وين تجهز عزبتك في الرياض؟ ⛺️
تجهيز لوازم الكشتة والتخييم، وتوصيات عن محلّات لوازم الرحلات مستلزمات ومقادير الطبخ. 🥘🪵
أذكر من يومي بالابتدائي، وجدي سعدون -الله يرحمه- يجهّز الهايلكس ويحمل عليه الخيام للكشتة السنوية. وغالبًا تكون بعد عيد الفطر ولّا عيد الأضحى.❤️
نسجّ من المدن، ونمد النظر في أرض الله وسماه. والحين دخلنا موسم الشتاء، موسم السعوديين المفضّل. في هذا العدد، تجربة الأسبوع عن تجهيز العزبة ولوازم الكشتة لهالموسم. وتوصيات محلّات تقضّي وتجهز منها. ⛺️🪵
أثناء تجهيزنا لتجربة الأسبوع، كتبنا قائمة لأغلب احتياجات الكشتات ورحلات المبيت، اللي بتساعدك تجهز عزبتك، هالقائمة لك
تعتمد عليك أكيد وعلى جوّك ووين تروح بالعادة، وكم مدة جلوسك في البر، وعليها تختار اللي بناسبك من القائمة.
عن نفسي، عندي تفضيلات في المكشات:
أحب الأماكن المفتوحة أكثر من الضيقة. والرملية أكثر من الصخرية.
ما يهمني الطبخ، وأستثقل الغسيل والعفسة، أكلتي الوحيدة اللي أحب أسويها هي القرص. ولكن الشاهي أساس والقهوة يا زينها عقب التعب.❤️
الجلسة المريحة مهمة، والقراءة والاسترخاء، أو السالفة مع صديق، هي وناستي بالكشتة.
نظامي أستكشف ولا أميل للاستقرار بمكان واحد لأكثر من يوم. 🗺️
يعني بالعربي: جوّال، وأحتاج تجهيزات تناسبني؛ خفيفة، وسريعة الفك و التسفيط، وعملية جدًّا.
ومن أهم الأشياء عندي إن سيارتي ما تتعطّل، ولو تعطلت لأي سبب يكون عندي وسيلة اتصال فمهم يكون معي:
هاتف يعمل عبر الأقمار الاصطناعية، خصوصًا للي بيدخل لمناطق ما فيها شبكة. 📡
منفاخ، فيه منافيخ جديدة ممكن تحدّد كم الضغط اللي تبي توصل له وبناء عليه ينفخ لك.
حبل سحب مع عقدة، يفضّل إن الحبل يكون فيه مرونة عشان ما يؤثر بالقير وقت السحب. 🪢
كفر إضافي بحالة جيدة.
عدّة بنشر. 🧰
طفّاية حريق متعددة الاستخدامات.🧯
حقيبة إسعافات أولية.🩹
مدّات، ومراكي، وكيس لحفظ الحطب. 🪵
كانت أغلب الاحتياجات اللي أحتاجها شخصيًّا موجودة عندي. ✅
لكن ناقصني:
مدّات.
مراكي
كيس نقل حطب. 🪵
يوم الخميس العصر، توجهت إلى محل «تنزا» بشرق الرياض، حي السلام. واخترت تنزا بالذات لأنه:
يتميز بجودة المنتجات اللي يجيبها أو يصنعها باسمه، يعني آخذ وأنا متطمن.🥇
أول ما تدخل المحل بتلاحظ أنه وذف ومرتب. ما هو كبير، لكن فيه أشياء لِقطة. أول الأشياء اللي بتلاحظها لما تدخل على يسارك هو المدّات والمراكي عندهم، اللي تتميز بجودتها.
والصراحة هذا اللي كنت جاي عشانه.
المدّات عندهم مبطّنة وبتصاميم مختلفة، تعطيك راحة أكثر بالجلوس وجودتها عالية.
بعد المعاينة وتقدير المساحة اللي بتاخذها من سيارتي، أخذت لي أربع مدّات وأربع مراكي. 4️⃣
وبعدها من باب الفضول تمشّيت بالأقسام كلها. أبي أشوف وش الجديد، ووش من معدات عندهم.
أول قسم من يسارك بعد جهة المدات والمراكي، هو للقدور والثلاجات الكهربائية وأفران البيتزا. وبعدها تجيك الأباريق وكاسات الشاهي الفرنسية الجيدة، وأنواع متعدّدة من الشواهي.🫖
بتلقى خيارات متنوعة، وشركات مختلفة.
بعدها كان فيه قسم كامل للدوافير وملحقاته من وصلات وعيون وليّات وذرايات إلخ.
وبالأخير من اليمين بتلقى المناقد «المناقل» بأنواع وأشكال متعددة، وهناك بتحصل كيس نقل الحطب اللي أنا جيت عشانه.
أخذت كيس نقل الحطب وعبيته 15 كيلوقرام تقريبًا. 🪵
المحل كلّه عبارة عن دورين. الدور الثاني لفرش النوم والخيام ⛺️
لكن ماني بحريص عليها. لأني بالعادة آخذ هذه المستلزمات من محل القاضي.
بشكل عام:
يجوز لي، لتنوع منتجاتهم من دوافير وقدور وأباريق، بين الكوري والهندي والتركي والصيني. وعندهم تنوّع بأشكال المناقد «المناقل» وغيرها. وزيادة على ذلك، كل عامل بالمحل تسأله يعطيك العلم اللي تحتاجه وأكثر. 🤝🏻
حط في بالك، ترى مو شرط تكمّل عدتك وتوصل مبتغاك من أول عدة تشتريها.☝🏻 لكن تلقاك مع الوقت تتخلّص من كثير من مشترياتك، وتصمل على بعضها. لأنك جالس تتعرف على حاجاتك، وأيضًا تختبر المعدات.
وعشان تخيّم بشكل آمن، ومريح، بتلقى هنا 👈 دليل التخييم.
فيه كل المواقع المسموح تخيّم فيها، وطريقة استخراج التصاريح لبعض أماكن التخييم والمبيت، وكم توصية على السريع ومعلومات في حالغرّزتلا سمح الله. 😁
وإن كنت بوصيك على مكان تزوره هالسنة، فهو حومة النقيَان، أتمنى تدعي لي إذا زرته.😎
ومن هنا أقول لكم، انتظروا سلسلتنا الجاية من «وين نكشت؟» على منصات معيشة ثمانية. واللي بندلكم من خلالها على أماكن ونيسة ومتنوعة وقريبة منكم. 🤝
جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.
عشان تكمّل قائمتك اللي فوق 👆🏻
جمعنا لك عدّة أماكن تساعدك
تشتري لوازم رحلاتك حسب حاجتك. ⛺️
تجهز مقادير ولوازم طبختك. 🥘
تشتري أو ترهّم غازك.
وحرصنا أنها تكون:
متعددة الخيارات، وتقدر تلقى فيها أغلب احتياجاتك.
أغلبهم عندهم موقع إلكتروني تقدر تطلب منه، أو تتصفحه قبل تروح.
هذا مثل محل الهرم لأهل البر. تلقى فيه الأشياء اللي تخص المطبخ والنوم والتخييم والتخزين والفرشات والمراكي وشبّة النار. 🪵
عندهم فرعين في الرياض، في الغدير مخرج 5 و حي الملك عبدالله مخرج 12
ساعات العمل : ⏰
يوميًّا من 9:00 الصباح حتى 11:45 المساء.
الجمعة من 1:00 الظهر حتى 11:45 المساء.
موقعهم الإلكتروني 👈🏻 هنا.
الرماية لتجهيزات الرحلات والصيد.
يتميز بتنوع معداته ما بين القدور والأباريق والثلاجات، إلى الكراسي والطاولات والبنادق الهوائية وفرش النوم والخيام. وأيضًا يتميز بوكالته لشركة «ARB» الأسترالية المعروفة بنظام التعليق «Air Locker» المميز، اللي يساعد السيارة تتجاوز الطين والصخور. 🪨
عندهم 10 فروع في الرياض فقط، وعدّة فروع أخرى في السعودية.
ساعات العمل: ⏰
من السبت إلى الثلاثاء : من 9:00 الصباح الى 11:15 المساء.
الأربعاء والخميس : 9:00 الصباح الى 12:00 المساء.
الجمعة : من 2:00 الظهر حتى 12:00 الصباح.
موقعهم الإلكتروني 👈🏻 هنا.
القاضي للرحلات.
من أفضل المحلّات المتخصصة بخيام المبيت والخيام الكبيرة.
جودتها ممتازة، وفتحها وتقفيلها سهل. ⛺️
عندهم تسعة فروع، اثنين منها في الرياض: حي النسيم، وحي الغرابي.
ساعات عمل فرع حي النسيم وحيّ الغرابي. ⏰
يوميًا من 9:00 الصباح إلى 12:00 الظهر، ومن 4:00 العصر إلى 10:00 المساء.
الجمعة : من 4:00 العصر إلى 9:30 المساء. وفي فرع الغرابي مغلق.
موقعهم الإلكتروني 👈🏻 هنا.
البريّة.
يتميّز ببيع الغاز والدوافير وصيانتها وتعديلها وترهيمها. وعلى ضمانة أحد طيور البر في الفريق أنه «أفضل محل يتعامل مع منتجات الغاز في الرياض».
عندهم كذلك عِزَب، ومدّات وكراسي، ولوازم رحلات.
فرعهم في حيّ الروابي.
ساعات العمل: ⏰
يوميًا من 9:00 الصباح إلى 11:30 المساء.
الجمعة من 4:00 العصر إلى 11:00 المساء.
موقعهم الإلكتروني 👈🏻 هنا.
تين ويقطين، حيّ الروابي.
محل يبيع لك لوازم طبختك جاهزة، بتلقى عنده خيارات نظيفة ومقطّعة، كل اللي عليك ترميها في قدرك. 🥘🥒
بتلقى عندهم خضار طازجة، مقطّعة وجاهزة، وبهارات بكميات صغيرة تناسب احتياجك. 🔪
عندهم دجاج وحمام مبرّد وطازج، ويقطعونها لك. 🐓
يفتحون يوميًّا من الساعة 10:30 الصباح إلى 11:00 المساء.
وهنا توصيات إضافية مجرّبة شخصيًا من الفريق.🤝🏻
عالم التخييم. يتميّز بمنتجات من شركات عالمية. 🌎
العقيلات. متجر متخصص بلوازم الرحلات والكشتات موقع إلكتروني تلقاه 👈🏻 هنا.
لوازم البراري. يجمع لك أغلب الشركات في مكان واحد.🪵
لتقضية مقادير الطبخة : 🥘
حمام وكشنه، حي النرجس. 🍗
كشنه كشته على طريق القصيم. 🚗
ثمار العقيلات حي الياسمين.
ملحمة الصمان ( إذا تدور لحم حاشي طيّب 🤤).
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.