خط سفر بين أربع مناطق 🚗

لو جلست مع السعوديين، بتشوفهم يختلفون في أمور كثيرة، بس أغلبهم بيتفقون على حلم استكشاف السعودية بالسيارة. السعودية قارة، وتنوعها الجغرافي والثقافي مغري لأي شخص يهوى السفر. 🗺️
أحد أحلامي كان أني أحقق هالشيء، وجت الفرصة في هذا العدد، رحلة برية في مسار الشمال السياحي انطلاقًا من الرياض. 🚗
قائمة أغاني موصى باستماعها في الخط، أو أثناء قراءة العدد. 🎶

ليه اخترنا هالمسار؟

• خيارات سياحية كثيرة في مسار واحد. 🗺️

• مناظر الخط ممتعة. ⛰️

• الجو من نوفمبر إلى أبريل مناسب لرحلة خط يومين تكسر فيها الروتين. ⛅️

بما أني أسافر كثير للنشرة، اقترحت هالمرة أن الرحلة تكون رحلة خط ما تتعدى يومين، كنت أبي أستمتع بالسواقة في خطوط ومسافات، وكل منطقة أو محافظة أوقف عندها وقفة سريعة وأروح مكان كان ببالي أزوره، أو معلم شهير عندهم، ويوم رسينا على الموضوع قلت لزوجتي تتجهز عشان نطلع. 🫡

في بحثي عن وجهات عرفت «مسار الشمال السياحي» واللي يبدأ بالقصب وينتهي بالرس، ولكن بما أننا بنسوي عدد ثاني عن القصيم غيرت بالمسار شوي وصار: القصب - شقراء - أشيقر - المجمعة - الزلفي. 🧭

فنان سريالي في القصب! 

مسكنا خط القصب بعد الدوام، وشعور الطلعة من الزحمة لشوارع فاضية ما يضاهيه شعور،، لكن بحكم الطلعة المتأخرة ووصولنا بالليل، ما لحقنا على بحيرات بحيرات الملح المشهورة بس صادفت شخصية تسوى تعب الرحلة ❤️

بعد ما وصلنا للقصب رحت «سوق العبيدي التراثي»

مرّيت عليه وكان أغلبه مقفّل وما فيه إلا محلّ شاهي فاتح. سألت الموظف عن السوق ومتى يفتح، قال لي يبدأ موسمه من ديسمبر وتفتح كل المحلات فيه. 😞

السوق فيها محلات ومتاحف وبيوت تراثية. فقدت الأمل إني بلقى شيء مثير للاهتمام. لكن وأنا طالع شفت لوحة مكتوب فيها «المتحف السريالي» سريالي في سوق شعبي؟ 🤔

وقفت سيارتي ودخلت المكان، فيه فرشة قدام الباب وقدامها براد شاي وجوال على المركى، بس ما أحد موجود. شوي إلا سيارة وقفت وكانت بنت اللي تسوق، ونزل رجل كبير بالسن. سلّم علي واعتذر بلطف عفوي إنه كان يعلّم بنته القيادة حول السوق. 🚗

عرّفني بنفسه، الفنان عبدالرحمن الزاحم، أبو أثير.

يقول عن نفسه: «تعرفت على الفن من وعمري 4 سنوات، لما بدأت أكتشف الأشكال الهندسية، ومنها صرت مولع بالفن.» 🎨

أبو أثير فنان شامل، يرسم وينحت ويصنع أعمال فنّية من بيئة القصب نفسها. مثل هذا الكمان ولوحة طويق اللي يحبّها. 🎻

وعن المكان اللي بالسوق يقول: «هذا البيت وُلدت وتربيت فيه، ولما كبرت اشتريت لي بيت جديد. بعد ما تقاعدت من عملي عزّ علي إني أخلي هالبيت بحالة متهالكة، فأشرفت على ترميمه بما يتناسب مع عمارته القديمة، وفتحت فيه ورشتي الفنية.» 🖼️ 

كل فترة يقيم أبو أثير دورات وورش لأبناء وبنات القصب، يعلّمهم الرسم والنحت، ويسمي دورته «استفزاز الإبداع». لأنه حسب قوله: «كل إنسان بداخله فنان نائم، ويحتاج لاستفزاز عشان يصحى.» 😴

• أبو أثير موجود كل يوم تقريبًا من بعد العصر إلى الساعة 10:00 مساءً. ⏳

• يُفضّل تتصل عليه قبل تجي عشان تتأكد من وجوده بالمكان. 0503470348 📞

• بعض أعمال أبو أثير للبيع -لو حاب تقتني شيء- ويصنع أعمال فنّية حسب الطلب. 🎁

مرقب منيخ في المجمعة 🔍

صباح اليوم التالي توجّهنا للمجمعة، وهدفنا المعلم التاريخي «مرقب منيخ».
وكلما بعدنا عن الرياض، تنوعت المعالم والتضاريس اللي نشوفها على مدى الخط.
المسارات واسعة، والطريق سهل، وعلى مدّ النظر تشوف المزارع والنفود، جبال صخرية وجبال رملية، وبعارين تقول لك توقّع بالخط. 🛣️

وصلنا وكان مرقب منيخ هدفي من الوقفة بالمجمعة، لأنه معلم قديم وعندي تجاهه فضول وبحكم قصر الرحلة اكتفيت فيه، المرقب على رأس جبل منيخ وسُمّي باسمه. وقصة تسمية هذا الجبل بـ«منيخ» أن رجل واجه أمطار شديدة، وسالت الوديان، ولجأ الرجل لهذا الجبل وأناخ فيه جمله، وسمّي الجبل من ذاك الوقت بهذا الاسم. 🐪

ويرجع تاريخ بنائه لما يزيد عن 600 سنة، وكان الهدف منه مراقبة الحركة سواء للقوافل التجارية أو لحماية البلدة من غزو محتمل. ⛫

تشوف هذا البرج والأسوار والإتقان في التفاصيل والارتفاع، وتتعجب إنها كانت قبل مئات السنين!

يوم صعدت المرقب قدرت أشوف المجمعة بالكامل، بمزارعها ومبانيها، والبلدة القديمة. وهنا اتضحت أكثر أهمية المرقب، وأنه مب بس معلَم أثري قديم، بل كان في ذاك الوقت مصدر أمان واطمئنان بعد الله لأهالي المجمعة (منيخ سابقًا). 

• المرقب مفتوح للزيارة طوال أيام الأسبوع من 08:00 صباحًا وحتى 06:00 مساءً. 🕰️

• أفضل وقت لزيارة المرقب في الصباح أو قبل الغروب. 🌄

• موظفين هيئة التراث موجودين لخدمتك بأي معلومة عن المرقب أو تاريخ المجمعة. 🙎🏽‍♂️

مقهى ومطعم ونُزل في بيت قديم بالزلفي!

الطريق إلى الزلفي متعة بصرية في شهري فبراير ومارس، لأنه يكثر فيه الخزامى والربيع على مدّ النظر. ولكن اللي واجهنا هالمرّة زوبعة رملية صغيرة «يوم حنا صغار كانوا يقولون لنا هذولا جن يتهاوشون 😂»

في شتاء العام الماضي صوّرت حلقة طبخ استراحات في الزلفي، وخلالها مرّيت مرور سريع على مقهى بحّة. أدهشني بجودة قهوته ومنتجاته وفكرة المشروع ككل، وقررت بهذه السفرة إني أزوره وأعرف قصته. ☕️

ولحسن حظّي قابلت عبدالله الملا، المسؤول عن تصميم هذا المشروع.

البيت واضح من بنائه إنه قديم بعمر يتجاوز 40 سنة. وبعد انتقال العائلة لبيت جديد، جت الفكرة لتحويل هذا البيت لمشروع تجاري، وسمّوه بيت الجوهرة. ❤️

الملحق الخارجي صار مقهى، والدور الأرضي تحول إلى مطعم فطور. 🍳

أما الدور العلوي صمموه نُزل بغرف محدودة. 🛏️
وكل مشروع مستقل عن الآخر من حيث الإدارة، ولكنهم يشتغلون بتكامل رهيب.

من تصميم المقهى والاهتمام بتفاصيله، مثل المروحة الخشبية القديمة والثريا، تتيقّن أنك أمام مصمم يعرف شغله. 👨🏻‍🎨

يقول المصمم عبدالله الملا: «حرصت على اختيار خشب الزان لأنه أقوى وأكثر صلابة من غيره ولا يحتاج لصيانة، ومع الوقت يعطيك تمدّد وتشققات طبيعية جميلة توحي بأن المكان عتيق.»

للمعلومية: خشب الزان هو المستخدم في المشاريع التراثية الحكومية مثل الدرعية والبجيري، وهو غالي جدًّا، يصل سعر المتر المكعّب منه 6500 ريال!

المقهى فتح من شتاء العام الماضي، أما المطعم فخلال شهرين راح يفتح. والنزل على بداية العام الجديد. فإذا لك زيارة للزلفي خلال شتاء هذا العام، لازم يكون ضمن جولتك.

تودّعنا من الزلفي، ومسكنا خط العودة للرياض ليلًا، والخط بالليل حكاية ثانية. يقول خالد الفيصل على لسان أبو نورة: «حبيبتي نجد، عيني فيك معذورة». وصدق والله.
بحر من النجوم فوقك، وسكون يغشاك بعيدًا عن صخب المدينة. قضينا الطريق بين السوالف والنقاشات والأغاني وأكواب ما تنعد من الشاهي. 🍵

• يفتح المقهى من 06:00 صباحًا وحتى 12:00 منتصف الليل. ⏰

• جرّب عندهم تشيز مدريد والمحصول الكولومبي. 🍰

• محطات البنزين كثيرة بالخط، بس تأكد من بنزين سيارتك كل شوي. 🛢️

• في مداخل المحافظات خفف السرعة، لأن بعضها تنزل السرعة فيه فجأة من 120 إلى 90.  📸

  ---

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

حرصنا في هالمسار إن تجاربنا تكون متنوّعة، ما بين الطبيعة والأسواق والمطاعم والتراث والتاريخ، واخترت هالتوصيات بناءً على:

• سهولة الوصول وقربها من الخدمات. 🚗

• تنوّع التجربة من مكان لآخر. 🗺️

في القصب: خاننا الوقت، وما لحقنا عليها، ولكن زيارتها ضرورة؛ بحيرات كبيرة من الملح تستحق تكون ضمن الجدول في مسار الشمال السياحي في مدينة الذهب الأبيض. 🌊

في شقراء: وقفنا على سوق شعبي رهيب، سوق حليوة التراثي. بداخله مكتبة الأديب عبدالكريم الجهيمان. لقينا في هالمكتبة كل مؤلفات الأديب رحمة الله عليه، ونسخ نادرة من كتب ومؤلفات أخرى. 📚

في المجمعة: ذقنا واحد من ألذ مطاعم المشويات اللي جربتها، مطعم فلفل في المجمعة. جربنا من عندهم ساندويتش كباب اللحم وللحين نهوجس فيه. 🥙

في الزلفي: وسط النفود، لقينا قرية قديمة اسمها العقلة.. وكأننا في فلم تاريخي؛ مباني قديمة وتحيطها من كل الجهات جبال من الرمال. وقت الربيع والأمطار بتكون مكان مثالي للمكشات. ⛺️

كل محافظة بالسعودية قادرة على إبهارك بطريقة ما، مهما ظنيت إنها صغيرة أو ما فيها شيء.

وأنا أتمشى في أشيقر طحت على محمية مهند العمر. من برا تحسّ إنها استراحة أو بيت بسيط، بس لما دخلت انبهرت بالبيئة اللي مسويها للطيور والحيوانات عشان تتكيف مهما كانت الأجواء حولها. 🦆🦊

مهند بدأ بهواية الصيد من الصغر، ولما كبر بدأ يشعر بالخطر على أنواع محددة من الحيوانات، وإنها ممكن تنقرض. فتحوّل الاهتمام من صيدها إلى حمايتها.

يقول: «كان الأولين يصيدون من جوع، أما الأجيال اللي بعدهم يصيدون للمتعة، وبعد فترة تحوّلت المتعة لاستعراض أخلّ بالبيئة وتسبب بتهديد لانقراض هالحيوانات.»

ميزة محمية مهند العمر إنك تقدر تشوف أنواع نادرة عن قرب، عكس المحميات الكبيرة والمفتوحة اللي تتطلب مطاردة ومنظار عشان تحظى برؤية سريعة. 🔍

كل الطيور والحيوانات اللي عنده نادرة وبرّية، ولكنه هيّأ لها بيئة مناسبة للتكيّف وقدر يخليها تألف البشر.

عادي جدًّا إنه يدفع عشرات الآلاف، وينقل حيوان معين من قارة إلى قارة، فقط لنقله وحمايته في محميته. 🛩️

سألته وش لك بكل هذا التعب والعناء؟

وكان ردّه: «هوى روحي، ولا تسأل الهاوي ليش تحب تسوي كذا.»

• المحمية مفتوحة للزيارة، ويُفضّل تتواصل مع مهند قبل تروح. 0534963825 📞

• لا تُطعم الحيوانات الموجودة بدون إذن. 🙅🏻‍♂️

• بعد العصر أفضل وقت لزيارة المحمية. ☀️