وين أتعلم موسيقا في الرياض؟ 🎼
تجربة في معهد تعليم موسيقا.🎵 وتوصيات دسمة عن الآلات الموسيقية
أحب الموسيقا. 🎶
ولي فترة وأنا أهوجس أتعلم أحد فنون الموسيقا، وبديت رحلة بحث وسؤال المخضرمين في المجال.
كيف أتعلم؟ وين أتعلم؟ كم أحتاج من وقت؟ طيّب وش الآلة اللي اتعلمها أصلًا؟ وهذي مشكلة أعظم. حاولت أحلها في رحلة البحث 🕵🏻♀️.
لذلك في هالعدد العلم عندك، تجربة الأسبوع في معهد تعليم موسيقا.🎵 وتوصيات دسمة شوي عن الآلات الموسيقية.
دايم كنت أقول ليه ما عندي لون في الموسيقا؟ ليش أكثر من نوع يجوز لي؟ هل لأن أذني موسيقية؟ أو لأنه العكس؟ أسئلة وجودية الله يكفينا الشر.😆
حتى تزين العلاقة وأعرف وش أنا عليه قلت ليش ما أتعلم الموسيقا ويصير عندي تفضيل اتجاه العزف على الأقل؟ لكن السؤال وين ممكن أتعلم الموسيقا في الرياض؟
قبل ما أحدد المكان، بالبداية كنت محتارة وش الآلة اللي ودي أتعلم عليها؟ أحب الموسيقا العربية، لكن يقولون أن العود صعب ويبيله نَفَس! والبيانو يبي له مرونة وتحكم بالأصابع. وما خلصنا بين القيل والقال.
فقررت ما ألتفت للكلام، وأجرّب بنفسي. فأخذ مني تجهيز هذا العدد شهر تقريًبا من البحث، والتجارب.
لأن ما فيه شيء يجاوبك مثل التجربة، فقرّرت أحجز حصص تجريبية للبيانو وللعود، في كم مكان.
بعدها أقرر.
حجزت حصص بيانو مع ثلاثة معاهد موسيقية متخصّصة.
وحصتين عود.
وحصة مع «أبو رامي» أستاذ عود شعبي مخضرم في الحلّة.
لكن السؤال، ويا كثر الأسئلة، هل أتعلم عود مع أستاذ أكاديمي عنده دكتوراه في الموسيقا؟ ولّا مع أستاذ عود مخضرم؟ قرّرت أجرّب الاثنين... ليش لا.🤷
المهم، الحصص التجريبية عند أغلب المعاهد عبارة عن حصة تتعرّف فيها على أستاذك، يشرح لك بشكل سريع عن المنهج والآلة، تكون من ربع ساعة إلى 25 دقيقة تقريبًا، وغالبًا تكون مجانية.🤑
بدأت الرحلة هنا، المكان كان رهييب! بس المشكلة كانت في الحجوزات، وأغلب الأساتذة كانوا محجوزين لفترات طويلة، وأقرب الحصص تبدأ بعد كم أسبوع...
أخذت حصة بيانو تجريبية، لكن اللي ما خلّاني أتحمس أكمل معهم أنه ما يمديك تجي المركز تتدرب على الآلة لحالك، إلا يوم واحد بالأسبوع. وأنا كنت أدوّر مكان مرن أكثر في الأيام التدريبية عشان أتدرب عندهم على بيانو جودته عالية بالبداية. خصوصًا قبل أختار البيانو المناسب لي.
المعهد الثاني : معهد نمير. ومن البداية
ماناسبني.
ليه؟ لسببين:
لأن القاعة على حظي كانت كتمة، ورائحتها غير جيدة، والعجيب أن ما كان بالمعهد إلا أنا.
والسبب الثاني أن التعليم لأول ثلاث حصص أغلبه نظري، ومرّت الحصة كاملة والشرح على السبورة 🖍️ والصدق ممل أن أغلب التعليم نظري على أداة المفترض تتعلم فيها بشكل عملي في نظري.🥱
حصة مع أبو رامي
تعليم أبو رامي مختلف، وبسيط وقريب. جلسنا ساعة، نسولف عن العود، وعلّمني كيف أدوزنه.
أبو رامي صار له أكثر من ثلاثين سنة يدرّب على العود، ولعله يدرّب بالاعتماد على السماع أكثر. صح يدرّب بالنوتات، بس تقدر تعرف أنه متخصص بالتدريب على السماع. 🎼
كان صريح، وقال: « مرّوا علي طلاب كثير، ومن الحصص الأولى أعرف الواحد يقدر يعزف ولّا لا. 🤨»
يحمسك أنك تبذل أفضل ما عندك، لأن أنا والمنافسة أخْوِيا.
صح أني ما مسكت عود في حياتي، وأبي أتعلم من الصفر. لكن ولو.
سألته وش الشيء اللي يخلي الواحد عنده قابليه يتعلم؟ قال:
الأذن الموسيقية. لازم «تفهم نغم، وتسمع».
اليد المرنة. ✋
والأخيرة، الغاية الداخلية اللي تخلّيك تبي تعزف. 🎼
يكمل ويقول: «لكل واحد سبب داخلي ما يعلم فيه إلا الله. حتى أنا، غايتي اللي أعزف عشانها ما يعلم بها إلا هو سبحانه. ولازم السبب هذا يكون قوي كفاية أنه يعطيك دافع تستمر وتكمل، ولا ما بتعزف أبد.»
يحسسك أنه مو هواية، هو حب وشغف ودّك أنك تعيشه وتنغمس فيه.
لكن على كثر ما استمتعت بالجلسة معه وسواليفه اللي ما تنمّل ما كمّلت...
والسبب أن أبو رامي ما عنده مكان خاص فيه للتدريب، يا هو يجيك، أو تجي تتدرب عنده في محلّه.
بعد الصولات والجولات، عرفت المعايير اللي عشانها رسيت على «بيت الموسيقى»:
المكان مهيّأ.
تعامل المدربين احترافي ويناسب كل متدرّب.
جميع الآلات متاحة لك «يوميًّا» للتدريب.
المنهج ممتع، نظري وعملي.
وش يسوون «بيت الموسيقى»؟
من اسمهم، متخصصين بكل ما يتعلق بالموسيقا والغناء والرقص. وهم من أوائل الشركات السعودية اللي بدؤوا بتعليم الموسيقا، تحديدًا من 2018.
وعندهم تدريب على آلات كثيرة مثل العود والبيانو والكمان والتشيلو والقيتار والناي، وعندهم بعد تدريب على الغناء، وكلاسات للرقص اللاتيني «رومبا ـ تشاتشا - سالسا» و «باليه» و«هيب هوب» و«تانقو» و«هيلز» في فرع النزهة. عندهم بعد حصص تدريب موسيقا جماعية.
أخذت معهم حصص تجريبية للبيانو والعود. وكلها كانت بديعة.🌟
في حصة البيانو:
عرفت الآلة، وورّتني المنهج وطريقة التدريب اللي تتبعها. أخذت فيني فرّة في المكان وغرف التدريب. كل أنواع البيانو كانت من شركة «ياماها» وجودتها ممتازة.
في حصة العود:
الأستاذ كان ذكي، تخصصه الدقيق «تعليم موسيقا»، يفهم نفسية المتدرب، مو بس يعلمه. صارحته بالبداية إني محتارة بين العود والبيانو، فعطاني عود ومسّكني إياه طول الحصة. وقال اختاري الآلة اللي تسمعين لها أكثر وتطربك، ما درى أن عندي أزمة هوية. 🤕
الحصة الأساسية الأولى كانت الساعة 2:00 الظهر، في فرع الملقا في الدور الثاني.
الحجز كان عن طريق رقمهم في واتساب.
المكان فيه حوالي 5 قاعات تدريب خاصة، وقاعة كبيرة للحصص الجماعية.
الحصة مدتها 50 دقيقة.
بدأنا بالأساسيات. تعرّفنا على « النغمات الموسيقية - وحدات الإيقاع - وأوتار العود» وبسبب الحصص التجريبية تعديت كوني عليمية، فتعدّينا الدروس الأولية، جاز لي أن ما فيه منهج ثابت لكل حصة... يعتمد عليك وعلى تعلمك.
عطاني عود موب مدوزن، وعلّمني اسم كل وتر وأماكن مفاتيحها عشان أولّف الأوتار. عرفت كيف اقرأ النغمة على السلّم، وكيف نوزن الإيقاع عن طريق «نقرة المترونوم» — وهي المدة الزمنية اللي يحددها لك المترونوم عشان تضرب فيها الوتر.
بدأنا العزف على أول ثلاث أوتار « صول - لا - ري ».. وتفاصيل أكثر.
كانت الحصة ممتعة، وتعلمت فيها كثير، والشرح واضح وكافي. تأخذ في نهاية التدريب نسختك من أوراق الحصة عشان تتدرّب. 📄
بعد الحصة قرّرت آخذ ساعة التدريب اليومية، وجلست أعيد وأكرر في التمارين، لأن الموسيقا تحتاج تكرار... تكرار... تكرار. 🔃
لمّا خلصت تدريب، حصلت متدربات، وحدة منهم تتدرب طبول (درامز) 🥁 والثانية بيانو 🎹 أخذوا 6 حصص . وكان اليوم حصتهم الاخيرة.
سألتهم عن تجربتهم.
يقولون تجربتهم ممتازة، ولاحظوا تطوّر.
وفي النهاية رسيت على العود. لأنها أقرب وأحب لي.❤️
التجربة بشكل عام:
ممتعة، الموظفين متعاونين وحابين شغلهم، يحمسونك تكمّل. لأن التعلم يحتاج صملة.
التسجيل بالبداية من موقعهم الإلكتروني. تسجل بياناتك والآلة اللي ودك تتعلم عليها، بعدها يتواصلون معك للتنسيق.
إذا كنت محتار مثلي بين عدة آلات احجز حصّص تجريبية. 😉
لو ما عجبك تدريب مدرب، جرّب مع غيره، واثبت مع اللي يناسبك أسلوبه.
للحصص الفردية تأكّد من عدد مرات التجميد، لأن الحصص الجماعية ما فيها تغيير وقت أو تجميد. ⚠️
فرع النزهة كان أشرح وأكبر. عبارة عن دورين، الدور العلوي للرقص والأرضي للموسيقا والحصص الجماعية.
يدربون موسيقى من عمر 6 سنوات وطالع. 👧🏻👦🏻
ودّك تلفّ الرياض بميزانية أقل؟ 💸
في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.
تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.
سألنا عدّة أساتذة موسيقا عن هالتوصية، من ضمنهم العم أبو رامي، وسألنا محررنا أسامة بوجبارة.
لأن أصعب من أنك تلقى معهد زين هو أنك تلقى الآلة اللي تناسبك. 🤷♀️
وإذا قلنا تناسبك فحنا نقصد المعايير اللي تساعدك تختار العود الصح ولا الآلة الصح فمثلًا:
الآلات الوَتريّة «العود - القيتار - الكمان» 🎻 :
تعتمد بشكل كبير على نوع الخشب المصنوعة منه، وكل نوع خشب يأثر على الصوت، إما يكون دافي أو حاد. يعتمد على العازف واختياراته. ليه؟ لأن ارتداد الصوت داخل الآلة هو اللي يعطيها صوتها المختلف. وأفضل الأخشاب للعود هي:
الكوكو بولو: من الأندر والأغلى.
السيسم (الصاج الهندي).
الجوز الدمشقي.
الماهوجني.
اختيار الصانع وجودة الصناعة: العود من الآلات اللي لا تزال تُصنع يدويًّا حتى الآن، فاسم الصانع غالبًا له دور كبير في جودة العود.
لا تقع في فخ «العود التعليمي»: أكبر جناية يرتكبها المبتدئ في مسيرة تطوّره أنه يشتري «عود تعليمي»، لأنه عبارة عن عود رخيص الثمن سيئ الصناعة يبحث البائع عن مبتدئ لتدبيسه فيه. بينما أنت تحتاج العود اللي يسمّعك نغمات نقيّة، ويخلي أصابعك تتعوّد على المسافات الصحيحة للنغمات.
مسافة الدعسة: وهي المسافة بين الوتر وزند العود، كلما كانت الأوتار أقرب لزند العود كان أفضل وأسهل بالتحكم (لكن المهم أن قرب المسافة بين الوتر والزند ما يوصل لدرجة أنه يؤثر في نقاوة صوت الأوتار بحيث يطلع منها صوت زنّة).
حجم العود بالنسبة لجسمك: العود المثالي لجسمك هو العود اللي تعزف عليه وأنت مرتاح أثناء جلوسك على كرسي وظهرك مستقيم. لا تاخذ عود حجمه صغير وأنت صاحب جسم كبير والعكس، حتى ما تضطر تنحني أثناء العزف ويتأثر ظهرك، ولا تاخذ عود ببطن كبير
وأنت عندك كرش مثلًا😆، لأنه بيصعّب عليك تثبيته على ركبتك.
البيانو و «الديجتال» بيانو — أو زي ما يسميه البعض «كيبورد» 🎹 :
لو أنت مبتدئ وودّك تجرّب بالبداية، الديجتال أنسب لك، سعره أرخص وأخف وزنًا ومساحة، ويعطي إحساس البيانو وصوته. لكن إذا ودّك تستثمر وهدفك تتعمق وتحترف خذ بيانو.
طيب، كيف تعرف أنه بيانو أو ديجتال زين ؟
نوع الخشب: في البيانو كلما كان الخشب صلب أكثر، كان أفضل. والديجتال، بما أنه مصنوع من البلاستيك، لازم يكون بلاستيك مو خفيف.
الصوت: اسمعه بنفسك، لازم يطلع الصوت واضح بدون طنين أو خشونة إذا ضغطت المفتاح.
المفاتيح: للبيانو لازم ما تكون ثقيلة مرّة. اختبرها بأنك تضغطها، ولازم ترجع مكانها بسرعة وبسلاسة.
حساسية المفاتيح: البيانو المثالي يستجيب لقوة ضغطتك، فمثلًا لو تعزف بهدوء عطاك صوت ناعم، والعكس.
البيانو 88 مفتاح، وممكن تاخذ 76 أو 61، بيكون محدود عليك، لكن مناسب للبداية. 🪗
والشركة اللي نصحنا فيها الأغلب هي شركة «ياماها» معروفة بالسوق، ويصنعون جميع الآلات الموسيقية بأسعار مختلفة.
طيّب وش المتاجر والمحلّات اللي تشتري منها:
شركة متخصصة بجميع الآلات الموسيقية والأجهزة الإلكترونية، لهم أكثر من 40 سنة خبرة في المجال. وعندهم ثلاث فروع بالرياض، وفروع أخرى خارجها. 🗺️
عندهم كل الآلات الموسيقية اللي ممكن تخطر في بالك من عدة شركات مختلفة. 🎻🥁
هم الوكيل الوحيد لشركة «ياماها» في السعودية. ☝🏻
عندهم حصص تدريب مقدمة من «ياماها» في فرع الربيع ويقدمون اختبارات بشهادات للي ودّه يمتهن الموسيقا.
يبيعون كتب موسيقية. 📖
متجر سعودي ميوزك
متجر إلكتروني للآلات الموسيقية.
متخصّصين أكثر بالآلات الوتريّة، لكن عندهم خيارات للآلات الموسيقية الأخرى.🥁
ينزلون مقاطع لكل عود قبل تشتريه عشان تسمع صوته.👂
عندهم اكسسوارات مساعدة، مثل ستاند القدم، وجهاز تمارين تقوية الأصابع. 🖐🏻
عندهم توصيل فوري داخل الرياض. 🚚
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.