تقدر تنبسط لحالك في الرياض؟
تجربة العشاء مع غرباء!
من أحب الطلعات عندي، طلعاتي الوحدانية. وكل مرة أطلع بلا رفقة يزيد عندي حسّ الاكتشاف.
وأستغرب أن فيه ناس كثير ما تستمتع بعشاء أو فِلم بالسينما لحالها، بينما أشوف أن طلعاتي الوحدانية هي مساحة للعشوائية والتجارب، وأتبع الطواري اللي تاخذني وين ما تروح.
هالعدد عن الطلعات الوحدانية، ومسارات هواجيس. 👤
التجربة ما كانت في يوم واحد. كانت على مدار 3 أيام بتواريخ مختلفة!
مو بس لأن التجربة فيها جانب غامض، بل حتى أعرف أساسات التجربة ومزاياها وعيوبها.
كانت التجارب في الأيام التالية:
يوم الأربعاء، 30 أكتوبر 2024.
يوم الأربعاء، 9 أبريل 2025.
يوم الأربعاء، 23 أبريل 2025.
لو قلت لك إن فيه تجربة تجمعك مع أربعة أو خمسة أشخاص ما تعرفهم، ولا سبق شفتهم في حياتك، تتعشون في مطعم ثم تجلسون تسولفون ساعتين إلى 3 ساعات! هل بتتحمس؟ ولا تتوتر؟
تجربتي كانت مع تطبيق وموقع «Time Left». قبل فترة وجيزه وصل للسعودية، وموجود في دول كثيرة، لكنه مشهور بأوربا أكثر. فكرته بكل بساطة، موقع ينسّق ويحجز لك موعد عشاء مع 5 أشخاص غرباء.
تحمّست كثير، وترددت أكثر.
كيف بجلس مع أشخاص ما أعرفهم؟ ولا بيننا أرضية مشتركة نسولف فيها؟
ولكن عبارتي الشهيرة إذا توجّست من التجارب: وش أسوأ شيء بيصير؟ 🤷♂️
طيّب، كيف تبدأ التجربة؟
تبدأ من تسجيلك في موقعهم أو التطبيق، يطرح عليك قرابة 30 سؤال عن تفضيلاتك الشخصية.
هذه الأسئلة هدفها يعرف من أنت؟ عشان يجمعك مع أشخاص يشبهونك إلى حدٍّ ما.
تنقسم هالأسئلة إلى ثلاثة أنواع:
أسئلة شخصية، عددها 20. 👤
أسئلة عن الطعام، عددها 3.🍽️
أسئلة عن الهوية، عددها 7. 🪪
ثم بعدها تكمل تسجيل بياناتك الأساسية، من بريد إلكتروني ورقم جوال وجنسية.
مواعيد الحجز: كل أربعاء الساعة 08:00 مساءً من كل أسبوع.
وفيه 4 خيارات للاشتراكات:وفيه نوعين من الحجز:
44.99 لعشاء واحد «أنصح فيها لأول مرة»
54.99 ريال لمدة شهر
129.99 ريال لـ 3 أشهر
179.99 ريال لـ 6 أشهر
* يمكن تتغير الأسعار مستقبلًا.
أضافوا مؤخرًا حجز يوم الثلاثاء للنساء فقط.
العجيب أنك ما تعرف المكان، وجنسيات اللي معك إلا صباح يوم اللقاء. 🤫
وفي يومها يرسلون لك إيميل:
بالمطعم وموقعه.
ومعلومات طفيفة عن زملاء الطاولة.
* لكن بدون ما يعلمونك عددهم أو يكشفون هويتهم؟ 🧐
كانت التجارب الثلاث متفاوتة من حيث المتعة، ولضبطها كانت معاييري لهذه التجربة تركز على هدف التجربة من الأساس:
التعرّف على أشخاص جدد، أقدر أخوض معهم نقاشات.
الأجواء العامة للمطعم والجلسة.
التجربة الأولى:
المطعم: «بوفوني - Buffone»
الميزانية: متوسطة 💵
عدد الأشخاص: 5.
أول ما توصل تروح الاستقبال المطعم وتقول له عن حجزك، وعن اسم المجموعة: «حجز تايم لِفت، مجموعة السعادة». ولأن عندنا ثلاث تجارب، بقول لك عن ملخصها:
التجربة كانت مثالية، لدرجة أننا جلسنا 3 ساعات ونصف، ما شعرنا بالوقت!
شخصين من أصل خمسة بالجلسة جربوا التطبيق أكثر من مرة، وهذا ساعد البقية على فهم التجربة والاستمرار فيها.
والمطعم والجوّ العام ساعد في التجربة، وما كان مزدحم مرة. والأكل مناسب للتشارك، للحين أتذكر طبق روزيتو الجريش، طبق مفاجئ لنا كلنا من لذتّه!
تنوّعت السوالف بين أسئلة عامة وشخصية عن الحياة والأهداف والتجارب. وشعرت فعلًا إن كل اللي موجودين يتقاطعون معي بأكثر من اهتمام، واحد يشتغل بالمجال الإبداعي، وآخر يحب التجارب والسفر، وثالث مهتم بالموسيقا والفنون. وأدركت هنا أهمية الأسئلة اللي ببداية تسجيلي بالتطبيق، يجيب لك ناس بنفس اهتمامك!
تقييمي لهذه التجربة: ممتازة وبديعة! ⭐️
التجربة الثانية:
المطعم: «سباقو spago»
الميزانية: مرتفعة 💵
عدد الأشخاص: 6.
التجربة وبدون مبالغة، كانت كارثية بكل ما تحمله الكلمة من معنى!
تفاجأت بموقع المطعم، لأنه خلاف اختياري للميزانية المطعم المتوسطة، كان في ڤيا الرياض مطعم «سباقو spago»!
وصلت على الموعد وبدأ موعد تكسير الجليد، أو الاستجواب 🕵️♂️ .
فيه شخص واحد هو اللي ماسك الجلسة وكأنه يستجوب الجميع، وإذا جاء أحد يتكلم يقول له: «معليش لا تقاطع انتظر دورك»! عرفتوا هالنوع من الناس؟ إيه وصلت خير. 😅
كانت الجلسة متكهربة من البداية. كملت بالجلسة وحاولت أخفف من حدة التوتّر اللي بالجو، بحيث إني أحول الحديث على عدد أكبر من الأشخاص. ولكن المستجوب وشخص آخر بدأ بينهم عداء من أول دقائق الجلسة.
طاولات المطعم كانت كبيرة جدًا، وحجم الضوضاء ما يخليك تسمع اللي بالطرف الثاني من الطاولة. وأغلب الزبائن كانوا من جنسيات أجنبية. تشعر وكأنك دخلت بشركة عالمية، كلهم بدل رسمية، وتسمع لغات العالم حولك، إسباني وياباني وإيطالي، وغيرها.
فعليًّا في التجربة الأشخاص لا يتقاطعون معي بالاهتمامات، والمطعم ليس على الميزانية اللي وضعتها، والتوزيع كان سيء فوق العدد الطبيعي، بالإضافة فيه بنت واحدة، من أصل الستة، استأذنَتْ بالانسحاب من أول نصف ساعة، لأن الطاولة كانت كلها رجال..
تقيمي لهذه التجربة: سيئة، ويشفع لها مكان ڤيا رياض للتمشي.
التجربة الثالثة:
المطعم: «bekabo»
الميزانية: متوسطة. 💵
عدد الأشخاص: 5.
الاهتمامات متقاربة إلى حدٍّ ما، والسوالف جيدة. ولكن كان يعيبها إني الوحيد اللي جرّب التجربة قبل كذا، وكلهم جديدين عليها. فكان على عاتقي تكسير الجليد بالنصف ساعة الأولى، ومحاولة إحياء السوالف كلما حلّ الصمت.
المطعم لطيف، والجو العام فيه يهيئ أنك تسولف وتاخذ وتعطي، أتذكر من جلستنا شاهين برقر كان لذيذ.
وعشان ما أصير زي صديقنا السابق، قلت لهم بعد العشاء أنتم تولّوا دفّة الحديث. وبدينا نسولف عن الانطباعات الأولى لكل شخص بشفافية، وعن أهداف الحياة بالعموم، وإيش يتمنى كل شخص بعد 5 سنين من هاليوم.
بعد ساعتين ونصف، تودّعنا من بعض وكلٍ سرى لبيته..
تقييمي لهذه التجربة: جيدة.
بشكل عام عن التجارب الثلاث:
المزايا:
تجربة ممتعة تحيي فضولك، وتكسر للروتين.
تنعش علاقاتك، وتنوعها. 👥
أمان عالي لبياناتك، محد يقدر يطّلع على رقم جوالك أو بريدك الإلكتروني.🔒
سهولة التسجيل والوصول، والتجربة عبر التطبيق.
لو حصلت لك إساءة من أي شخص، يمديك ترفع عليه بلاغ بعد الانتهاء من التجربة.❌
إذا ما أعجبتك الجلسة، تقدر تقوم وتستأذن، وتعطي تقييم لها من خلال التطبيق، وتذكر أسبابك.
إذا عندك هدف معيّن، مثل الاحتكاك بناس بمجالك، أو ممارسة اللغة الإنقليزية، ممكن تكون هذه التجربة مكان مثالي لذلك. 🗣️
اختياراتهم بالمطاعم متنوعة، من ناحية تنوّع الأصناف والجو العام. وهذا يساعدك تكتشف مطاعم جديدة.🆕
السلبيات:
إذا حصلت حالات إلغاء من أشخاص كثر للتجربة، يضطر التطبيق لدمج المجموعات ببعض. فعادي مثلًا تكون محدد ميزانية المطعم متوسطة، تكتشف إنك بمطعم غالي جدًا، أو يجمعك مع أشخاص ما تتقاطعون بأي شيء أبدًا. نفس اللي صار لي بالتجربة الثانية.💸
احتمالية أنك تواجه أشخاص ما يتقاطعون في اهتماماتك واردة، وقد تحصل تحزبات إنه اثنين يسولفون مع بعض من دون اعتبار للبقية.🤷♂️
تنويه:
في إجاباتك على الأسئلة الشخصية في التطبيق، خلّك صادق لأنها هي اللي بتحدد لك نوعية الأشخاص اللي راح تقابلهم.☝🏼
جرب التجربة لحالك حتى تأخذ راحتك، وتتعرف على الناس. 🫱🏼🫲🏽
احجز في أول أسبوع من الشهر، وإذا اضطريت ثاني أسبوع كحد أقصى. وانتبه تحجز قبل الرواتب بكم يوم. لأن حالات الإلغاء من الأشخاص تكثر. ومثل ما ذكرت سابقًا، كثرة الإلغاء تفسد التجربة.
إذا بردت الجلسة ولا أحد يسولف، يفتح لك التطبيق وقت التجربة عدة أسئلة تتشاركون بالإجابة عليها.
إذا ببالك أسئلة عامة عن موضوع معين، وودّك تشوف آراء ناس مختلفين عن دائرة علاقاتك؛ حضّر لها مسبقًا واستخدمها بالتجربة.📝
ختامًا سألت كل اللي معي في تجاربي الثلاثة، تقريبًا 13 شخص، عن السبب اللي دفعهم يخوضون هذي التجربة وتمحورت الإجابات على كسر الروتين، ومقابلة ناس جديدة والتغلب على الشعور بالوحدة.
فاصل⏸️
ودّك تفوز بدون ما تلعب؟ 🎮
أحيانًا الفوز ما يجي بكأس، يجي بلقطة أو صرخة جمهور، أو تجربة تتمتع بأجوائها.. حتى لو جيت متفرّج. شيء يشبه شعور أنك داخل اللعبة، لكن بدون ما تلمس يد التحكّم.
هذا هو كأس العالم للرياضات الإلكترونية؛ حدث تعيشه على أضخم مسرح عالمي في بوليفارد الرياض.
صحيح العدد يتكلم عن كيف تنبسط بالرياض لحالك، لكن الهواجيس فيها لذّة، وسعة صدر وما تنفع إلا لحالك 🤷🏽♀️ وحلاتها لو مسكت الطريق الصح اللي يسمح لك تسوق وتهوجس، وهنا كانت توصياتنا:
اخترنا كم شارع تسوق فيه، ومسارين مترو تختاره للهواجيس الأسبوعية بناءً على تجربة أربع أشخاص من الفريق، وكانت معاييرنا كالآتي:
الشوارع فسيحة ومزفلته، ونتلافى فيها وقت زحمة السيارات، والمترو كذلك.
قرب الشوارع والمسارات لمقاهي حتى تجلس فيها بعد الهواجيس أو تأخذ لها معك على الطريق.
تنوع أوقات الهواجيس بين الليل والنهار، نعم فيه ناس تهوجس النهار.😅
ما تتعدى الهواجيس ساعتين. ☝🏼
مسارات السواقة الثلاثية 🛣️
خط الهواجيس الخفيفة
مدة الهواجيس: 30-50 دقيقة ⏰
المسار: طريق الملك خالد باتجاه طريق صلبوخ ثم عودة لنقطة الانطلاق.
بعد ما أخذت شاي مدخّن من نخبة العظماء، انطلقت الساعة 11:00 بالليل طبعًا. الشارع واسع، ومستمر وتخف فيه الزحمة كل ما تأخرت، هذا الشارع للهواجيس الجادة بعيد عن الجوال لأن المرور متواجدين بكثرة. 🚔
خط الهواجيس الثقيلة
مدة الهواجيس: 45 دقيقة - ساعة ⏰
المسار: طريق الملك خالد، إذا بديت من جنوب الطريق تمر رفيق الليل، وإذا رايح من الشمال فتمرّ شاي عتيق، انطلقت الساعة 12:00 باتجاه العمارية. الطريق اللي مساراته واسعة تسهّل السرحان، نهاية الطريق عن دوار العمارية ضاقت الشوارع شوي لكن مع تأخير الوقت خفّت الزحمة، رجعت من محطة الدريس لنقطة بدايتي. 🌌
مسار القرارات المصيرية
مدة الهواجيس: ساعة ⏰
المسار: هالمرة بديت من طريق ملهم، وأخذت من شاي فيصل، شاي معتّق يضرب بدماغك.
انطلقت الساعة 1:00 بعد منتصف الليل، الطريق واسع، وكل ما مشيت تختفي معالم الرياض، وما تشوف إلا التريلات، هنا تحس لازم تفتح ملف القرارات، بعد ما وصلت كوبري ملهم الجديد رجعت.
مسارات القطار الثنائية 🚇
المسار الأول: الأزرق. 🔵
مدة الهواجيس روحة ورجعة: ساعة ⏰
كانت نقطة الانطلاق من محطة سليمان الحبيب، بعد العشاء عشان تخف زحمة الدوامات، مسكتني الهواجيس لين محطة بنك البلاد، نزلت وتقهويت في مقهى Boss.co، وبعد تكية قراءة وتأمل، رجعت مشيًا للمحطة ولنقطة الانطلاق. 📖
المسار الثاني: البنفسجي.🟣
مدة الهواجيس روحة ورجعة: ساعة وثلث ⏰
من محطة النسيم يوم الجمعة انطلقت الساعة 9:30 صباحًا، بعد ما تقهويت في مقهى حَي دخلت المحطة لقيتها فاضية، والقطار ما فيه إلا أنا، توقيت مثالي للهواجيس لأن لين وصلت محد ركب معي، وصلت محطة كافد اللي كانت أكثر ازدحامًا، تقدر تتمشى أو تروح مطعم في المدينة المالية لكني كنت محترّة فعدت أدراجي لمحطة النسيم. 🚆
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.