مخبز بين حارات الدرعية 🥪

أقدّس وجبة الفطور، وعادي الفطور يستمر إلى العصر من أهميته 😆
ومن تقديسي لهذه الوجبة، أحب أن أكتشف كل أسبوع تقريبًا مكان جديد، أو أجرب صنف جديد عند الأماكن اللي تعودت عليها، لذلك هالعدد من صلب روتيني الأسبوعي. ❤️
فطور في مخبز «آقيا» وتوصيات الخبّازة بدور باشميل، فرد من العائلة اللي تملك «باء بيك هاوس» و«ليدي فينقر» وتشغّلها.

هالمكان أذكر زرته قبل سنتين تقريبًا، وكان مغمور في مكان متوزّي في أحد حارات الدرعية. 
كان محلّ واحد، وهو «آقيا»، قبل ما يفتحون «مون» قبل حوالي ثلاث أسابيع. جنب محل سكوترات. المحلين هادية، يفتحون فترة النهارية، ويقفلون منتصف اليوم. 

صاحبة المكان غادة، واقفه على حلالها بنفسها، وتشوفها موجودة في أغلب الأوقات.

أول ما تدخل، بتستقبلك ريحة المخبوزات اللي مالية المكان، الريحة المفضلة بعد البخور❤️
وبتستقبلك غادة وتزيد من حفاوة الاستقبال. بتلاحظ أن المكان ملموم، وعدد الطاولات محدود، تقريبًا 6-8 طاولات، وغالبيتها لشخصين، ثلاثة.

المخبز بعد التجديد صار مقسوم لقسمين «آقيا» المتخصص بالشطائر. و«مون» متخصص بالحلويات والمخبوزات الحَالية. يفصل بينهم المدخل فقط وتوصل للإثنين من نفس الباب.
والطلبات كلها تجمع الاثنين. 

أول ما تجلس يجيك الموظف «جون» يناولك «باركود قائمة الطعام»، وكنت الوحيدة اللي استخدمته 🤔 لاحظت أن أغلب اللي يجون يطلبون بدون ما يشوفون القائمة.

كل أحد يعرف طلبه مسبقًا ويقوله مباشرة لـ«جون». لأن غالبية الموجودين زبائن المحل، متعودين على المكان ويعرفون طلباتهم. وهذا اللي يغلب على المكان، شعور الألفة، المكان اللي ترجع له بسبب هالشعور غالبًا. 🤷‍♀️

طلبت شطيرة بيض وجتني راهية، اللي يحبون الحشوات المليانة بتعجبهم. عبارة عن شطيرة بيض مع جبن فيتا، وجرجير وطماطم كرزية، وبصل مكرمل والكثير الكثير من جبن البارميزان المبشور.🥪

تقول غادة: المكان فاتح من سنتين، وقبلها بسنة كان سحابي. لكنها مازالت إلى اليوم تجدد وتطور في المكان. سألتها عن قصتها،  وقالت «أنا بالأصل مهندسة، وفي وظيفتي السابقة، كنت لما أبي آخذ طاقة وأفطر ما ألقى مكان يسوّي فطور مناسب للناس اللي تشتغل، سريع ولذيذ. اللي يشتغل يتعب، ويبذل طاقة وعشان ينتج يحتاج وجبة تكون غنية ومليانة بالمكونات الصحية، وجبة راهية تعطيك طاقة تكمّل شغلك، واقترحت على دوامي السابق، ساندوتشات للموظفين، لكنهم رفضوا، فسويته بنفسي وقررت أفتح "آقيا"». 
عشان كذا بتلقى خيارات متنوعة، الثقيلة والخفيفة والنباتية ويركزون على أن كل شيء يكون طازج. الخبز يخبز يوميًا والأجبان تتحضّر عندهم. 🥖🧀

ومن باب الفضول استأذنت غادة أدخل المخبز، ونشوف الكواليس. 
وعلى حظي كانت تجرب وصفة «سينابون» جديدة بخميرة الساوردو. وعزمتني أجربها معها.

تقول غادة أنا مو بس أدير هالحلال، أدخل وأخبز وأجرب وصفات جديدة مع الفريق، أول مطبخ بديت فيه كان 10 متر، ومازلت أكبر ويكبر المطبخ معي.

بعدما جلسنا وصل الطبق المنتظر، سينابون، مقرمش من برا وهش من الداخل، والتجارب كانت كلها حتى تضبط وزنية القرمشة.

وفي هذي الأثناء كان المكان شبّه فاضي، فخلتنا نجرّب معها كم وصفة مختلفة لشطائر جديدة بتنزل في القائمة.

زرت المكان مرة أخرى، ولكن بصحبة حتى يكون فيه متسع لتجربة أطباق جديدة.
اللي يحبون الأكل، بيفهمون كلامي زييين، تأخد معك كم شخص عشان تقدر تجرب كلش. 😆

جربنا كم طبق، وكانت هالفطيرة الفائزة بالنسبة لنا.
فطيرة حلومي بالفليفلة والعسل، فطيرة راهية والنكهة فيها غنيّة، صح فيها عسل بس ما كان باين مرة وكانت الحرارة شويّ طاغية، لكن شيء من الآخر، لذيذة!
تأخذ في تحضيرها تقريبًا من 25-30 دقيقة. 
توصلك من الفرن مباشرةً، ساخنة. اعتبره طبق «حنون» هذا من الأوصاف اللي استخدمها مؤخرًا،
يطلق على الطبق اللي يطبطب عليك.❤️

لاحظت أن فيه بعض الملاحظات اللي سولفت فيها مع غادة عن تحضير القهوة، وشفتها تطبقت في زيارتي الثانية. شعور أن راعي الحلال يسمع لك ولا يسلّك لك. بل مهتم فعلًا يحسن. 🥇

تفاصيل المكان والجو العام تلقى فيه روح صاحبته. كأنه بيتها. 
تجلس في مكانها المفضل في زاوية المحل. 

اللوحات بالمكان من رسمها 🎨

التجربة بشكل عام

• يفتحون من 7:30 الصباح ويقفلون 4:00 المساء وفي الويكند 5:00 ☀️.

• المكان ملموم يناسب كعدد أشخاص، شخصين أو أربعة كحد أقصى، لأن الطاولات والمساحة صغيرة. 

• الخيارات متنوعة، حاول تجيب معك صحبة حتى تقدر تجرب أكثر من طبق 🍽️

• ما عندهم إلا نوع واحد من القهوة، وهي قهوة اليوم. 

• الأسعار:

1. شطيرة « All Over Yolk » بـ 27 ريال.

2.  «فطيرة حلومي بالعسل» بـ 37 ريال.

3. قهوة اليوم: 11 ريال.

• يطولون بالطلبات لو كانت تحتاج وقت للتحضير، لكن بيعلمونك قبلها بالوقت المتوقع. 

• أعجبني اهتمام غادة بالزبائن ووجودها، تقول «أعرف كل زبائني لأني دايم موجودة، وأعتبره مجتمعي اللي أحبه.»

• إذا لقيت غادة في المكان؟ حاول تأخذ منها توصية أيش تطلب. لأنها بتضبطك. 

• موقعهم في الدرعية.📍

استلهام توصيات هالعدد كان وأنا أكل «كلوب ساندوتش» يكاد يكون الأفضل في الرياض، من «ليدي فينقر».
طعم الخبز، الدجاج، واستواء البيض، كانت كلها لذيذة.😋

جلست جلسة طارفة مع بدور باشميل، أحد أفراد عائلة باشميل، المالكين لمخبز «باء بيك هاوس» مخبز الحيّ في الرفعية و«ليدي فينقر» في حي المؤتمرات اللي أضافوا عليه برنش حديثًا. 

أحب هالمكانين، لأنه أغلب ما يقدم عندهم أطباق لذيذة، ودائمًا فيه تطوير لأطباقهم.
والسبب الثاني العائلة كاملة قائمة على المحلين، تشوفهم في المطبخ وفي أرجاء المكان، وأول ما يشوفونك بيحتفون فيك. 
بدأو في المجال من 2022 بعد ما كانت بدور تحب تخبز كوكيز وتبيعه بالمدرسة، وعلى أيام الجامعة تركت القانون وكملت في اللي تحبه وامتد جذوره للعائلة كلها.🧑‍🧒‍🧒

وبما أن أطباقها في قائمة طعام المحلين لذيذة، سألتها عن أفضل الحلويات والمخابز في الرياض وكانت هذي توصياتها 🍰🥐 : 

سوفليه من صدى التحلية - السليمانية. 

• ألذ سوفليه في الرياض، يقدم حار ويسوونه قدامك. 

•  تعوّدت أمر على هالمكان مع الوالد، من سنوات حتى الآن. ويعتبر أول حلى طحت عليه وأنا صغيرة. ❤️‍🩹

كوكيز من كرست كورنر - الربيع. 🍪

• صح المحل مشهور بالأكل الصحي، بس اللي ما تعرفونه هو جودة الكوكيز عندهم. 

• عندهم خيارات صحيّة أخرى مثل البراونيز وتشوكلت بار بالفول السوداني.

• عندهم فرعين كذلك في السليمانية و عرقة

كيكة الفراولة من يمييز - المروج. 🍰

• محل حلويات متخصص بالكيكات الكلاسيكية، «البلاك فورست» و«كيكة الفانيليا بالفراولة». 

• المكان صغير وملموم، وسط الحارة بحيّ المروج. 

• كيكاتهم من مفضلاتي، وأشوفها من أفضل محلّات الكيك في الرياض. 

مفروكة من يوميات - الورود. 

• مطعم لبناني لشيف وعائلتها. دلوني عليه الوالد والوالدة، فالتوصية ما عليها كلام. 💯 

• عندهم مفروكة لذيذة، وهي خياري الأول إذا اشتهيت حلى شرقي. 

• طعم الفستق وموية الورد فيها واضح ولذيذ والقشطة راهية، كأنها شغل بيت. 😋

بابكا الشوكولاتة من بيكس - التعاون. 🍫

• أحب المكان كامل عمومًا، وبابكا بعجينة الكروسون، والشوكولاتة خصيصًا.

• تعجبني عجينتهم ونوعية الشوكولاتة اللي يستخدمونها. 

• توصية على الطاير، عندهم شطيرة حلومي من مفضلاتي. 🥪

• عندهم فرع ثاني في الرحمانية. 

العصيدة الحضرمية من مطعم التآلف - المنصورة 🥣

• لو اشتهيت شيء حالي بالتمر فهو خياري الأول. 

• من عادات وتقاليد الوالد بعد صلاة الجمعة، يجيب لنا منه. 

مخبز أروانا - حي الملك سلمان. 🥐

• مكانهم حميمي، وملموم. يسمون نفسهم «بيت المخبوزات» فيه أنواع كثيرة من المخبوزات بجودة عالية. 

• من أفضل الأماكن لتقديم خبز الساوردو.

سينابون من مون بيكري - الدرعية.

• سينابون كلاسيكي. فيه عدّة نكهات مميزة ويغيرون بين فترة وفترة فيها.  

• وذكرناه في تجربتنا كاملة في الأعلى. 👀 

تعبت من البحث عن أخبار الكرة السعودية؟ 😵‍💫
يأتيك العلم كل صباح على بريدك في نشرة «مصدر مطَّلع» من ثمانية: يناقش الصحفي نواف العقيل مستجدّات الكرة السعودية أولًا بأول، ويروي لك قصة الخبر الأبرز من جميع الزوايا..
ويرشّح لك أفضل المحتوى الرياضي، مع فقرات متنوّعة تغطي كل ما تحتاج معرفته عن كرة القدم.
كل هذا وأكثر يصل بريدك ليعرّفك على كل ما يحدث أولًا بأول.

كن أول المنضمّين. ⚽️