الطائف مصيف السعوديين الأول ☀️

إذا سمعت طاري الطائف  يجي ببالي مَصيَف السعوديين الأصلي أيام إجازة الثلاث شهور، يوم كنّا نروح عوائل وجماعات، نستمتع ببراد الشّفا والهدا، ونتمشى بمنتزه الردف، ونركب التلفريك، المسبب الأول للخوف من المرتفعات. 😩
مرت سنين على آخر زياراتي للطائف  لكن ذكرياتها ما زالت موجودة، ورجعت أعيش حلاوتها وأكتشفها في جولة على الشفا وزيارة مزارعها. 🗺️
ووش أحلى من مجرور بصوت عميد الفن، تسمعه وأنت تقرأ هالعدد؟

ليه اخترنا الطائف، وتحديدًا الشفا؟

• تنوّع التجارب والأماكن. 🗺️

• ذكريات جميلة تربط العوائل السعودية بالطائف. 🖼️

• توفّر الخدمات وقربها وسهولة الوصول. 🚙

• جمال الفواكه ولذتها وتنوعها طيلة موسم الصيف. 🍉

الطائف مليانة أماكن تستحق الاستكشاف، وأبرزها الشفا، اللي طلعت أكبر بكثير مما توقعت. والأودية اللي يوصل عددها أربعين وادي تقريبًا، وبعضها يمتد لمسافة تفوق 200 كيلو متر!

مغامرات الشفا 🗺️

وادي ذي غزال 🦌

ظهر الجمعة انطلقت من وسط الطائف باتجاه الشفا، والمسافة حوالي 35 دقيقة، الطريق ممتاز ومسارين لكل اتجاه، لكنه مليان تعرّجات وصعود، ومباسط الشاهي على الطريق خلتني أصحصح للخط، لما اقتربت من الشفا شفت لوحة وادي ذي غزال يسار، تذكرت كشتات العائلة القديمة وقرّرت أجدّد الذكريات في المنطقة والمكان. 🧑‍🧑‍🧒‍🧒

طريق الوادي بمسار واحد ويحتاج تركيز، تقريبًا بعد أول 5 دقائق من يوم لفيت مع الشارع بديت أشوف الطرق الثانوية اللي تودي إما للوادي تحت والمزارع المحيطة فيه، أو قرية صغيرة أو حتى مكشات. 🚗

الجو كان حلو، والهواء بارد ودرجة الحرارة ما تزيد عن 28،  لكن الشمس حزة الظهر حارة خاصة إذا تعرّضت لها مباشرة. 🌞

وأنا أتمشى بالطريق، لاحظت بسطات أهل المنطقة المتناثرة يمين ويسار، بمحاصيل اشتغلوا وتعبوا عليها بنفسهم.🍒

وما أمداني أمشي شوي، إلا ويلفت انتباهي العم حسين السفياني وهو جالس تحت مظلّة وجنبه شاص، وتقدر تحس برواقه وهدوئه قبل تسولف معه حتى. 🍯

جلست أسولف أنا وإياه عن المنطقة، وذكر لي إن فيه 8 أودية غير وادي ذي غزال متتابعة خلف بعض لين توصل تهامة، أشهرها وادي ذي غزال. يقول العم حسين إنه قطع المنطقة كلها على رجوله والرحول قبل السيارات والشوارع.🚶🏻‍♂️

وقعد يسولف لي عن استخراج العسل، وكيف ورث هالمهنة من جده وأبوه، حتى أنه يتذكر أيام طفولته يوم كان يروح لمكة يبيع عسل من نفس مزرعته الحالية والقريبة من الكشك اللي يبيع فيه.🌳

ذقت العسل، صراحة لذيذ جدًّا، وما زال هو اللي يستخرجه بنفسه. 🐝

وادي حرجل 🫐

في السفر يطلع جانبي الاجتماعي أكثر؛ وأسولف مع الناس أكثر، فبالإضافة للعم حسين، تعرّفت على العم فهد السويعدي، اللي كان وهو باسط ويروح كل شوي لمزرعته يقطف فاكهة طازجة ويرجع يبيعها!

وفي سواليفنا، قال لي أن وادي حرجل أكثر الأودية خضرة وشجر في المنطقة. قلت بس لازم أزوره، وفعلًا يوم وصلت لاحظت كثرة المزارع والخضار على مد النظر، منظر رائع جدًا، هذا غير البرشومي المتناثر على الطريق. 🌵

وأول مزرعة زرتها بالوادي كانت مزرعة العم فهد اللي ورثها عن أبوه، مساحتها كبيرة جدًّا، ويزرع فيها كل أنواع الثمار اللي تشتهر بها منطقة الشفا. والأجمل من كل هذا أنها تطل على جبل قرنيت! ⛰

جبل قرنيت ثاني أعلى قمة من جبال الحجاز، يوصل ارتفاعه 2,500 متر ويطل على أودية كثيرة غير وادي حرجل، وسُمي بهالاسم نسبة للصخور الجرانيتية اللي تكونت فيه على مدار ملايين السنين، ويعتبر وجهه لمحبين التسلق، حطيته ببالي زيارة أخرى لعدد آخر. 👀

المزرعة فيها: ذرة وبخارى وتين وتوت. طبعًا البخارى البلدي في الشفا هي أكثر ثمرة يحبونها ويفتخرون بزراعتها على كلام العم فهد. وفعلًا ما ينلامون، طعمها حالي جدًّا ومب ناشفة، وأقرب شي لها بالطعم والشكل هو العنب. 🍇

والتوت رغم إنه بنهاية موسمه، ما ذقت مثله، هذا غير كثافة لونه اللي تصبغ باليد. 🫐

العم فهد سمح ومرحّب ويحب مزرعته والمنطقة. أخذ فيني جولة وعلّمني الكثير، وقال لي إنه يحب يشارك الناس عن ديرته وجمالها.🫶🏼

طلعت من المزرعة وكملت المشي في الوادي، الساعة كانت 05:00 العصر، والجو ما زال رايق وبراد لطيف جدًّا، والغيم يغطّي الشمس شوي ويبعد عنها شوي، ووين ما التفت أشوف قدامي شجر من كل شكل ولون، ووراه جبل شاهق بتكوينات عجيبة كأنك تشوف لوحة، الهدوء كان جميل ومريح يجبرك تتأمل في خلق الله. 🌤️

وأنا أتمشى لاحظت البرشومي طالع بشكل طبيعي في الأرض فقرّرت آخذ لو حبه رغم غياب الاستعداد، ما كان معي قفّازات فاستخدمت كرتون! 🤷🏻‍♂️

بعد مشواري مع العم فهد، حسيت مابي أرجع لأن الجو عليل، ولأني كنت أبي أتمشى وأستكشف، وساعدني الطريق اللي كان شبه فاضي. لكن بدون مقدمات وصلت لمكان مزحوم من السيارات، وقفت أشوفه وطلع مقهى ومطعم داخل مزرعة، وعنده أنواع الأشجار؛ تين وبخارى وأشجار الموز تغطي الجلسات وكل المسارات.🍌

أخذت في المكان نص ساعة ما بين تمشية وجلسة تأمّل بين الجبال، والقائمين على الشغل هناك هم أهل المكان. بعد شوية سوالف معهم يوم جيت أمشي طلبت شاهي جمر، عطوني إياه ورفضوا أحاسب.🫖

دائري الشفا 🛣️

زرت الشفا في هالسفرة ثلاث مرّات، عصرًا مزدحم جدًّا، والطريق يصير باتجاه واحد، قبل الغروب زحمته متوسطة، وبالليل هادي ورايق. 🌌

الدائري عبارة عن حلقة في رأس جبل ويدور الشفا كاملة دورة مسافتها كيلوين، تمشي فيه باتجاه عقارب الساعة ويكون يسارك إطلالة جبل دكا أو محلات، ويمينك غالبًا بيوت واستراحات أو أماكن كشتات ومحلات إضافية، يوم رحته ما توقعت أشوف غروب لا يُنسى.☀️

رحت من خلاله لمقهى مقيال، اللي جلساته فيها إطلالة على الشفا كاملة، ومن هنا عرفت وش يعني ارتفاع 2,500 متر. المكان شفت منه غروب شمس يدخل بقائمة الأجمل في حياتي، لأنها تختفي بين الجبال، وكأنها تدخل بينهم. 😲

• رقم تواصل العم حسين السفياني: (0509294320) 📞

• رقم تواصل العم فهد السويعدي: (0555624622)📞
  
  مزرعة مشعل السفياني 🐎

هذا المكان له قصة بدأت لما سافر مشعل مع والدته لإيطاليا وأعجبتهم بيوت الجبال، فقالت أمه: «كنا نعيش بنفس الطريقة في الشفا». على كلام مشعل إنه صار ينتظر الرجعة للسعودية، وأول شي بيشوفه بيوت وديرة أجداده. وفعلًا هذا اللي صار. رجع وشافها وقرر يعيد إحياءها بطابع جبلي وتراثي مميّز. 🏡

المزرعة في منطقة الشفا على ممر أحد الأودية، وتمتد من بطن الوادي إلى قمة الجبل، تحت في الوادي فيه مزرعة ومصنع الورد، وفوق شوي فيه المطعم والمقهى والجلسات، هذا غير البيوت الحجرية في القمة، وإسطبل الخيول ومنطقة رمي السهام. 🎯

 والأهم من هذا كله هي مسارات المشي المتعدّدة، أحدها مسار يعتبر متوسط الصعوبة ويحتاج خبرة شوي، وياخذ ساعتين رايح جاي تقريبًا. الجميل أنه يؤدي لقلعة قديمة اسمها الدار السوداء، وحصن اسمه حصان المضحاة. 📜

ومسار ثاني يودي لواحدة من أعلى النقاط على الجبل. الطريق كان واضح وسهل المشي فيه، والطريق كان ممتع، وأنا أشوف كيف الطريق جاي من تكوّنات الصخور الكبيرة والجبال، بغض النظر عن أني تعبت لأن ما تعودت على «الهايكنق»، لكن يوم وصلت نسيت التعب ومشواري من الرياض كله... 🥲

كانت الإطلالة على مزرعة مشعل والقرية الصغيرة، جمال الغروب يتلخّص إن الجبل يحجب الشمس عنك، فتبقى الدنيا منورة بدون شمس، والرؤية لكل اللي حولك تصير ممتازة. ☀️

سعر الهايكنق هنا بهذي الإطلالة مبلغ رمزي جدًّا، ولو طلبت من المقهى ممكن ياخذون حساب اللي طلبته بس.

• دخول المزرعة مجاني. 🆓

• فيه محل تأجير معدّات للتسلّق أو الكشتة. 🥾

• سعر تجربة المشي للحصون، لفريق كامل مع مرشد 1,000 ريال 💰

• أغراض الجلسة لها سعر منفصل. 💳

• تقدر تحجز فعالية يرتبونها لك في المزرعة زي احتفالات التخرج. 🎊

ودّك تلفّ الرياض بميزانية أقل؟ 💸

في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.

 تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.

لوّن صيفك، واحجز الان.

  سألنا كذا شخص عن وجهات يقولون لازم تروح لها إن زرت الطائف، كانت معاييرنا:

• لذة الأكل بالمقام الأول وأصالة الطعم. 🍛

• التنويع بين الأماكن البسيطة والمرتبة. 👩🏻‍🍳

• أماكن تعطي تجربة مرتبطة بالمنتجات والأطباق المحلية. 🌸

• السكن من أهم عناصر أي رحلة، وإذا رايح تبي تصيّف بديرة فمعناها تبي مكان مفتوح متصل بالطبيعة، وهنا نقول لك السكن في كبائن أهوي مناسب تمامًا، موقعها في وادي ذي غزال وسط الجبال والطبيعة، ومزودة بكل الخدمات ما عدا الواي فاي لأن الهدف منها الانعزال عن العالم والاتصال بالطبيعة. 🌴

• يقول مازن العتيبي: الطائف يعني سليق! مطعم البادية من أفضل مطاعم السليق بالنسبة له، وخاصة سليق السمن والسليق الخاص، وعندهم خيارات كثيرة، زي سليق الدايت، وسليق القشطة! 🥣

• مطعم مندي الدعجاني يتحيّز له مازن لأنه يذكره بالمقلقل اللي كان ياخذه لفطور رمضان، حتى أنه كان على قائمة وجهاته أول ما بدأ يستلم مكافآت الجامعة، لأنه يقول عند هالمطعم المندي الألذ ويطلب منهم للغداء مندي لحم، وطبعًا فطور مقلقل، مع العلم أن المكان في محطة وجلساته بسيطة جدًا فينفع للشباب أكثر. 🥘

• مطعم مَلّه، جانا توصية من المصور والمرشد السياحي عبدالرحمن الدغيبلي، يقول أن وزير السياحة زاره وجاز له، اللي عجبني بالمطعم دمجه بين الأطباق التقليدية وتوظيف منتجات محلية، تلقى سليق وتشيركيك وقهوة بالورد الطائفي مثلًا، وينفع لأي وقت باليوم لأن يقدمون كل الوجبات. ☕️

• سولفنا مع المصور ظافر الشهري عن الطائف، اللي ارتبطت عندنا بصوره للورد الطائفي. لما سألناه عن وجهة ينصح فيها طبعًا كانت وجهة مرتبطة بالورد، خاصة وأنه يحب يزور أماكن تجمع الترفيه بالتجارب الثقافية زي مصنع الشيوخ للورد الطائفي، اللي تقدر تتمشى فيه وتتقهوى، مع جولة في المعمل تشوف فيها تقطير الورد، وينصح ظافر تكون هناك أول ما يفتحون الصباح حتى تحضر التقطير. 🌸

 ملحوظة: تقطير الورد الطائفي يكون في شهر أبريل فقط، لكن تقدر تشوف الأجهزة معروضة.

أهل المكان هم أخبر الناس بأرضه وخيرها. 

التقينا بالشيخ مقبول الطلحي، شيخ باعة العسل في الطائف، ومُحكّم دولي في جودته، ومسؤول عن حراج العسل يوم السبت في سوق البلد.

الشيخ مقبول الطلحي سمح واجتماعي ويحب السوالف، امتلك محل عسل ورثه عن أبوه، وخبرته في المجال تتجاوز 40 سنة، نقلها لأبنائه، وصارت مهنة عائلية. 🍯

النحّالين يورّدون له العسل من أرياف الشفا والهدا وعشيرة وبني سعد. وهو بخبرته يميّز بين التقليد والأصلي، بمعايير مثل الريحة والطعم والحرارة اللي يتركها في الحلق بعد أول ملعقة، ويميّز بين أنواع العسل بمعرفته بالريحة العطرية للنبتة ولون العسل، يعني بتلقى كنز معلوماتي يخليك تعرف تختار العسل طول عمرك. 🌸

الشيخ يستقبل أصناف العسل ويبيعها خلال أيام الأسبوع، لكن اليوم الأفضل للشراء هو يوم السبت وقت الحراج، اللي تقدر تاخذ العسل فيه بأفضل صفقة، ومع اعتماد منه. 🧾

إذا حبّيت تلتقي بالشيخ مقبول الطلحي وتسولف معه عن خبراته وتشتري منه أفضل أنواع العسل، تقدر تكلمه وتنسق معه زيارة.

رقم التواصل 📞: (0127321572)

محل الشيخ مقبول: الطلحي لحراج العسل شيخ باعة العسل.