جولة في صالات السينما

السينما أكثر مكان ينقذك إذا ما عرفت وين تروح، خصوصًا لو كنت لحالك، وتبي تفصل، ما تبي تفكر، بس تحتاج وقت تقضيه بدون هدف.🤷‍♀️
لذلك هالعدد كان مفضّل، فريق دليلة جرّب العديد من صالات السينما المختلفة بالرياض، حتى يصلك هالعدد بأفضل شكل 🎞️

عرفتوا شعور تكرار وتيرة الأيام؟ وإحساس أن كل شيء مكرر؟ ما فيه غير البيت والدوام؟ 😞

وتمر الأيام على نفس النسق بدون ما يتغير أي شيء، حتى كسرة الروتين صارت بعض الأحيان متوقّعة.

لذلك أحب أسوي شيء غير متوقع يكسر هالشعور، ويشحن الطاقة ⛽️

من ضمنها الروحة للسينما في وقت ميت، وقت ما فيه إلا أنا. الظهر... العصر، أشوف فِلم غير مُخطَّط له. أجي غالبًا للسينما عشان الفِلم، وفي الجانب الآخر:

• جو الروحة للسينما عمومًا. 🎬

• أكل السينما. 🍿🍔

• الفصلة اللي تخلي عقلك ما يحتاج يفكر لزمن محدود.✈️

قلت بجرب «بيت السينما»، كسرة للروتين لأنها تقدم تجربة مختلفة عن صالات السينما المعتادة.

وهي تعتبر سينما فنية فاخرة، مختلفة في تصميمها الكلاسيكي. ✨
عندهم أفلام فنية حديثة، وأفلام كلاسيكية عربية وأجنبية، وأفلام عالمية، وتجارية. 🎞️
في موقعهم كاتبين أنها بدأت من 2020، لكن التشغيل الفعلي للجمهور أعتقد في 2024، عبر أول منشور لهم على انستقرام.

حجزت فِلم كلاسيكي، قديم (Before Sunrise) أُعيد عرضه من جديد. وهذا من أهم ما يقدمه «بيت السينما»، أنه يقدم لك مختارات كلاسيكية يعيد عرضها، بجانب الأفلام اللي نشوفها في السينما عادةً.

كان هذا الفِلم من قائمة الأفلام اللي ودّي أشوفها، قلت بس وقته أسيّر عليهم وأشوف الفِلم.

• بيت السينما، مجمع ون سكوير. 

• الاثنين، 4:30 العصر. 

 لمّا دخلت للمبنى الرئيسي، وقلت لهم اسم الفِلم، قالت «لا مب من هنا» هنا المطعم، والصالة الكبيرة الرئيسية فقط. عرفتوا شعور أنك تدخل ويقولون لك قفلنا؟ جاني الشعور نفسه. 😅

غرت من اللي صالتهم الصالة الرئيسية، لأن المكان بديع، كأنك دخلت حقبة زمنية مختلفة، شعور الألوان الفاقعة، والمخمل في كل مكان. والأباجورات موزّعة بشكل يعطي المكان روحه ولونه. 

دلّتني الموظفة لمكان الصالات الثانية، وتقريبًا جيرانهم في نفس مجمع ون سكوير. الوصول لها ياخذ دقيقة أو أقل، بس الغريب أنك تطلع من المكان نفسه وتروح مكان ثاني، كأنهم مكانين منفصلين. 🤷‍♀️

بعد ما تدخل تتفاجأ أنك في مكان كأنه عمارة مكاتب، مب سينما بصالات كلها في مكان واحد. 
بعد ما تدخل العمارة تروح الدور الثاني، وتشوف السينما، متوزية لحالها على اليمين، تدخل، ويرجع لك الجو نفسه في المكان الأول.

صح المكانين طبق الأصل بالشكل من ناحية الطابع القديم، وألوان البوسترات واللوحات، وحتى الستاير اللي وراها باب السينما، لكن الفاصل هذا بينهم قلّل الدهشة.

بعد الممر اللي فيه بوسترات الأفلام، بتلقى قبالك مقهى مع جلسة صغيرة وكم طاولة، حلوة لو جيت بدري تتقهوى قبل يبدأ الفِلم. ☕️

على حظي، كانت الصالة اللي حجزت فيها أصغر صالة وهي صالة «1». 
كأنها سينما بيت كشخة.. لكنها سينما بيت. 😆

عندي حساسية من الأماكن المغلقة الصغيرة، فعشان كذا ما ناسبتني، بس بتناسب الأشخاص اللي يفضلون الخصوصية.🔒

تجربتي بشكل عام: 

• تجربة وفكرة جديدة. 🆕

• الخدمة كانت رائعة، وجميع الموظفين خدومين. ❤️

أمور قلّلت من جودة التجربة: 

• اقرأ عن الصالة اللي حجزت فيها قبل، حتى تكون توقعاتك في محلها.

• انفصال الصالات عن بعضها.

• لأنها تجربة فاخرة، توقعت أقدر أتحكم بالكراسي، وفيه خيارات للراحة إضافية.

• جودة الفِلم توقعت تكون مختلفة عن الموجود في الانترنت.

• طلبت برقر وكان عادي، طعم وتقديم.

على الجانب الآخر

 جرّب الفريق السينما في مرتين مختلفتين، لعل كان عندهم توقّعات غير توقعاتي، ورضوا عن التجربة، والأسباب هي:

•  كانوا في الصالة «3» (الرئيسية)، وهي أكبر صالة من الصالات الثلاثة في السينما، و موجودة في المبنى الرئيسي اللي طلعت منه في البداية، فما حسوا بالفصل بين المكانين.

• معيارهم كان تصميم المكان، والتجربة المختلفة «شكليًّا» فإذا كنت تبي متعة بصرية، بيكون خيار مناسب.

• الأجواء العامة في المكان. تقول شهد: « تحسسك أنك شخص أرستقراطي».

التجربة تعتمد على توقعاتك. تبي تشوف فِلم قديم كلاسيكي بتجربة السينما؟ أو تبي تجربة جديدة مختلفة مع صديقك؟ المكان مناسب. ☑️
لكن لو بتشوف الأفلام المعتادة... عن نفسي بفضّل زيارة أماكن مختلفة.

تنويهات تهمك: 

• سعر التذكرة 90 ريال، تقدر تحجزها عن طريق موقعهم الإلكتروني.

• قائمة الأفلام موجودة في موقعهم. تقدر تبحث عن الأفلام القديمة اللي تُعرض حاليًّا. 

• موقعهم في حي الربيع في مجمع ون سكوير. 

• عندهم مطعم ومقهى منفصل، بطابع المكان نفسه.

• عندهم الأسبوع الدولي، يعرضون أفلام من دولة معينة، وتكون قائمة الطعام أيضًا من نفس الدولة.

• عندهم حجز خاص للمكان، وإمكانية تأجير السينما أو عقد الورش فيها.

ودّك تلفّ الرياض بميزانية أقل؟ 💸

في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.

تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.

لوّن صيفك، واحجز الان.

وش سالفة تجارب السينما في الرياض وهل فعليًّا تختلف كل تجربة عن الثانية؟

صالة  «Screen X» - موفي سينما 📽️

تختلف بالشاشة، وتعطيك مشاهدة بانورامية بثلاث شاشات، وتوسّع لك مجال الرؤية، ويحاوطك فيها الفِلم 270 درجة تقريبًا. 💥

• التجربة متاحة لأفلام معيّنة فقط تقدر تعرفها من خلال الموقع. 

• الشاشتين الجانبيات ما يشتغلون طول الفِلم، بس في لقطات معينة، عشان تحسّسك أنك داخل الفِلم.

• شفنا فيها «F1» وكانت مشاهد السباق تحسسك أنت سائق في الفورميلا. 🏎️

• سعر التذكرة: 75 ريال. 💵

• موجودة في اليو ووك، والنخيل مول. 

تناسب تحضر فيها أفلام الأكشن أو أفلام الخيال العلمي، شفت الأفلام اللي ودّك تعيش معهم؟ هذي الصالة تناسب هالنوع من الأفلام. 😆

ڤوكس - ڤيا رياض. 💵

فرع خاص من فروع شركة ڤوكس، يقدمون لك فيها تجربة فاخرة بسبع صالات مختلفة بتصاميمها، جربنا صالة «إنترستيلر» اللي بطابع الفضاء والنجوم. 

• قائمة الطعام عندهم متنوعة... طب وتخيّر. 😋 

• عندهم منطقة انتظار رايقة ويستقبلونك فيها بمشروب ترحيبي أول ما توصل.

• المقاعد مريحة جدًّا، وتقدر تمدّد. 🦭

• تطلب من مقعدك والطلب يجيك لين عندك.

• العجيب أنك ما تطلع إذا تبي دورة مياه -الله يكرمك- لأن موجود في كل صالة دورة مياه خاصه فيها.

• سعر التذكرة غويلية: (205 ريال) غير شاملة الأكل. 💵

• حلوة تروح لها لو بتكافئ نفسك بليلة سينمائية فاخرة، أو إذا محتار وين تصرف راتبك. 🤑

بوتيك - موڤي سينما. 🎭

أربع صالات بطابع مختلف: «المكتبة» و«بيڤرلي هيلز» و«لندن» و«بابراتزي»، وكل صالة اسمها يوحي بتصميمها. الجدران والمقاعد كلها بألوان قويّة. 📸 

• قائمة الطعام اللي عندهم نفسها الأساسية حقت موفي. 

• ما تقدر تحدد الصالة، أنت تحجز والصالة على حظك. 🤣

• سعر التذكرة: 64 ريال. 💵

• المقاعد مو مريحة . تختلف عن مقاعد السينما العادية.

• موجودة في تالا مول - البوليڤارد.

تناسب تشخّص فيها مع أطفال العائلة، ولّا اللي أعمارهم تحت العشرين، بيستمتعون بتصميم الصالات وبيتحمسون لفكرتها.

صالات  Suites - موڤي سينما. 🎦 

سينما «VIP» من سلسة صالات موڤي سينما. صالات منفصلة تمامًا عن السينما المعتادة. فرعهم في البوليڤارد وفيه جلسات تطل على البوليڤارد كامل.

• عندهم قائمة طعام خاصة بخيارات متعددة. 🍽️  

• فيها منطقة انتظار رايقة، يقهوونك فيها قبل الفِلم. ☕️ 

• المقاعد جلد ومريحة وتقدر تمدّد بعد. 💺

• تطلب وأنت في مقعدك، والطلب يجي لين عندك.

• سعر التذكرة: 195 ريال، معها البوب كورن والمشروب. 🍿

• موجود في اليو ووك - النخيل مول - البولڤارد.

خيار يناسب أنك تَفْصل عن التجارب المكرّرة، وتناسب بوجود صحبة مع الأصدقاء أو العائلة، وما نقول «لا» للاحتفاء بنفسك. 😆