفت أي شيء من هذا.

• سعر الجلسة للشخص 45 ريال، الأطفال تحت 9 سنوات والعاملات المنزلية مع العائلة دخولهم مجاني. 🎫

• يُفضّل تحجز الجلسة قبل لا تجي، سواء بوسط الأسبوع أو عطلة نهاية الأسبوع، من خلال هذا الرقم 0541607799. 📞

• في عطلة نهاية الأسبوع والإجازات المدرسية يسوون فعاليات مجانية للأطفال، مثل ترضيع الماعز، وركوب العربة، وإطعام الطيور والحيوانات. 😅

• في الشتاء، تفتح المزرعة إلى ما بعد صلاة الظهر تقريبًا 1:30. ⏰

سوق المسوكف 📜

كنت أسمع عن سوق المسوكف قبل، بس ما أدري وش هو بالتحديد. أدري إنه سوق شعبي بس وش يبيعون فيه؟ هل يسوون فعاليات دورية؟ هل هو فاتح على مدار العام وإلا بس بالشتاء؟

أول ما دخلت شعرت إن أصحاب المحلات يتصرفون وكأنهم ببيوتهم ويألفون المكان. واحد يسوي القهوة والشاي، وثاني يغسّل الترامس عشان يعبّيهن، وجلسة أخرى لكبار سن يتقهوون ويسولفون.

محلاته متوزّعة لفنانين حرفيين، أغلبها كان مغلق للأسف بسبب مزامنة زيارتي مع معرض بنان بالرياض للحرف اليديوية، فأغلب اللي بالسوق راحوا الرياض للمشاركة في المعرض.

بس الحمد لله لقيت لي واحد فاتح، وقفت عند محل النحّات التشكيلي تركي عبدالعزيز العقيل. أبو عبدالعزيز يشتغل على منحوتات خشبية من الإثل تحديدًا، وأنواع أخشاب أخرى. هلالي متعصب لدرجة إنه ناحت شعار الهلال بالخشب. 🤣

حاولت أستفزه وقلت له لو جاك زبون نصراوي ويبي شعار النصر، تسوي له؟ 👀

وطلّع لي شعار النصر هذا، وناوي يسوي منه دفعة جديدة. وقال لي: «لا تدخّل ميولك الشخصية بشغلك، ترى متى ما دخلت اعرف إنك بتصدم بجدار.»

 الجهة الثانية من السوق، فيها محلات تبيع مأكولات شعبية، مثل الكليجا والمعمول والقرصان والمطازيز وغيرها. وكل اللي يشرف عليها نساء من أهل الديرة.

ساقتني رجلي عند بسطة أم محمد، وحلفت علي أذوق الكليجا، ومن طيب نفسها تقول لي: «هذي ضيافة السوق مو لازم تشتري.» 🧧

أم محمد تبيع أنواع كثيرة من الأكل الشعبي، أيش ما ودّك بتلقاه عندها، حتى البهارات.

ذقت كليجا الدبس وجازت لي، وأخذت من عندها تنكة كليجا صغيرة وتذكرت إن زوجتي وصّتني على «بقل» أو «إقط»، وأخذت علبة صغيرة. 🥧

بصراحة السوق ينقصه اهتمام أكثر من المشغّل من نواحي متعددة لأنه مكان جميل وتاريخي ويستحق. 

• يفتح السوق على مدار العام ووقته حاليًّا من 04:00 العصر إلى 9:30 مساءً. ⏰

• عطلة نهاية الأسبوع وقت مثالي للزيارة، لأنه أحيانًا تصير فيه مزادات. 💰

• السوق له مدخلين، مدخل يودّيك لمحلات الحرف اليدوية والثاني لبسطات الأكل الشعبي. رح مع المدخل الأول لأن قدامه مواقف واسعة. 🚪

• كل المحلات تقبل الدفع بالشبكة، فلا تشيل هم إنه يكون معك كاش. 💳

سامري عنيزة 🥁

ذكر لي واحد من الأصدقاء جمعية دار عنيزة للتراث الشعبي. كل خميس عندهم ليلة وجلسة مفتوحة، فيها سامري وناقوز وعدد من الفنون التقليدية بعنيزة.

من قبل لا تدخل ومن الشارع تسمع صوت الطق.🪘 

توقعت إني بدخل وألقى الفرقة وكم شخص. وتفاجأت بعدد الحضور من كل الأعمار، حتى فيه شيبان جايين على كراسي متحركة عشان هالليلة! 💚

تبدأ الليلة بعد العشاء، ويبدون بسامري عنيزة، ثم حوطي، ثم ناقوز، ويختمونها بعرضة. وتستمر الجلسة إلى 12:00 في منتصف الليل. وأنا بلشت بعمري، ما أدري أنطرب وإلا أركّز بالتصوير. 🫨

السامري رهيب وله جوه، بس أكثر ما جاز لي الناقوس وإيقاعه السريع، وهو عبارة عن فرقة معها إيقاعات وصفين جالسين يصفقون، وواحد من الإيقاعيين يجلس بطريقة معينة والدف بحضنه وهو اللي يقود الإيقاع.

جلست مع قائد الفرقة أبو بدر يقول أنه بدأ مع الجمعية من قبل 50 سنة. وكانوا وقتها يتعلمون من الصغر بالمزارع عند أشخاص فاهمين بهالفنون. بعد المزارع انتقلوا لمقر آخر، الين ما استقروا على هالمكان. وهي جمعية تُعنى بالفنون الشعبية وتعليمها للصغار، ولهم مشاركات عالمية مع عدة وزارات وسفارات. راحوا أمريكا وفرنسا وكوريا وغيرها من الدول لنشر هذه الفنون. ومن 50 سنة إلى اليوم، كل خميس يفتحون الجمعية ويستقبلون الناس. 🫶🏼🎵

وأنا أصوّر لاحظت صغار بالسن بين الصفوف، ولما سألت عنهم قال لي أبو بدر هذول صغار نعطيهم دروس خصوصية بنص الأسبوع والشاطر منهم ندخّله معنا بالفرقة يوم الخميس.

كانت ليلة طربية ما ودّي أنها انتهت، الطرب وتفاعل الحضور وكبار السن خصوصًا، والجو العام لليلة والحياة اللي فيها، والفرقة اللي تؤدي من قلبها مو مجرد عرض فقط.

ليلة متأكد إني برجع أكررها، بروح وأنطرب وأشارك بالسامري والناقوز والعرضة. 🫡

• كل خميس بعد العشاء تبدأ الليلة بالجمعية، وتنتهي 12:000 منتصف الليل. 🕰️

• الحضور مجاني وفيه ضيافة شاي وقهوة. 🆓

• الجلسات كبيرة فلا تشيل هم إنك ما تلقى مكان. 👍🏼

• تعال وأنت خفيف عشان يمديك تشارك، وبعد ما تخلص رح تعشى. 👀

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

قضيت بعنيزة يوم كامل، أجرّب أماكنها وأوثّق اللي أشوفه. وقتها عرف واحد من الأصدقاء من أهل بريدة ودق عليّ يقول: «وين العدل والإنصاف يا أبو زيدان؟ مثل ما رحت لعنيزة، لازم تجي لبريدة.» 😂

وعملت بكلامه، وجمعت هنا توصيات بالمعايير التالية:

1. توصيات من أهل بريدة مباشرة. 🫡

2. تنوّع الأماكن بين جديد وقديم. 🫶🏼

3. عشان ما يزعلون علينا أهل بريدة. 🫣

• مطعم النجاح بتوصية من الزميلة يارا. مطعم صغير يقدم شاورما بأنواع خبز مختلفة. هنا تعرفت على معلم الشاورما الشيف «إسلام»، كل الخلطات والمخلّلات وابتكارات الشاورما يسويها ويشرف عليها بنفسه. أخذت من عنده شاورما بالتبولة وشاورما جامبو، وكانت لذيذة جدًّا. 🌯

• البستان وعسيب بتمشية خاصة مع الصديق خالد. كلا المكانين يقدمون نفس الفكرة؛ منتزه على شكل مزرعة فيه مطاعم ومقاهي. عسيب أكثر تكامل، وفيه فعاليات خاصةً بالشتاء، بينما البستان لسة فيه محلات ما فُتحت. ولو أبي أرشّح لك مكان فهو عسيب. 🌴

• في بيت بداخل حواري بريدة، لقيت أم صالح العايد فاتحة بابها وتبيع كليجا ومعمول وقرص عقيلي وغيره. وأنا ضعيف عند كليجا الدبس ذقت واحدة وأخذت لي تنكة. وأحد العمال الموجودين اسمه «فيصل»، لما عرف إني من برى القصيم حلف عليّ يعطيني كيك دِخن ومعمول هدية. ❤️

• المطعم هذا فتح بالرياض بس قلت خلني أجرب فرع بريدة دامه الأساسي. مطعم روح القرية للشيف عبداللطيف السنيدي، رحت له تحديدًا لتجربة برقر الدجاج المقلي بجبن الماعز، ورغم أني سويت حادث وأنا رايح أصريت أستمتع... وبصراحة كان قد التوقعات. برقر متقن بحرفية عالية بأدق تفاصيله. 🍔

معروف أن الأكل البحري بالسعودية من اختصاص أهل الغربية والشرقية، ولكن شخصية هذا العدد كسرت الصورة النمطية. في عربة طعام اسمها «سمكون» بأحد شوارع مدينة بريدة، لقيت أبو مازن يبيع طبق واحد بس! سلمون مع رز بشاور. 🍚🍣

أبو مازن تجاوز الستين من عمره، ولكن قلبه وروحة شبابية، خلال أول دقيقة من الجلسة بدأ يمزح وينكّت وزالت الرسمية بيننا.

عرفت أنه يعشق السلمون، ومن شبابه يحب يطبخه بنفسه، وتطوّر الموضوع معه وصاروا يطلبونه أصدقاء الاستراحة. بعد ما تقاعد، أصرّوا عليه أهله إنه يبدأ بعربة طعام بسيطة، ويمكن بالمستقبل تصير سلسلة مطاعم. 👨🏼‍🍳

فتح العربة قبل سنتين، وبدأ ببيع هذه الوجبة الغريبة، وأقول غريبة لأن معروف إن الأكل البحري يجي معه رز صيادية، بس رز بشاور! ما أحد سبقه عليها.

يقول لي أبو مازن: «أول ما فتحت ما توقعت هذا الإقبال من الناس، يجوني زباين من خارج بريدة وخارج القصيم. من الرياض وجدة والشرقية.» 🛻

وعن أحد المواقف اللي ما ينساها يقول: «بعد شهر من الافتتاح، جاني مشهور وسوّى لي إعلان من دون لا أقول له.. من بكرة صليت المغرب، ورحت أبي أفتح، إلا وأشوف صف سيارات ما له آخر! وسألت نفسي: ماذا لو هربت من الباب الخلفي وتركتهم؟» 😂

دخلت معه للمطبخ وهو يسوي عشاي، ولاحظت أنه دقيق جدًّا، سواء باختيار المقادير أو حتى بطبخها. ويحرص دائمًا إنه يجيب كل شيء طازج ولا يهمه التكلفة. 🤌🏼

ما عنده إلا عامل واحد، ومهمته ينظف ويخدم العملاء، ولا يتدخل بالطبخ. سألته: «ليش ما تجيب عمال يساعدونك أو تدخّل شريك وتتوسع؟»، قال: «الطبق هذا أحبه ولا أرضى إنه يتسوى بطريقة غير طريقتي. أما الشريك، فيه واحد عرض عليّ شراكة، بشرط يقلل من تكلفة المواد، وعلى طول اعتذرت منه. لأن لو نزلت بجودة أي مكوّن، خربت الطبخة. » 🥘

العجيب إنه ما يستخدم لا بهارات ولا زيت. فقط ملح وفلفل أسود. جاني الطبق، وسميت بالله. كل شيء موزون، الفلفل والملح ودرجة الاستواء. ومع إني ما أحب الفطر، لكنه أعطى الطبق نكهة أخرى. ومن كثر ما هو لذيذ خلصت الطبق بدقايق.

ودّعت أبو مازن وهو يحاول فيني يغدّيني بكرة، ولكن اعتذرت منه بسبب جدولي المزحوم، ووعدته إني أجيب كل اللي أعرفهم له، وأخليهم يجربون هذا الطبق اللذيذ.

• اسم عربة أبو مازن في قوقل ماب «لار سلمون» وهو الاسم القديم، وجدّده لـ «سمكون». 🎣

• يفتح أبو مازن من بعد صلاة المغرب إلى 02:00 بعد منتصف الليل. ⏰

• سعر الوجبة 35 ريال فقط، وإذا كنت جوعان مرة زوّد شريحة إضافية. 🍣

• يُفضل تكلّم أبو مازن قبل تجيه عشان يجهز لك الوجبة، وما تجي إلا وهي جاهزة. 👍🏼 

• بجنب عربة أبو مازن، فيه عربة شاي الخبوب. عندهم شاي رايق ينفع لما بعد العشاء. 🧠