توصيات آيسكريمات في الرياض 🍦

بعد إعلان ثمانية عن نقلها لبطولات كرة القدم السعودية، جهزوا رحلة لهونق كونق لتغطية بطولة السوبر السعودي. وإلى آخر اللحظات كنت ضمن المسافرين معهم، لكن لأسباب مجهولة راحوا بدوني على طريقة جب نعالك وتعال. 😔

ما تخطيت، وبحثت عن أي شيء له علاقة بهونق كونق بالرياض عشان أطبطب على خاطري، ولقيت محل آيسكريم جاي من قلب ثقافة هونق كونق.
في هالعدد تجربة محل آيسكريم من هونق كونق، وتوصيات من ملك الآيسكريم عبدالرحمن العريفج.

أعترف إني غير ملم بعالم الآيسكريم، وسوّيت حلقة كاملة في سلسلة توصيات معيشية مع «ملك الآيسكريم» عبدالرحمن العريفج عشان أفهم هذا العالم، شوفها في حسابات معيشة. 👀

ولأن حرارة الرياض ما يكفيها مكيف وظل، قررت أجرب محلات آيسكريم مختلفة.

جرّبت هذا الأسبوع محل «The Peak: hong kong Ice House».

المحل في حي الملك فهد، يمديك تروح له بسيارتك أو بالمترو. 🚄

واللي يسيّر على حي الملك فهد باستمرار، بيعرف أن حي الملك فهد، من الأحياء الحركية، ومليان بالخدمات المختلفة، كل شيء تبيه موجود هناك، القهاوي والمطاعم وشارع الخياطين، وطيبة وكلش موجود. 💯
لذلك خلني أغششك بكم محل أزورهم إذا زرت الحي، قبل لا أقولك عن محل الآيسكريم:

• إذا مرّيت هالشارع الصباح فيه بوفية «المذاق الفاخر» تقدم ساندوتش بيض بخبز الصاج، خذ معه شاي عدني عشان تكتمل الوجبة. 🥪

•  فيه مطعم «ذوق وادي تهامة الأصيل» يقدم فطور وغداء وعشاء، بس مدفون الدجاج عندهم حكاية، ولا تنسَ تأخذ معه سلطة «شفوت».

• وفيه مكان سري بالخلف اسمه «ضفّة»، وهو مكتبة ومقهى. مكان ملموم ورايق. 📚

نجي لمحلنا، إذا جيت بسيارتك احسب حساب أزمة المواقف. 😅
لإنك بتوقف بعيد مثلي، يعني ممكن يبعد دقيقتين إلى ثلاث دقايق مشي، لأن قدام المحل حفريات مغطية المواقف بالكامل. 

وصلت للمكان على الساعة 7:30 بعد المغرب وكان مزدحم، واضطريت أنتظر حول 10 دقايق عشان ألقى طاولة. المكان ملموم وحميمي، وبتتفاجأ بكثرة الزباين الآسيويين فيه.

المحل يقدم مثلجات مائية «Sorbet» بطريقة هونق كونق، واللي يسمونها «Shaved Ice»، وهو عبارة عن قطعة ثلج تُبشر وتكوَّر ويوضع بداخلها كريمة مغطاه بنكهات فاكهية ونكهات مُحلّية مثل الكراميل أو الشيرة.

تجربة الآيسكريم هنا مختلفة عن أي مكان لأن:

•  مخلتف عن أنواع الآيسكريم اللي متعودين عليها. 🍦

• الآيسكريم الواحد يكفي ثلاثة إلى أربعة أشخاص بالراحة. وعادي تشوف عائلة كاملة مجتمعين على آيسكريم واحد. وهذا المتعارف عليه في تقاليد هونق كونق، إن الأطباق في الغالب تكون تشاركية، حتى أكل الشارع يقدّم بهذه الطريقة. 🇭🇰

• ولأن راعي الحلال موجود، ولحسن حظي صادفته، شاب اسمه (King) وأخذت منه القصة كاملة.

  

يقول كينق: 

«بعد خبرة في الشركات التقنية في هونق كونق، فتحت شركتي بنفس المجال نمّيتها وبعتها. وللأمانة المجال ممل، ومن البداية ما كان يستهويني.. فصارت معي فلوس لازم أتصرف فيها. 💸
 فتحت خريطة العالم أبحث عن مغامرة جديدة، وسألت نفسي: أيش أكثر مكان ما أعرف عنه شيء؟ ووقع الاختيار على السعودية، وتحديدًا الرياض.. شلت شناطي وتوجّهت للرياض.» ✈️

ومع السواليف قال لي عن أول أسبوع قضاه في الرياض، يقول: «صار لي حادث سيارة والغلط علي 100% وتفاجأت بصاحب السيارة الثانية نزل يتطمن علي رغم إنقليزيته الضعيفة، ولما عرف إني من هونق كونق وجديد بالسعودية، جلس يعزمني على مطعم قريب، وصدقًا انحرجت واعتذرت منه، وأخذ رقمي عشان يعزمني مرة ثانية، وقد كان.»

يكمل كينق: «بسبب هذا الموقف، ومواقف كثيرة عرفت إني في بلد مختلف. وعشان تكونوا بالصورة، شعب هونق كونق عملي، جاف بالتعامل، من الصعب تكوّن معه صداقات بسرعة، وهذا الشيء كنت أفتقده بشدّة. يعني مثلًا جاري محمد، كلما عزمني تكون هناك سفرة مليئة بالأطباق والمشروبات والكثير من الأصدقاء، وما يمديك تقول لا، حتى لو كنت شبعان. هذا الشيء نادر وصعب يحصل في هونق كونق.

بدأت جديًّا أفكر إني أفتح مشروع بالرياض. ولأني أحب الثلج المجروش من طفولتي 🍧
وما لقيت محل يقدمه هنا؛ قررت أقدم على هذه الخطوة وفتحت (The Peak: hong kong Ice House) بتاريخ 3 يوليو، 2025.

تفاجأت بسرعة انتشار اسم المحل بين الناس، واكتشفت أن الشعب السعودي منفتح بشكل ملفت للتجارب الجديدة وتبادل الثقافات بينه وبين أي ثقافة جديدة عليه. 💚

وعن الزبائن؟ كثير من السعوديين يقدمون لي نصائح بإدارة المشروع واقترحوا نكهات محلّية من ثقافة السعودية، وكيف أدمج بين ثقافة السعودية وهونق كونق. كسبت كثير من الأصدقاء بسبب هالمحل. ❤️
ويعجبني التعامل مع السعوديين، يكفي أنك تمزح مع الواحد مرة واحدة حتى تكسب قلبه. وأكثر مشهد أحبه من جيت الرياض هو (معركة الكرم) وقت الحساب. مشهد يعلمك عن السعوديين الكثير ويبيّن قيمة الكرم.»

بعد النقاشات والأخذ والعطاء مع كينق، اللي أشوفها من أهم الأجزاء في أي تجربة نخوضها في دليلة، خلّاني أختار النكهات، ونصحني بالأكثر طلبًا ونكهة الشهر. 📆

• الأكثر طلبًا: نكهة الليمون والتوت الأزرق. وكانت منعشة جدًّا وخفيفة، تحس بالثلج لكنّه منكه. سعره 52 ريال.

• وجربت نكهة الشهر: الفستق والتوت الأحمر. أعجبت صديقي، ولكنها ما أعجبتني، كانت ثقيلة. خذ حجم صغير لنكهة الشهر. سعرها 29 ريال.

•  جربت (crossaint custard tart)، وهي قطعة مخبوزة من عجينة الكروسان على شكل التارت ومحشية كاسترد، وكانت هشة وبقشرة مقرمشة، ينقصها كوب قهوة. سعرها 10 ريال.

  

بشكل عام: 

• التوقيت ⏱️: لو بتزوره يفضّل تروح بعد العصر وقبل المغرب عشان تتجنب الزحمة. 

• المواقف 🅿️: تذكر أن عند المحل حفريات، لو بتجي بالمترو أفضل لك. 

• الوصول🚏: لو بتروح له بالمترو فالوصول له من خلال المسار الأزرق، وتنزل عند محطة «حي الملك فهد 2». ويبعد عن المحطة دقيقتين مشي فقط.

• السواليف 🗣️: خل من ضمن تجربتك أن تتعرّف على كينق والعاملين في المكان، لأن كان جزء من تجربتنا سماع قصتهم وسواليفهم.

• العدد 🔢: بحسب كمية الآيسكريم يحتاج تجي مع أخوياك. يقول عبدالرحمن العريفج: «الآيسكريم فعالية جماعية». خذ اثنين أو ثلاثة من أصدقائك.

ودّك تلفّ الرياض بميزانية أقل؟ 💸

في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.

تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.

لوّن صيفك، واحجز الان.

عشان تكون تجربتك للآيسكريم متنوعة وثريّة، هنا توصية لكل نوع آيسكريم من «ملك الآيسكريم» عبدالرحمن العريفج:

الآيسكريم التقليدي: 

• محل «Sukkly Artisan» كل النكهات لذيذة، بس جرب نكهة تشيز كيك مع الكشمش الأسود. 

• محل «DARA’S ICE CREAM» لا تفوّت نكهة فادج القهوة.

• الجيلاتو: «ETNA ARTISAN GELATO» اختر من المنيو وأنت مغمّض، وصدقني ما بيخذلك.

• البوظة: «Marwan Arabic Ice Cream» نكهة القشطة بالفستق تنسّيك تعب أسبوع.

• آيسكريم الطفولة: ثلاجة المنصوري، الموظفين هنا طول السنة لابسين شتوي، بتلقى عندهم كل آيسكريمات الطفولة اللي انقطعت من السوق وانقرضت. اتصل عليهم قبل تروح عشان تتأكد إنهم فاتحين.

*محل البوظة وثلاجة المنصوري توصية من عندي، وعلى ضمانتي الشخصية.