وين أسبح وأتشمّس في الرياض؟
بدينا نتعلم السباحة، بدال ما نسمع جملة «حرك رجلينك كأنك تسوق سيكل» 🚲
أحب إجازات الصيف، لأن فعالياتها حيّة ولونها ناقع!
البحر، السباحة، الملابس الملونة، الآيسكريمات 🍦
وفي الرياض تكثر عندنا الروحات والجيّات للشاليهات.
وإذا قلنا شاليه؟ هاوشونا أهل البحار، لأن شاليه أو استراحة يعني فيه مسبح. إيه هذا تعريفنا له.😆
في هالعدد تجربة الأسبوع عن مكان تتعلم فيه السباحة، وتوصيات لأماكن تسبح فيها 🏊♀️
إذا فكرت في السباحة، أتذكر أني ما أسبح إلا إذا الموية كانت ما تتعدّى طولي💔
ومع دخول أفضل موسم للسباحة، الود أنك تسبح في أي مكان بدون ما تخاف أو تسمع الجملة الشهيرة من السباحين حولك «أبد أنت بس حرّك رجلينك كأنك تسوق سيكل» 🚲
عشان ما ينعاد السيناريو ولا أخاف من جديد.
قلت بس هذا وقته! أبحث عن مكان يعلم السباحة في الرياض. 🏊♀️
كنت حريصة بالبحث في المكان اللي بسبح فيه يكون:
مركز متخصص فقط بالسباحة.
مستوى نظافة المرافق والمسبح عالي.
تتنوع فيه البرامج والأسعار المقدمة.
والأكيد والأهم طولة بال المدرب/ة.
بعد بحث وزيارات لمراكز متخصصة في السباحة، ومراكز تهتم بالغوص في الرياض.
رسيت على (AP Race Academy)، وهي أكاديمية مخصصة لتعليم السباحة، أسسها السباح البريطاني آدم بيتي، البطل الأولمبي لثلاث مرات🥇. أكاديمية مهتمة بتدريب المبتدئين والهواة، واللي مهتمين بالاحتراف بعد.
بين فترة وفترة يقيمون معسكرات تدريب مكثّفة. وعندهم حصص «Parent & Baby» يدربون الأطفال مع الآباء أو الأمهات من عمر 4 شهور إلى سنتين. فكرة لطيفة كتجربة للآباء أو الأمهات مع أطفالهم. 🫶🏻
تواصلت معهم في الواتساب، بالبداية كان الرد آلي وما كان واضح، لكن بعدها بدأ الرد من خدمة العملاء وكانوا متعاونين، عرفت الأسعار والفروع، وأرسلوا لي رابط الموقع حتى أحجز حصة مجانية لتحديد المستوى لأنها شرط قبل ما تبدأ معهم.
هذي أمور لازم تعرفها عشان ما يضيع وقتك وتتلخبط:
وقت التسجيل ضروري تسجل نفسك (سبّاح) في خانة السبّاحين عندك — حتى وهو حسابك. لأن تقدر تسجل سباحين تابعين (أبناء، أصدقاء.. وتتحكم عبر الحساب في حصص كل شخص، من ضمنهم حصصك)
بعدها تقدر تختار خيار (Book assessment) وتختار الفرع المناسب لك والوقت.
حجزت حصة تحديد مستوى الأربعاء الساعة 10:15 الصباح في فرع الصحافة، مع المدربة لولو، عن طريق الموقع، ووصلتني رسالة التأكيد.
وصلت الأكاديمية قبل موعدي بربع ساعة عشان أتجهز للحصة، واستقبلتني المدربة لولو، أخذت بياناتي، قلت لها أني نسيت قبعة السباحة والنظارات من العجلة وأعطوني البديل 🤿.
وصلت للمسبح ونزلت أحمّي قبل ما نبدأ. المسبح كانت درجة حرارته معتدلة، ونظيف، وما كان فيه ريحة كلور عالية. 💦
المسبح طوله 20 متر، لكن عمقه 90 سنتيمتر فقط. يناسب المبتدئين والأطفال أكثر، بحيث يعطي مرونة في التدريب. بس لك الخيار أنك تجرب بمسبح أعمق، ممكن تنتقل لفروعهم الثانية اللي عمقها من 1.2 إلى 1.8 متر. لكن هذا بيكون مناسب في حال كان مستواك مبتدئ.🏊♀️
سألتني المدربة عن معرفتي عن السباحة ومعلوماتي عنها. وبدأت في الشرح. أفضّل دائمًا المدربين اللي يشرحون لك مع كل حركة أو تكنيك جديد وهذي كانت المدربة لولو:
في البداية شرحت لي كيف التنفس تحت الموية، وكل مرة تزيد المدة.
تقول لولو، أهم شيء أنك ما تخاف وتعيش، ولو تحكمت بأفكارك بتتحكم بنفَسك، وإذا تحكمت بالنّفَس، يروح الخوف. 🙅🏽♀️
وشرحت عدة تجارب أخرى لها علاقة بالمرونة والطفو.
وبعد 25 دقيقة كان التقييم مبني على العناصر الأربعة:
التنفس.🫁
مرونة الجزء العلوي والسفلي. 🦵🏻
الطفو على البطن.
الطفو على الظهر.
وبالنسبة لتقيمي كان ودي أكشخ وأقول محترفة، بس مبتدئة 😆 لكن المتوقع آخذ نصف المدة لهذا المستوى؛ 4 حصص، بدل 8 حصص. لأن بعض المهارات متقنة.
بعد ما خلصت، كانت بعدي حصة تقييم لطفلة صغيرة. قلت فرصة أشوف تدريبها وتعليمها لهم، وأتوقع أنه ألطف شيء شفته! هواية ووقت يجمع بين الأم وبنتها!🥹
تمشيت في الدور العلوي، ولقيت منطقة جلوس، تطل على المسبح، في حال كان ودك تجلس، أو لو ودّك، ممكن تتفرج على بنتك ولا ولدك حتى يخلصون.
قبل ما أطلع وصتني لولو على مدربة أكمل معها حصصي، تشوف أنها تناسبني وبتطورني أكثر.
وقالوا لي الاستقبال ترى مستواك بتحصلينه في الموقع للحجز والدفع.
أخيرًا، الحصص عندهم سعرها يعتمد على المدة ⏳:
30 دقيقة بـ140 ريال / الحصة الواحدة.
45 دقيقة بـ175 ريال / الحصة الواحدة.
60 دقيقة بـ195 ريال / الحصة الواحدة.
التجربة بشكل عام:
عجبني مدى احترافية المدربين، ومعلوماتهم وتعاملهم المرن والسمح.
مستوى النظافة في المرافق ممتاز.
اهتمامهم بالحصص اللي تجمع الأمهات والأباء بأطفالهم . 👩👧👦
الموقع الإلكتروني للأسف عندهم بالانقليزي فقط. والحجز والدفع من خلاله، لكن ممكن تحجز في الفرع مباشرة.
الحجز عندهم في النظام يعتمد على التاريخ الميلادي، ويحجز لك تلقائيًا للمتبقي من الشهر، فانتبه للتواريخ.
ما يوفرون ( مناشف - شامبو - كيس لملابسك الرطبة ) فيفضل تجيب أغراضك كاملة معك.🧴
لا تنسَ (نظارتك - قبعة السباحة)... أفضل لك من استخدام الأدوات المشتركة. 🤿
عندهم مجفّف للشعر لكن ما عندهم آله تجفيف ملابس. 🩳
فيه خصومات خاصة تتحدّث باستمرار، وقد تصل إلى 40% في حال سجّلتوا شخصين مع بعض أو أكثر.
عندهم ثلاثة فروع في الرياض:
فرع الازدهار أكبر مسبح طوله 25 متر بـ 8 مسارات 🏊♂️
فاصل⏸️
ودّك تفوز بدون ما تلعب؟ 🎮
أحيانًا الفوز ما يجي بكأس، يجي بلقطة أو صرخة جمهور، أو تجربة تتمتع بأجوائها.. حتى لو جيت متفرّج. شيء يشبه شعور أنك داخل اللعبة، لكن بدون ما تلمس يد التحكّم.
هذا هو كأس العالم للرياضات الإلكترونية؛ حدث تعيشه على أضخم مسرح عالمي في بوليفارد الرياض.
لأن هذا العدد مائي بامتياز، توصياتنا لك: مسابح وفنادق ومراكز تقدر تسبح أو حتى تتشمّس فيها.⛱️☀️
ركزنا على ثلاثة معايير في هذي التوصيات:
المرافق مجهزة ونظيفة.
الخيارات متنوعة وتناسب مختلف الأجناس.
الخصوصية والأمان.
واخترنا لك ثلاثة أماكن، كل واحد منها لها طابع مختلف.
فندق ماريوت – حي الصحافة
خيار يوفر قسمين منفصلة للنساء والرجال 🚺🚹
لو ودّك تتشمّس، وتبي مكان فيه خدمات سبا إضافية فهذا خيار مناسب لك. ☀️
المسبح خارجي، والشمس تدخل له بشكل مثالي. 🌞
فيه تقريبًا 22 سرير، بعضها في الشمس وبعضها في الظل. — مناسبة لو ودّك تسوي «تان»، أو حتى تسترخي بس. 🧘♀️
المكان مجهّز بالكامل، يعطونك منشفة وخزانة خاصة فيك، ومويه. 🌊
ساعات العمل من 07:00 الصباح إلى 10:00 بالليل، ومنقذ السباحة موجود طول الوقت.
الدخول لمدة 4 ساعات بـ 230 ريال، ولو حاب تستخدم السبا الجاكوزي + غرفة البخار 🧖) يصير السعر 350 ريال.
الأطفال من عمر 6 إلى 12 سنة سعر دخولهم 115 ريال.
غالبًا ما يتطلب حجز، لكن عشان تتفادى أنك تروح ويكون زحمة، يفضل تتصل وتحجز.
خيار مناسب للعوائل 👨👩👧👦
مسبحه كبير وحوله جلسات كثيرة ومتنوعة.
اللي يميز المكان هو الخدمات اللي حوله، فيه عربة آيس كريم جنب المسبح 🍨، ومقهى يقدم مشروبات باردة وقهوة، وعدة مطاعم.
للأسف ما يوفرون خزانة لك إلا داخل المركز الصحي.
ساعات العمل من 09:00 الصباح إلى 05:00 العصر، وفيه منقذ سباحة موجود طول الوقت.
الشامبو موجود في أماكن الاستحمام.🧴
الدخول للبالغين بـ 130 ريال.
الأطفال من 5 سنوات وأقل بـ 75 ريال، ومن 6 إلى 10 سنوات بـ 100 ريال.
ما يتطلب حجز مسبق، لكن يفضل تتصل تتأكد في أوقات الذروة خصوصًا في وقت الإجازات.
مركز خاص بالنساء والأطفال 👩👧👦
آمن ومرتب، بعيد عن أجواء الفنادق، وواسع وفيه عدة أنشطة مختلفة عن السباحة مثل التنس وغيرها. 🏓
مركز مخصص للنساء فقط، والأطفال الأولاد إلى 10 سنوات 👦🏻
المسبح كبير وواسع، والجهة الأخيرة منه عميقه توصل إلى 3 متر، مناسبة للغوص برضو. 🤿
المرافق فيه نظيفة، وكل شخص له منشفة ولوكر خاص.
عندهم اشتراك شهري للسباحة الحرة، ودخول يومي، وعندهم خيارات لتدريب السباحة برضو. 🏊♂️
الدخول اليومي بـ 115 ريال، والاشتراك الشهري بـ 1150 ريال.
المكان يفتح يوميًا من 09:00 الصباح إلى 09:00 المساء، والجمعة مغلق.
فيه منطقة مخصّصة لبيع الوجبات خفيفة وسلطات. 🥗
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.