وين ألعب تنس في الرياض؟

بعد رحلة في ثمان ملاعب تنس في الرياض، وشهر من تجربة التعلم واكتشاف ملاعب التنس. وبين المدربين وتجربة الملاعب.... كتبنا هالعدد. 🎾

من صِغري وأنا حركية، ألعب كل شيء، وأتنافس في كل لعبة ألعبها. 

كأنها حياة أو موت. 🤣

رياضات حركية؟ أدوار تمثيلية؟ ألعاب فيديو؟ حتى البلوت تعلمته عشان أكمل الفريق مع إخواني. وأحب اكتشف بين فترة وفترة رياضات جديدة. 🆕

 من فترة اكتشفت عالم التنس.  🎾
 وجاز لي الصدق. ليه؟ 

•  أنا إنسانة سريعة التشتت، والتنس زادت التركيز عندي بشكل ملحوظ، تركز على الكُرة، والتكنيك، وحركتك في وقت واحد. 🎯

• ترتّب مخك، وتخليك تعيش في اللحظة نفسها. 🧠

•  تخليك متأهب وردة فعلك سريعة.

• تزيد لياقتك، وتحرق سعراتك وأنت مبسوط.🧯

قبل أسوي هالعدد كنت بادية أتعلم أصلًا، وأخذت أكثر من 10 حصص تدريبية، ومع الحصص الإضافية تقريبًا 18 حصة، بمعدل 18 ساعة. 

في تجربة هذا الأسبوع، اخترنا أفضل ملعب لعبنا فيه بناءً على المعايير التالية: 

• الملعب: أرضية مريحة للعب، مساحة مناسبة. جميع الملاعب عندهم معتمدة من الاتحاد الدولي للتنس «ITF». 

• النظافة والجودة: نظافة الملعب، وجودة المضرب والشِّبَاك.

• المرافق العامة: النظافة في دورات المياه، وغرف تغيير الملابس، والممرّات أو حتى غرفة الانتظار. والتأكد من وجود كل المستلزمات اللي تحتاجها في المكان نفسه.

• الخصوصية: ملاعب نسائية مغلقة، بخصوصية تامة.

•  التدريب: بالنسبة لي من أهم العوامل في تعلم التنس، أنك تجد مدربك الذهين اللي يفهمك وهي طايرة. 🎯

*استبعدنا الملاعب اللي ما يمديك تاخذ فيها حصة واحدة.

في يوم 11 أكتوبر، الساعة 6:30 مساء، وصلت لأكاديمية نيت تنس قبل ما تبدأ الحصة بنصف ساعة، كان الملعب الأخير في رحلة التعلم الطويلة، تمصّعنا لأجل هالعدد، لكنه يسوى. 😆

«نيت تنس أكاديمي»، أكاديمية تأسّست 2023، وأسسها المدرب ياسر السلطان. بدايته في التنس جت بعد عدة إصابات في كرة القدم. يقول: «بعد ما كثرت عليّ الإصابات، قلت والله ما عاد ألعبها مرة ثانية». ⚽️
بس لأنه شخص يحب الحركة، بدأ يستكشف رياضات مختلفة. جرّب السكواش، والطائرة، والسلة. وفي 2009 قرر يتعلم تنس. 🎾
ما كانت وقتها ملاعب التنس متاحة كثير، ولا فيه مدربين محترفين بكثرة في الرياض. فسافر حتى يتعلّمها لمدة شهر. تدرّب مع مدرب المنتخب المغربي، اللي درّب «يونس العيناوي»، وهو واحد من أفضل لاعبين التنس عربيًا. 🎖️

ومن ذاك الوقت بدأ يمارس رياضة التنس، ويدرّب بين فترة وفترة، حتى فتح نيت تنس أكاديمي قبل سنتين.

المكان كان صاد في الدرعية، وفي مكان مفتوح، شرح، ونفاهة.❤️
جنبه بادل أب، وملاعب المونديال لكرة قدم.

المدخل كان غير واضح أول ما وصلت، وصعب الوصول، سألت واستفسرت حتى وصلت له، وما فيه إضاءة كافية عند المدخل. لكن المواقف كافية وواسعة.

أخذت المضرب من عند الاستقبال، بعد ما تأكدوا من حجزي.

ورحت لغرفة تبديل الملابس، المكان مرتّب ومريح ونظيف.

بعد ما جهّزت، رحت لملعب رقم 3، كما هو موضّح في الحجز، والملاعب المغلقة بطبيعة الحال واضحة.

كان فيه جلسة انتظار عند الملعب، لو وصلت بدري وقدامك أحد تنتظره على ما يخلص. 

بدأت مع المدربة «ماخا» من جورجيا، عمرها 36. تقول: من عمري 6 - 5 وأنا ألعب تنس. 

سألتني لو أعرف ألعب أو تدربت مع أحد، وبدأت تختبر مدى معرفتي باللعبة. 👀

في البداية كان فيه كم هوشة، على حب المثالية وتحميل نفسك أعباء، وهي لعبة المفترض أنك تستمع إذا كان هدفك أن يكون متنفس مب عبء إضافي. 😆

قالت: اسمعيني، لا تفكرين في شيء وتحلّلين متى بتجيك الرمية. خليني أنا مخك وأنتِ العبي، لأنك تفكرين أكثر من اللازم.

لعبت مرة، ومرتين، وثلاث، حتى لاحظت بعض الأخطاء في لعبي. جابت ستاند الكاميرا وحطت جوالي، وصورتني وورتني كل خطأ! وتوقفني حتى أصحّح خطئي.
ومع التصوير تقدر تشوف نفسك، وتشوف الأخطاء اللي ما تحس فيها. 👁️👁️

والصدق أنها أول مدربة تستخدم هالأسلوب معي، وهذا الأسلوب خلاني أستوعب أخطائي بشكل واضح.

لعبت بعدها «رالي»، وهي اللحظة اللي تبدأ فيها تبادل الكرة بشكل مستمر بين اللاعبين بدون انقطاع. والفكرة هنا كنت ألعب بعد تصحيح أخطائي، وأثبّتها بالطريقة الصحيحة. ✅

اللي عجبني في «ماخا» أنها حيّة ونشيطة، وبشوشة وتفهمها وهي طايرة. وحتى تحاول تفهم وتوصل اللي شافته بأفضل طريقة ممكنة. من خلصت وأنا أقول أكيد أنها ما بتكون الحصة الأخيرة معها. 💯

بعد ما خلصت، أخذت جولة في المكان وعلى الملاعب.

وفيه ملاعب ومدربين للصغار.

التجربة بشكل عام: 

•  عجبني من تجربة الحجز وجود تطبيق خاص فيهم، لكن كل ما فتحت التطبيق كنت ألقى التذاكر محجوزة بالكامل. تواصلت معاهم، وقالوا لي الحجز يفتح الساعة 11:00 الصباح كل يوم. لكني حجزت وهو مكتوب محجوز بالكامل! فالأمر غريب شوي، يمكن لو تضبط تجربة المستخدم بتتحسن التجربة أكثر. 👩🏻‍💻 

• تحميل التطبيق من 👈🏼 هنا  📱

•  أول ما وصلت سألت عن المصلّى؟ واكتشفت أن ما فيه مصلى، بس غرفة فيها سجادتين. تمنيت لو وُجد مصلى. 🕌

•  المدخل لو كان أوضح، وسهل الوصول له، بتكون تجربة الوصول أفضل. 🚏

•  عجبتني الاحترافية في الاستقبال، ووجود خفايف وثلاجات موية، كأنها بقالة مصغّره.🍎

•  فيه كراسي للانتظار في كل مكان. 🪑

•  عجبني الاهتمام بشكل الممرات داخل الأكاديمية، والمشهد البصري، والنظافة. 🖼️ 

• الأسعار مرتفعة قليلًا، 340 ريال للحصة الواحدة. 💳

• عندك خيار تحجز حصص تدريب، أو خيار حجز الملعب فقط. 🎫

جاك الفصل الذي يُحيي الذكريات! ⛺️
أكثر الفصول قدرة على صناعة الذكريات: الشتاء.
فيه تُكتب الحكايات، وتُعزف الألحان لتدفُق الليالي، ومن أجوائه ترى العالم بلون مختلف.
وشتاء السعودية 2025 أعظم مصنع لذكريات الشتاء!
«حيّ الشتاء» يجمع تجارب مختلفة في كل مدن السعودية ووجهاتها السياحية، ليكون الشتاء فصلًا لا يضيع من ذاكرة من يعيشه.
«حيّ الشتاء» وحيّاك في السعودية.

أثناء رحلتنا لاكتشاف ملاعب التنس (اللي وصلت إلى ثمان ملاعب)، كانت معنا محررتنا مرام الضبيبان، وهي أحد أعضاء الفريق المعروف عنهم حب التنس. ❤️

مرام تلعب وتتابع تنس من 2012، تقول: «أبوي كان يلعب تنس، وعنده مِضرب. أذكر وقت متابعتنا للمباراة لفّيت عليه وسألته إذا اقدر أستعير مضربه. ومن هنا بدأت القصة..» 

صارت مرام تراقب حركات اللاعبين وتقلدهم وتلعب في كل فرصة تجيها. ودخلت مجموعة لهوات التنس من 2017. 🎾

وبدأت العام الماضي تدرّب اللي حولها تنس، ولكن بنطاق ضيّق.

جربنا معها ملاعب تنس حتى نطلع بالتوصيات، واستبعدنا بعضها، ونقّينا معها اللي شفناه ملائم للمعايير أعلاه.

ووصلنا لكم بهذه التوصيات 🏅

الأكاديميات والملاعب 🏟️

• أكاديمية راكت تنس، يميّزها مكان الملعب، تحسّ أنك في وسط مزرعة، وفيها ممشى بين الملاعب. موقعها جزء من مساحة مركز الملك سلمان الاجتماعي، في منتصف الرياض تقريبًا، والمسافة لها من كل منطقة تعتبر منطقية. وقريب منها محطة أرض المعارض للي يفضّل المترو. 🚇

جرّبنا مسبقًا مع كم مدربة: ماري وفاطمة، ولهالعدد جربنا حصة تدريبية مع إيستر. في ملعب رقم 2 المدربة رهيبة، نَفَسها طويل، وتوجيهاتها واضحة ودقيقة، وتُدير وقت الحصة بامتياز.

ويميزهم توفير ملاعب مغلقة مناسبة للنساء. 🏓
سعر الحصة التدريبية كان 299 ريال.

• أكاديمية بيت التنس، لهم ثلاثة فروع في الرياض. وأوصي تحديدًا بالملعب العائلي في فندق ماريوت فرع المطار. مميزاته كثيرة: حجزه سهل عن طريق موقعهم، وفيه مدخل ومواقف خاصة بالأكاديمية، فما تضطر تدخل الفندق عشان توصل للملعب.

أكثر ما يميّز هذا الملعب هو سعر التأجير المنطقي:
لو عندك مِضرب وكرات تنس، بيكلفك حجز الملعب لمدة ساعة 143 ريال فقط. 💰

وإذا تبي تتدرّب لحالك بكفاءة عالية؛ يوفرون جهاز رمي الكرات بمبلغ 172 ريال إضافية.🎾

• أكاديمية إن تنس، لهم فرعين في الرياض. جربنا فرع كراون بلازا المدينة الرقمية، جزء من كراون بلازا. اللي يميزه أنه ملعب واحد فقط، بإطلالة على المدينة الرقمية، والحجز عن طريق موقعهم، عندهم برامج ودورات متخصصة بالتنس. 

سعر حجز الملعب لمدة ساعة: 180 ريال.
سعر الحصة تدريبية لمدة ساعة: 299 ريال.
التجهيزات 🎾

• ترايد إن، متجر إلكتروني يوفر كل ما يخص التنس, ورياضات المضرب. سواء كنت تبحث عن مضرب أو ملابس أو أدوات تدريب. هو الوجهة الملائمة. 🎯

• الرائد للرياضة، لو ودك تصلح خيوط مضربك، أو تشتري واحد جديد، أو حتى تستأجر مضرب، فهم يوفرون هالخدمات، بالإضافة لأحذية وملابس التنس. 👟

 💡 تطبيقات تفيدك: 

• تطبيق راكتا تطبيق راكتا يحل أزمة قلة رفاق اللعب، فإذا ودك تلعب وما لقيت أحد، تقدر من خلاله تنشئ مباريات مع أشخاص على أرض الواقع. 🤯

• تطبيق سنجاب، تطبيق ساعدنا في حجز الملاعب والوصول لخيارات الملاعب. 

قبل ما أختم هالعدد، أثناء إعداده حضرنا اليوم الأول من بطولة (Six Kings Slam). 🎾

كنت أتوقع أن متعة التنس ما تشوفها إلا في لعبها، لكن لمّا حضرت المباراة انقلبت الموازين. 

التضاد بين مستوى الأدرينالين والحماس والهدوء والتركيز جنوني! 
حتمًا بتكون من الفعاليات اللي بحضرها وبتحمس لها في كل سنة. 🏆

وعلى طاري البطولات، في السنة الماضية اتفقت WTA -البطولة النهائية لموسم تنس السيدات- مع الاتحاد السعودي للتنس لاستضافة البطولة في الرياض لثلاث سنوات متتالية. 

وموعد البطولة الشهر الجاي من 1 إلى 8 نوفمبر 2025 في ملعب جامعة الملك سعود في الرياض.رابط التذاكر من ويبوك.