الباحة، بين غابات وكهوف
هربًا من الحر، شدّينا الرحال للباحة
أكتب هذا التمهيد في شهر يوليو، مع الوعي الكامل بأن الأجواء في الرياض وما حولها بتوصل إلى درجات حرارة جنونية الشهور الجاية فما لنا إلا الهرب نحو البراد 🧣
الباحة، وما أدراك ما الباحة، كنت أعرف أن طبيعتها تميزها عن بقية مدن السعودية، بس ما كنت أدري أنها كانت تُلقب بـ«حديقة الحجاز»، يعني تقدر تقضي في ربوعها أيام الصيف وتنسى الحر والشمس عند الهدوء اللي بتحصله في كهوف «شدا الأسفل» وطبيعة غابة «خيرة».
ليه اخترنا الأماكن هذه في الباحة؟
التنوّع بالوجهات لتناسب محبي المصايف الرايقة، أو المغامرات. 🏔️
وجهات سهلة الوصول، وفيه غيرها صعبة بس تستاهل التعنّي لها. 🚘
توفر الخدمات في أغلب الأماكن. 🚾
أتذكر لما كنا نعرّف طقس السعودية في حصص الجغرافيا: حار جاف صيفًا، بارد ممطر شتاءً. ما كنت مقتنع، لأننا لما نصيّف بالباحة تكون باردة وممطرة صيفًا.🤔
ارتباطي بالباحة من الطفولة ما يعني أني زهقت منها، رحت لها عشر مرات تقريبًا، آخر سنة بس زرتها ثلاث مرات، آخرها كانت لتجهيز العدد.
أعجوبة الكهوف المعلقة في شدا الأسفل ⛰
يُقال أن اسم «شدا» نسبة للشدَّة اللي تدل على القوة والصلابة، خاصة وأن صخور هالجبال تتنوّع بين النارية والمتحوّلة. بس السبب الثاني عجبني أكثر ويعني: نسبة لشدو الطيور وهي تغنّي بعيدًا في السماء.
طبعًا ما سُمي شدا الأسفل، إلا لأن فيه «شدا الأعلى» جنبه، وهو محمية طبيعية للنمر العربي. بس لا تخاف، الأسفل ما فيه خطر، كله شجر وورد صحراوي وكهوف عمرها آلاف السنين، يرجّح أنها ترجع لعهد ثمود.
مشيت صباح السبت للكهوف، استغربت لما شفت الطريق ساعة ونص؛ لأن المسافة 70 كيلو، فالمنطقي تخلّصها بنص ساعة بالكثير، بس ما كنت عارف وش ينتظرني.😨
انطلقت من الباحة، وأوّل شي نزلت مع عقبة الملك فهد اللي فيها أكثر من 24 نفق وتمشي فيها على أطراف الجبل 🚗
وكل شوي تشوف وين كنت تمشي ووين الطريق رايح قدامك! 🫨
لما نزلت تحت، قَلَب الجو حر كأني بالرياض، كمّلت لين وصلت عند مكان مكتوب فيه «بوابة شدا الأسفل»، وهنا بدأت المغامرة فعلًا. قابلني صعود قوي جدًّا، طريق وعر وصعب. 🤦🏻♂️
وكل السيارات اللي أقابلها جيوب، ويناظروني باستغراب لأني جاي بسيارة صغيرة (كانت غلطة كبيرة)، كان صعود مهيب، ودرجة الحرارة تنزل كلما ارتفعت أكثر، وكل لحظة أفقد فيها الأمل يطلع لي بيت صغيرة أو مزرعة أو حتى كهف بعيد، وكأنها إشارات تعلمني إني على الطريق الصحيح، مشيت وفيه لوحات تدلّني على المكان «الكهوف المعلقة من هنا»
كنت رايح وعندي تصوّر أن الكهوف مفتوحة للعموم، لأنها كانت مساكن من عهد ثمود، حسب النقوش الثمودية والاكتشافات الحديثة، واستمروا أهالي المنطقة باستخدامها كمساكن فترات معينة بالسنة، لكن قبل عشر سنوات تقريبًا حولوها إلى منتجعات ومرافق سكنية سياحية. 📜
بعد صراع ووقفات وصلت على العصر لمنطقة تشكيلاتها الصخرية مميّزة ما تشبه شيء شفته قبل، لأنها عبارة عن كتل صخرية كبيرة فوق الجبل نفسه، يعني الجبل على ارتفاع شاهق، وفوق هذا الجبل صخور كبيرة تزرع فيك تساؤلات ما لها نهاية⁉️
عرفت أني قرّبت للمنطقة المنشودة، فكلّمت صاحب المنتجع عشان ما أضيّع وقت، وقلت له إني وصلت. بادرني بالعتاب إني ما علّمته يجي ياخذني تسهيلًا علي.
ما كان عندي تصور باللي ينتظرني داخل الكهوف، لكن وأنا أتمشى كنت منبهر لأن المكان أبرد مما تتخيّلت، وحسيت إني أقرب للطبيعة من أي وقت ثاني، طبيعة مختلفة تمامًا عن الغابات، لها مهابة وشعور غريب.
وأوّل ما دخلت أبهرني الجانب المعماري، لقيت بيت كامل داخل الكهوف، والغرف فيه كهوف ثانية يربطها ببعض ممرّات داخلية وكأنك في متاهة مصممة بذكاء.
السكن هنا متكامل، فيه خصوصية وتميّز معماري رهيب له آلاف السنين! الشعور عجيب جدًّا، قعدت أتخيل أجيال عاشت هنا في مكان مرتفع جدًّا ومنعزل لكن مكتفي بذاته.
هذا غير الإطلالة اللي شفتها أول ما طلعت من الكهوف، والدنيا فسيحة قدامي
واللمسة الجميلة أن صاحب المكان حاط دفتر زوّار، حتى يكتبون فيه عن تجربتهم. فإذا رحت من توصيتنا لا تنسَ تكتب رسالة. 📝
الطريق وعر وصعب جدًّا، الأفضل تتواصل مع شخص مختص يطلّعك، ولازم سيارة دفع رباعي. 🚗
المنتجع فيه عامل لخدمتك أي وقت. 🧑🏻💼
فيه عدة كهوف في الجبل تقدر تحجز اللي يناسبك، حنا تواصلنا مع جمعان الشدوي (+966536651050)📱
تحتاج تاخذ معك مؤونة متكاملة من الأكل والشرب. 🛍️
في غابات الباحة 🌳
غابة خيرة
غابات خيرة من المناطق القريبة من الباحة، وكانت في جدولي يوم الجمعة بعد صلاة العصر. الطريق كان مفروض نص ساعة، لأنه سهل، لكن لأني كنت أتأمل كل منظر وأوقف كل شوي، أخذت مني الرحلة ساعة كاملة وما تحسّفت، بل كنت مستمتع. 🚘
فيه طريقين اقترحها لي قوقل ماب، رحت من الأقصر اللي دخّلني على قرية خيرة بين مزارعها وبيوتها.
رحت من طريق دخّلني على قرية خيرة بين مزارعها وبيوتها، ضيّعت رغم كثرة اللوحات، لكني نزلت بالسيارة لمنتزه جُدر، هالمكان كان هادي وأفضل للتكية، وأحلى ميزة أني قدرت أقرّب من مصب الشلّال.
حسيته ما يشجّع على الجلسة، فنزلت بالسيارة مع نفس الطريق لمنتزه جُدر اللي كنت ناويه من أول، لقيته يبعد 8 دقايق. هالمكان كان هادي وأفضل للتكية، وأحلى ميزة أني قدرت أقرّب من مصب الشلّال.
أول ما دخلت كان فيه طريقين يمين ويسار 🛣️
اليمين كان دَرَج يوصّل لأقرب منطقة للشلال. كان الجو جميل وهدوء المكان مناسب للهواجيس اللي ما أمدى أبداها إلا وخلّصت، لأني وصلت الشلال بخمس دقايق. بس المكان صغير لأنه بين جبلين وفيه ناس، فأخذت لفّة سريعة ورجعت، لكن التمشية كانت ممتعة، خاصّة وأن الريحة المنتشرة منعشة بشكل غريب ومميّزة، وخمّنت أنها مزيج عسل وورد.🍯🌸
وبما أني شايف طريق ثاني يسار، رجعت له بعد ما طلعت من الأول المزدحم، ووصلت لجهة ثانية من الغابة يصب فيها الشلال، جلست على واحد من الكراسي الموجودة، كنت أسمع صوته هنا مع أني ما قدرت أشوفه لأن الجبل مغطي عليه. 🏞️
التمشية بين الشجر عالم ثاني، ولأن الغابة من أكثر غابات السعودية كثافة في الغطاء النباتي، وشجرها متنوّع بين العرعر والطلح والزيتون البري والشم وغيرها، تحس بسكينة وانبهار، والجميل أن فيه لوحات تعريفية بالأشجار وأنواعها 📋
وأنت تتمشّى تحس برئتيك تتوسّع وأنت تتنفّس هواء نظيف ونقي، وتشم ريحة الشجر اللي ما تقدر تميزها بالضبط لتمازجها وكثافتها. الغابة ضخمة جدًّا، مساحتها تتجاوز مليونين متر مربع، فبتلقى فيها وجهات كثيرة للاكتشاف، والجميل أنها ما زالت في شكلها الطبيعي، ما صار عليها تعديلات وشغل يغيّر طبيعتها الخام. 🦌
من أجمل الأشياء اللي شفتها وصارت في هالرحلة، أني شهدت مغيب الشمس مرّتين! الأولى كانت تحت وأنا أتمشّى في منتزه غابة جُدُر، والثانية يوم طلعت عند منتزه خيرة الرئيسي، وهنا تستوعب ارتفاع الغابة اللي يوصل لقرابة ثلاث آلاف متر! 🌄
المكان مهيّأ أكثر مما تصوّرت، وجاهز للنزهة، لكن المنطقة هنا ما فيها محلات أو مطاعم، بس مقهى صغير أخذت منه شاهي.
ولأني ما كنت برجع بدري وفضولي خلاني أتساءل وين منبع الشلال... ركبت السيارة وتوجهت لحديقة الشلال، وخلال ثلاث دقايق وصلت. ⏰
الحديقة كبيرة مرّة وشرحة، والحلو أنها ما كانت زحمة. وحبيت وجود باعة محليّين وأسر منتجة.
غير الجلسات اللي أغلبها فاضي، وخلال بحثي عن منبع الشلال لقيت مجرى كأنه نهر.
قطعت معه مسافة سبع دقايق مشي، والجو كان بارد بشكل لطيف، لين وصلت للمصب وكان الاكتشاف الرهيب هنا. 👀
لقيت جسر معلّق يوصل بين جهتين من الجبل، جربت أمشي فيه، والصراحة تجربة رائعة. شفت الشلّال يصب قدامي، وشفت مجراه كامل من زاوية مختلفة. 🌁
الرهيب أن فيه مسارات مشي وتسلّق مهيّأة، وتوصّل لأقرب نقطة لمصب الشلال. على ارتفاعها ومسافتها، شفت فيها ناس تمشي ومستمتعة. 🧗🏻♀️
جلست العصر كله هناك لين قرصني الجوع وتعبت، فقررت أختم النهار وأرجع.
فيه مواقف مرتّبة ووفيرة عند مدخل الغابة، وكذلك في حديقة الشلال. 🅿️
حديقة الشلال فيها خدمات ومطاعم وأسر منتجة وجلسات، بينما الغابة ما فيها، فالأفضل تاخذ معك احتياجاتك. 🧺
إذا ناوي تاخذ مسار المشي بدل السيارة خذ معك عدّتك والبس لبس مريح. 🥾
الدخول مجاني لجميع المرافق إلا الجسر المعلّق، دخول الكبار بقيمة 35 ريال، والأطفال 20 ريال. 🎫
الغابة معظمها غير مزدحم، وأيام الأسبوع بالنهار غالبًا بتكون أفضى. 📆
غابة رغدان
هي أكثر مكان سمعت عنه بالباحة، وأشهر غاباتها، وقررت أروح لها بالليل، قرار غريب، بس ما ندمت، فخلّيتها بنفس اليوم اللي قضيت نهاره بغابة خيرة. 🌴
إذا سمعت كلمة غابة، غالبًا يجي ببالي أنها بعيدة عن المدينة، لكن رغدان تبعد عن وسط الباحة أقل من ربع ساعة. لما وصلت توهّقت، لأن المواقف مليانة وما لقيت إلا موقف بعيد يبي له مشي، لكني ما خالفت بحكم برودة الجو، ما لي حق أتحلطم وأنا جاي من الرياض!
أوّل ما دخلت تفاجأت أن المكان صار له تطوير وتوسعة، وكان أكبر من آخر مرة شفته فيها بمرتين تقريبًا. هنا الجو العام مختلف مرّة عن غابة خيرة، المكان مزدحم، وكان حَي لأنه جمعة وليل.
اللي عجبني بهالمكان أن الغابة متداخلة بمساحات ومرافق كثيرة، يعني لقيت جهة كلها مطاعم محلية وعالمية وشعبية بجلسات أرضية ومقاهي متنوّعة، وممر كامل للأسر المنتجة وسوق، وأكثر عنصر جاذب أني يوم دخلت الغابة أكثر بعيد عن الفعّاليات لقيت كثافة الشجر تعطي خصوصية لكشتة بعيدة عن الزحمة، هذا غير حديقة الورود اللي داخل الغابة. 💐
على أن المكان زحمة، وتوقّعت ما أطوّل، قعدت ثلاث ساعات وما حسيت بالوقت ولا خلصت اكتشاف المكان، بين تمشية بالغابة، وقعدة في مقهى كتبت جزء من هالعدد فيه! ☕️
ما تحتاج تاخذ شيء معك، يتوفر كل ما تحتاج هناك، حتى الجلسات تقدر تستأجرها: زي الفرشة والمساند. 👍🏼
الدخول للغابة والمرافق مجاني. 🆓
المحلات معظمها تقفل 12:00 لكن المكان مفتوح طول الوقت تقريبًا.
ودّك تفوز بدون ما تلعب؟ 🎮
أحيانًا الفوز ما يجي بكأس، يجي بلقطة أو صرخة جمهور، أو تجربة تتمتع بأجوائها.. حتى لو جيت متفرّج. شيء يشبه شعور أنك داخل اللعبة، لكن بدون ما تلمس يد التحكّم.
هذا هو كأس العالم للرياضات الإلكترونية؛ حدث تعيشه على أضخم مسرح عالمي في بوليفارد الرياض.
في مقترحات لا تنسَ تزور لهذا العدد، سألنا ستة أشخاص من أبناء الباحة عن الأماكن اللي ما تطلع من الباحة إلا وأنت مجرّبها، ودعمناها بتوصية من منسِّقة رحلات وبالمعايير التالية:
الاعتماد على الطعم وجودة الأكل في المطاعم، بعيدًا عن فخامة المكان أو شكله.
سهولة الوصول للأماكن وتنوّع مناطقها.
اخترنا أماكن قريبة للطبيعة للاستمتاع بالأجواء.
الباحة دومز، مكان سكني مختلف عن المعتاد، يوفّر خيام بواجهة شفافة تقابل جبال الباحة، مع جلسات خارجية مطلّة على وادي خيرة وشلالاته وخضاره. تقدر تنعزل فيه بهدوء وتستمتع بمرافق الشوي. ⛺️ 🍖
فول خلوفه، اتّفق عليه كل من سألناه عن الباحة، من مديرنا فيصل الغامدي، إلى الفنان راشد الشعشعي. تطلب منهم فول الجرة اللي يُطبخ لأكثر من عشر ساعات، مع خلطتهم السرية. الطلب الخارجي بيكون خيار ملائم لو معك عائلة لأن المطعم للأفراد. 🥙 🧑🧑🧒🧒
مندي طلوب، كان الشيخ طلوب رحمة الله عليه يشتغل في قيادة الشاحنات، بعد فترة قرّر يفتح مطعم مندي، ولهم أكثر من 25 سنة في المجال. فرع المطل هو الأشهر، ويتعنّون له الناس من برّى الباحة. فيه جلسات عائلية وأفراد. جلسات المطعم بسيطة جدًّا، لأن تركيزهم على الجودة. 🥘⛰️
مزرعة ومقهى الحازم. في سواليفي مع عثمان الزهراني، قال لي أنه تقاعد من عمله للتفرّغ للزراعة، وصمم الأكواخ ونفّذها بنفسه. المزرعة فيها مقهى يقولون أن (V60) حقتهم ممتازة، تشربها وأنت محاط بشجر الرمان والبن والعنب والخوخ، وفيه مطعم، وأكواخ للإيجار بالساعة أو للمبيت كذلك. 👩🏻🌾🏡
عسل روز الباحة، كل ديرة لها اللي يميزها، وعسل روز الباحة فاز بجوائز محلية وعالمية لجودته، عندهم أنواع عسل متنوّعة من المحاصيل المحلية زي عسل الضرم، والطلح وغيره.🍯🌴
💡 توصية خاصة: إذا تبي شاهي، حلاته شاهي الجمر اللي يسوونه الشباب والناس على الطريق
في رحلتنا للباحة تعرّفنا على الدكتور صالح بن عبّاس، وهو صاحب مسيرة مختلفة، لأنه جمع بين مجالين بعيدين عن بعض، صالح طبيب جراحة عيون، ومُزارع من الدرجة الأولى. 👓👨🏻⚕️
الدكتور صالح، صاحب مزرعة الزيتونة. بدأ في المجال قبل ثلاثين سنة، واستمر حتى الآن.
وفّق الدكتور صالح بين الطب والزراعة، حتى صارت مزرعته من أشهر مزارع الباحة. اشتغل عليها حتى صار 70% من مساحتها مخصصة لأشجار الزيتون، بالإضافة لمختلف الشجر المثمر. 🫒
الجميل بالموضوع أنه يبي يشارك الناس جمال مزرعته، ففتحها للزوّار. تلقى فيها متجر منتجات من المزرعة، ومقهى بطابع الريف، ومكائن عصر الزيتون اللي تقدر تشوفها تُعصر قدامك. 🌸
الدكتور صالح ما يبخل بخبرته على الباحثين والمختصين والمهتمين. يشارك نتاج خبرته وأساليبه.
قبل تزور المزرعة تواصل مع الدكتور، خاصة إذا ودك تسولف معه، عشان تتأكد من وجوده.
رقم التواصل:0552732870 📞
رسوم الدخول: 20 ريال للشخص. 🎫
رسوم محمسة الطيور: 10 ريال. 🦜
أوقات عمل المزرعة: 3 العصر حتى 8 المساء. ⏰
ثمانيةالأماكن كلها «معروفة» لك، إلا الموجودة في هذي النشرة. كل ثلاثاء سيصلك جدول لرحلة مختلفة، تتعرّف فيها على أماكن سرّية جديدة، وتشاهد المدن السعودية بعيون أهلها.