رحلة بين تنومة والنماص

كل مرة أبدأ عدد جديد، أقول أبي شيء مختلف عن الطبيعة. السعودية أكثر من كذا، ولكن لما فكرت فيها، الطبيعة هي أساس المتعة وهي اللي ندوّرها ونهرب لها في معظم رحلاتنا.🌻

لكن اللي نبيه فعلًا هو طبيعة لها قصص وأساطير، وطبيعة نرتبط فيها لأنها بأرضنا، زي تنومة وجبالها، اللي حتى أساميها وراها معاني تخليك توقف لحظة تتفكر فيها، زي جبل «البكّاية»، اللي بنعرف ليه سماه الشاعر مردوم الشهري بهالاسم. 🏔️

ووقت ما تتمشى بتشوف أشجار «الرقاعة» المعمّرة والعملاقة، ولو سألت أي شخص من أهل تنومة بتعرف أنها أكثر من مجرد شجرة تظلّل اللي يجلس تحتها. 🌳

ليه اخترنا تنومة والنماص؟

• تضاريس متنوعة بين الجبال والأراضي المنبسطة. 🌾

• صخور بألوان وتشكيلات لافتة، وراها قصص وأساطير. 🪨

• غابات ومنتزهات بكر زي ما خلقها الله. 🌿

• الخدمات قريبة، والنماص تبعد عن تنومة أقل من نص ساعة. 🚘

• الأجواء براد وضباب ومطر. 🧣

الجنوب بالنسبة لي يعني أبها، لكن من فترة وأنا ودي أكتشف باقي المدن والمناطق على جبال السروات. 🌄
وكانت خطة هذا العدد أني أتجه للنماص وأزور أماكنها التاريخية وسط طبيعتها المعروفة والضباب، ولكن يوم انطلقت من أبها ومسكت الخط للنماص استوقفتني تنومة قبل أوصل وجهتي فقررت أخلي الرحلة هنا، وشجّعني الجو اللي تغير من شمس صافية إلى ضباب مفاجئ على التوقف. 🌁

 وبما أني غيرت وجهتي على آخر لحظة، تواصلت مع الصديق المُزارع حاتم الشهري اللي يعرف تنومة مثل قفا يده، ومن أول دقّة رد علي، قلت له أني بالطريق ولزّم على عزيمة، لكني قلت نخليها تمشية في الديرة.

جبال تنومة ⛰️

مع أن ارتفاع تنومة يوصل 2300 متر إلا أن فيها مساحات منبسطة وتحيطها الجبال، وكأن كل جبل من حقبة وعصر مختلف لأن ألوان جبالها عجيبة، تشوف الأحمر والأبيض والأسود، وهذا غير أنها تحمّسك تتسلقها وتجلس على قمة يحاوطك الضباب. 😶‍🌫️

جبل منعاء 🪨

من أشهر وأكبر جبال تنومة جبل «منعاء» اللي سُمي بهالاسم لضخامته وصعوبة تضاريسه المنيعة على اللي مب من أهلها. 🏞️

الجبل مختلف عن اللي دايم أشوف؛ لأنه من جهة مغطى بأشجار الطلح والعرعر والعتم وغيرها من الأشجار الخضراء الكثيفة، ومن جهة ثانية عبارة عن صخور ملساء كبيرة عليها آثار شلالات حفرتها مياه الأمطار، وإذا نزل المطر تصير الشلالات كأنها الدموع تسيل على الخد، ويقولون أحد الشعراء شبهه ببكاء المرأة عشان كذا سموه محليًا جبل «البكّاية»! 👀

جبل منعاء فيه مسارات تصعد منها لنصف الجبل، وفيه إطلالات رائعة على تنومة وعلى جبالها الأقل ارتفاعًا حتى؛ لأن ارتفاعه يوصل 3000 متر لدرجة أنه يحجب الشمس أول دقايق الشروق! 🌅

ومن الأشياء الغريبة إن قمة جبل عكران أحد قمم منعاء فيها مسجد له قبلتين، وحدة باتجاه المسجد الأقصى والثانية باتجاه مكة المكرمة، بالإضافة إلى كهف تقول الأسطورة أنه مكان أصحاب الكهف! 🤔

جبل عِبدا ومزرعة حاتم الشهري 🍎

بعد تمشيتي في الجبل ومحاولات التسلق اللي ما نجحت، توجهت لمزرعة حاتم، وأول ما وصلت لمحت جبل بإطلالة رهيبة من المزرعة، قلت له هالجبل أشوفه من كل مكان في تنومة وشكله مميز رغم أنه صغير، قال لي اسمه «عِبدا» ويتذكر أنه تسلقه واجد من يومه صغير، الجبل صخري بالدرجة الأولى وتشكيلاته غريبة وملفتة، وحواليه طبيعة غنية وجميلة ما تحتاج تتسلقه عشان تستمتع، مع أن التسلق له متعة ثانية. 🧗🏼‍♂️

كانت جولتي بمزرعة حاتم تذوقية بالدرجة الأولى، وحنا نتمشى قعدنا نسولف عن الزراعة في تنومة، وقال لي المنطقة فيها محاصيل تتميز عن غيرها زي العنب، والتفاح، والفِرسك، وبالذات طماطم تنومة، طعمه لذيذ وفيه حلاوة تحس فعلًا أنه فاكهة! 🍅🍇
مزرعة حاتم على بساطتها إلا أنه يزرع فيها شعير نظيف وطبيعي، ويطلبونه الناس من كل مناطق السعودية. 

ولكن طول الجولة وأنا ببالي سؤال عن شجرة عملاقة معروفة في تنومة وشفتها بالمزرعة اسمها «الرقّاعة»، وتعتبر من أكبر الأشجار بالسعودية، قال لي حاتم من حبّه للشجرة هذه بالذات، كل ما ينولد له مولود يزرع رقّاعة باسمه، وأولهم رقّاعة بنته أسيل. 🫶🏼🌳


«الرقّاعة» شجرة تين ولها موسم تثمر فيه، بس يقال التين المعروف ألذ. بتلقى الشجرة منتشرة في تنومة، وعلى كثر ما بحثت عنها ما كنت أدري أنها تُزرع غالبًا كمجلس شورى للقرية، فتلاقيها بمعظم القرى بتنومة عند المسجد.🕌

وقرية شعف آل سودة فيها أكبر رقاعة بالمنطقة؛ تبعد تقريبًا 10 دقائق من تنومة، ورغم إني شفتها كثير في الجوال وشفت ناس كثير زاروها، إلا إن شعور شوفتها قدامي شي مختلف الصراحة، الآن وأنا أكتب النشرة مب قادر أتخيل حجمها. 🤯

جبل عبدالله ومنتزه الشرف 🧺

بعد تمشية في مزرعة حاتم، قلت له ودي أروح لمكان أجلس فيه أروق وأشرب شاهي، خاصة أن الجو غيم وبراد فقال لي عن منتزه قريب، بس قبل أوصله وقفت بطريقي على جبل صخري ثاني مميز وتشكيلاته ملفتة ويسمونه المتسلقين «صخرة عبدالله الكبيرة» (Abdullah Big Rock)! 🪨

يجونه الناس من كل مناطق السعودية بهدف التسلق إذا كان مفتوح، يوم رحت كان التسلق مقفل للأسف، لكن المواقف قريبة والجلوس بالمنطقة المحيطة وتسلق الصخور القريبة منه تعطي شعور ممتع لأبعد حد، بالذات إن الجبل فيه شق بأعلاه وطالعة منه أنواع الأشجار، وشكل الشجر وأغصانه طالعة من بين شقوق الصخور غريب ويدعو للتأمل، ويقال إن في أعلى الجبل أشجار موز! 🍌🚶🏻‍♀️

خلصت من جولتي بعد ساعة تقريبًا، وحسيت صدق الحين أبي أجلس وأروّق واتأمل، فاتجهت لمنتزه الشرف اللي يبعد عن جبل عبدالله أقل من دقيقتين بالسيارة، وأقل من عشر دقايق مشي. 🗺️

رحت بسيارتي وكان الطريق سهل تنفع له أي سيارة، وداخل المنتزه الطرق ترابية؛ لكن لأنه واسع والأماكن فيه كثيرة سيارة الدفع الرباعي بتودّيك جهات محد يوصلها، لكني ما احتجت لها لأني وصلت لمكان جميل بدون تعب. 🚗

داخل المنتزه في جبال صغيرة وصخور التسلق فيها ممتع وبيكتشف لياقتك الجبلية، وفيه جبل يتوسط المنتزه فيه كهفين:

• القريب: تقريبًا 15 دقيقة صعود.

• الأبعد: حوالي 30 دقيقة صعود.

لكن لا تسوي مثلي، تتحمس وياخذك الفضول تشوف الكهوف ولياقتك ماش، لأني تورطت وقت النزول أكثر من الصعود.🥲

كنت أشوف جبل عبدالله ومنعاء من الإطلالة الشرقية في المنتزه وشكلهم قريبين، والجهة الغربية إطلالتها على تهامة، وأتوقع هذا سبب تسمية المنتزه بالشرف، لأنه يشرف على المنطقتين، لكني يوم تواصلت مع واحد من كبار المنطقة قال لي المقصد بالشرف المكان العالي صعب المنال، وهذا ينطبق على المنتزه لأنه على مرتفع. 💭

المكان رايق وجميل جدًا، ويستاهل يوم كامل من الصباح للمغرب؛ لأن فيه إطلالات جميلة تشوف منها الغروب. 😲
المكان مجهز بدورات مياه، بس ما فيه بيع داخل المنتزه، نقصني شاهي واضطريت أروح للشارع العام تقريبًا خمس دقائق بالسيارة، عبيت ترمس شاي ورجعت. 🫖

يوم جعت بعد المغرب اكتشفت منطقة أسر منتجة مسافة سبع دقايق عن المنتزه، المكان مرتب، وكان لون السماء حزّة الغروب خيالي!

• أفضل توقيت للمكان نهاية العصر ووقت الغروب. 🌄

• الأفضل تاخذ عزبة وفرشة أو كرسي للمنتزه. 🪑

مزرعة كوخ الأحلام - سكن وسط الطبيعة 🛖

أحيانًا الواحد وده يروح لمكان جوه حلو ويسترخي بدون تمشية ومشاوير.
وقبل أتوجه لتنومة كنت حاط عيني على مزرعة كوخ الأحلام، لأنها مناسبة لرحلة يومين.

واللي خلاني أختارها، أنها مُطلة على جبل عِبدا، وفيها محمية طيور وغزلان، ومزرعة فواكه فيها بالمزرعة طماطم، وعنب، وفِرسك، ورمان. الوصول للمزرعة سهل، وطريقها واضح. 🥭🧭

•  للحجز تواصل مباشر مع المالك على الرقم ( 0545670777). 📞

•  الويكند - خصوصًا في الإجازات - يكون محجوز فيفضّل حجز بدري. 📆

• مواقف المزرعة تكفي أكثر من سيارة. 🅿 

• تقدر ترتب حجز قطف فواكه مع المالك. 🧺

•  أسعار المزرعة ممكن توصل 2000 ريال في الموسم. 💳

• تكفي لعائلة من  أربعة إلى خمسة أشخاص تقريبًا. 🧑‍🧑‍🧒‍🧒

•  المزرعة قريبة جدًا من الشارع الرئيسي، دقيقتين بالسيارة (عشر دقائق مشي تقريبًا)، وتلقى قهوة أو مطعم. 🚗

  ---

ودّك تلفّ الرياض بميزانية أقل؟ 💸

في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.

 تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.

لوّن صيفك، واحجز الان.

عند اختيار هذه الأماكن حرصنا نسأل أهل النماص عن بعضها، وجتنا توصيات أصلية من المصور سعد طحيطح، لكن قبلها نبي نوضح ليه اخترنا هالأماكن.

• لذة الأطباق وجودتها. 😋

• تنوعها وارتباط بعضها بالنكهات التقليدية للمنطقة. 🌟

• اكتشفنا مكان جديد فتح وقت رحلتنا، وهو قصر النماص، قلعة قديمة مهيّأة للسكن، عبارة عن ثلاثة أدوار في قرية بني مشهور، فيها سطح مفتوح للشوي والإطلالة على القرية كاملة، المكان جديد ما لهم موقع، لكن تحجز مع صاحبه محمد الشهري: (0567937070). 📞🏠

• سألت سعد عن خياره الأول للقهوة بالنماص، قال لي خل القهوة عنك، وجرّب شاهي مخمخة. بشهادته، يقول صعب أحد يقرّب من مستواه، شاهي على جمر مضبوط. 🫖🔥

• أما يوم قلت له وش المطعم اللي ما ينفع أحد يزور النماص وما يجربه قال: لذة المقلي، اللي يعتبره من ألذ أطباق البخاري اللي ذاقها، وعادة يطلب دجاج الفحم والمقلي. المطعم بسيط جدًّا بجلساته، وما ينفع عوائل. 🍛🍗

• جتني توصية من أهل النماص لمقهى روايا وتعني «سواليف»، يميزه أنه يقدّم فرنش توست بصوص رضيفة، اللي يسميها أهل النماص حماشة، وهي عبارة عن دقيق يُقلّب في قدر طيني، مع قطعة حجر حارّة، حتى يتحمص. ثم يُضاف على زبدة ذايبة. 🍞🍯

• مطعم دفء الخيمة، رحت له مرتين خلال يومين! دخلت تنقيت لحم من الملحمة داخل المطعم وقلت لهم يقسمونها لي مقلقل ومندي، وعلى ما يطبخونه، رحت تمشّيت لأن المطعم على مرتفع جبلي وإطلالاته على تهامة تردّ الروح. انتظار الطبخ على حسب الزحمة والطلب، لكن لذة اللحم خرافية، وفيه جلسات عوائل وأفراد. 🥩🍛

• إذا رايح مع جماعة وودك بتجربة أطباق جنوبية مضبوطة على أصولها، تواصلنا مع نايف الزيداني، نزّل لنا سفرة جنوبية متكاملة في وقت قياسي، وموجود أغلب أوقات السنة: (0503643513). 🥘 🍽️

سمعت كثير عن الشيخ سعيد بن سلام ومتحفه، لكن ما تصورت إني بجلس معه أكثر من ثلاث ساعات، أسمع قصصه وماضيه، وأسمع تسجيلات متنوعة من مسجّل قديم. 📼

الشيخ سعيد بشوش وسمح، وما يبخل بأي معلومة، بدأ يجمع القطع الأثرية من طفولته، رغم عمله العسكري، وتأسيسه لأول مدرسة قفز مظلي بالسعودية، وتدريبه لمئات الأشخاص، من ضمنهم الأمير خالد الفيصل وقت العدوان الثلاثي على مصر، وحصده لأوسمة عديدة.🏅

إلا أن حبه للتاريخ والتراث طغى على كل هواياته واهتماماته، وجمع قرابة 30 ألف قطعة أثرية، لدرجة قرّر يفتح متحف يجمعها، وهو بنفسه يُدير المتحف وياخذ فيك جولة على القطع وتقدر تلمس حبه لها من كلامه عنها.♥️

هذا غير أن المتحف مُطل على عقبة القامة بإطلالة جميلة جدًّا وسط قرية الميفا.  

• موقع متحف بن سلام. 

• لا بد من التواصل معه مسبقًا قبل الزيارة لأنه يعمل بنفسه في المتحف لكنه بيستقبلك برحابة صدر: (0504756123). 📞

• دخول المتحف مجاني. 🆓