مكتبة قديمة في الرياض ترجعك للسبعينيات

المكتبات بالنسبة لي وجهة ما أمل منها.❤️
ولازم بين فترة وفترة أروح تمشية لمكتبة، وحلاتها تمشية وحدانية. 
وفي المكتبة مو لازم أشتري شيء... يكفيني فقرة الاكتشاف والتمشّي. 
هالعدد جولة في مكتبة أبو عبدالله، وتوصيات لمكتبات تناسب تقضي الوقت فيها مع أطفالك📚

في يوم الخميس، وفي عز زحمة العصريات، الساعة 5:00 تحديدًا، قرّرت أروح مكتبة المعارف. 

منظر الشوارع كان يقول لي: استهدي بالله وارجعي، لأن المكان زحمة في الأيام العادية، فما بالك في يوم تزيد فيه الزحمة؟

بس ما علينا، دام الوجهة تستاهل العنوة.. نتحمّل القرارات الفجائية.

سويت عدد سابق عن المكتبات. ولكن يوم سويته اكتشفت مكتبة أخرى، وهي مكتبة المعارف للنشر والتوزيع؛ المكتبة مختلفة وأصيلة، وقلت هذي المكتبة تستحق الروحة لها، والكتابة عنها، والسبب: إن لها قيمة تاريخية في كتبها ونوعيتها وأصالتها، ولأنها من أقدم المكتبات بالرياض، وما زالت محافظة على طابع الأصالة، لدرجة أن اللي يدخلها يحس أنه رجع لحقبة السبعينيات. وأكيد ما أنسى أحد أهم أسباب الزيارة: شخصية أبو عبدالله، أمين المكتبة.

بعد عدة زيارات خاطفة مع حنين -اللي عرّفتني على المكتبة- قلت هالمرة بزور المكتبة لحالي، وأنسى الوقت فيها.

بدأت الرحلة في شارع العطايف، عند فطاير أبو جمعة. 📌

فرن أبو جمعة، أو مثل ما يسمونه الآن «بوفية فارس الغامدي».

أبو جمعة -رحمة الله- رجل من الجنسية السورية، أسّس هالمكان سنة 1982، وكان أول فرن يخبز الصفيحة الشامية بالرياض، وبعد ما توفى كمّل أحفاده ما بدأ فيه، وهم الآن الجيل الثالث.

بتحصل عنده فطاير على شكل قوارب، بحجم كف اليد.🤚
الخبز مقمّر، والعجينة خفيفة، والحشوة تقدر تتحكم فيها بالشكل اللي يجوز لك.

أنصحك تجرّب السبانخ لو كنت تحبها، لأنها كانت الأفضل بالنسبة لي، وتقدر تاخذ من عندهم شاهي أو لبن عيران. 

الملاحظة الوحيدة في المحل أنه على الواقف، تاخذ طلبك وتمشي، والزحمة فيه عجيبة. يعني الأفضل أنك تكلمهم يجهزون لك الطلب قبل توصل، حتى ما تنتظر من عشرين دقيقة إلى نص ساعة.

وبما أن ما يمديك تجلس، فعندك خيارين: يا تأكل في سيارتك، أو تجلس في كنبة انتظار الحلّاق اللي جنبه، وتراه حليل وما بيقومك.

بعدها تكمّل مشي في شارع المكتبات، اللي كانوا يسمونه قبل «القلب الاقتصادي النابض»، بسبب كثرة المكتبات والمحلّات اللي على مد النظر. 

تفرّج على اللوحات والمحلّات، لين توصل وجهتك. 

أنا وصلت بدري فسويت كل الجدول السابق، وانتظرت هناك إلى بعد صلاة المغرب حتى تفتح المكتبة. 

ليه هالمكتبة؟ وليه ممكن تقضي كل هالوقت فيها؟

عشان أمرين:

أولًا أبو عبدالله، وبتكلم هنا عن شخصية أبو عبدالله «سامي سعد الراشد»، ابن المؤسس لمكتبة المعارف في حي الديرة. افتتح والده المكتبة قبل ما يقارب 60 سنة.

شخصية أبو عبدالله فذّة، والجلسة معه ماتعة، ومدهشة، تسأله عن كتاب يشرح لك عن الكاتب، وسنة النشر، وعن أكثر شي أعجبه في الكتاب. 

يقول أبو عبدالله: « يا رِهام أنا أحب حياتي مع المكتبة، لأن أحس أني حُر، كأني مشرّد في كل مكان وزمان... ولكن مع كتبي». 

أول ما تدخل بتشوفه على اليمين، جالس على كرسيّه ومحاط بأغراضه، ويتوسّط في أكثر الأماكن سعةً في المكتبة. أحيانًا يجلس جنبه ابنه عبدالعزيز، أو أحد أصدقائه، ومعهم إبريق شاهي.

بيعرض عليك تشرب شاهي وتسولف معه عن اهتمامك بالكتب - لو عرفك زين، وأقصد زين، لأن ما نشأت علاقة السواليف مع أبو عبدالله إلا بعد الزيارة الخامسة، وبعد تفحّص شديد من طرفه.

يسألك عن اهتماماتك ورأيك في الكتب، لأنك في المقابل بتسأل عنه وبتعرفه، فودّه يتطمن ويعرف مين اللي مقابله، واللي جالس يسأله ويسولف معه.

بعض الأحيان ما يحب يجاوب، ويمكن يناولك كتاب ويعلمك قصته، دلالةً على تغيير الموضوع، وأنت عاد افهمها وهي طايرة.

لكن بالنسبة لي، أبو عبدالله وشخصيته من أهم الأشياء اللي تخليني أرجع للمكتبة مرة ومرتين وثلاثة. يأخذك بين السواليف، ويتمشى بك في الزمان، والقصص والناس، ويمكن يحارشك شوي، عشان يفهم منطوقك، وحتى يختبر فطنتك ببعض السواليف.

أما الأمر الثاني، اللي ما يقل أهمية عن الأول، هو : المكتبة ونوعية الكتب. 

تصميم المكتبة العريقة، في وسط حي الديرة، قائم كله على الكتب، والإضاءة البيضاء -النجفات القديمة- تحسّسك كأنك في فِلم في السبعينيات. وبتلاحظ الأباريق الموزّعة في كل مكان، والتلفون القديم، بتحصله جنبه فوق كتبه المفضلة حوله.

بتحصل كل شيء عشوائي، العشوائية الحلوة، والمدهشة للعين، بتلقى مكيّف متوزّي بين الكتب، وكتب تلامس السقف.

أما عن الكتب، فأغلبها، إذا ما كانت كلها، قديمة. بعضها عمرها 40 أو حتى 60 سنة، وبالطبعات الأولى أو الثانية. تحس أن المكان متحف للكتب القديمة.. كل كتاب له قصة، وله عمر.

وبالنسبة للحصيلة اللي طلعت فيها فهي كالآتي:

• مجلة العربي سنة 1964. 

• نوتة محاضرات جامعة الرياض (الملك سعود حاليًّا) من أيام الملك خالد رحمه الله.

• كتيّب تذكارات عن الرياض الحبيبة.

تنويه بسيط قبل الزيارة: 

• أبو عبدالله شخص ودود، لكنه يحب الخصوصية، فانتبه أنك تاخذ وتعطي في أمور شخصية وهو ما يعرفك زين ولا بينكم علاقة وطيدة.

• تعال المكتبة بين الساعة 6:00 - 10:00 هذي الأوقات الأساسية اللي تفتح فيها المكتبة، وبعض الأحيان على المزاج. 🤣

• ما فيه جهاز دفع بالبطاقة «شبكة»، فاحرص تجيب كاش معك.

• خذ معك شنطة قماشية، لأن الأكياس هناك بلاستيكية وعادةً ما تتحمّل وزن الكتب.

• في المواقف، يا أنك بتكون محظوظ، مثلي، وتوقف قدام المكتبة، أو أنك بتوقف في مواقف سويقة، هي الأقرب.

• ولو جاي بالمترو، فمحطة منطقة قصر الحكم هي الأقرب.

توصياتنا هالمرّه عن مكتبات تستمتع فيها مع الأطفال، سألنا فيها صديقتنا حنين، مهتمة بالكتب والأطفال وبناء العلاقة بينهما.

اختيار المكتبة مرّ بمعايير تناسب الأطفال

1. بيئة مناسبة ومصممة للأطفال.

2. نوعية الكتب وتنوعها.

•  مكتبة الملك عبدالعزيز العامة: تجربة المكتبة العامة. 

صحيح تقدر تروح مع أطفالك لأي مكتبة، لكن المكتبات العامة والكبيرة تجربتها غير.

تلاحظ أنها مُجهزة وتتقبّل وجود الأطفال، فيها مساحات جلوس وقراءة متنوّعة وواسعة تناسب الأطفال وكثرة حركتهم. كذلك فيها كافتيريا تقدم وجبات خفيفة، ودورات مياه نظيفة وسهل الوصول لها، وهذا من أهم المرافق في أيّ مكان، فما بالك بمكتبة بتقضي فيها ساعات ومع الأطفال؟

لكن الأهم أن ما فيها ألعاب ومنتجات تلمع بألوان صاخبة على كل رف وفي كل ممر. بتحتاج هالشيء عشان ما يتشتتون ويصعب عليك تضبطهم وتتعامل معهم.

وبما أنها مكتبة عامة فدخول العائلة كلها متاح، وكذا تقدر تخليه نشاط عائلي ليوم كامل أو عدة ساعات.

• تفتح مكتبة المربع من 8:00 الصباح وتقفل 8:00 المساء. ⏰

• يُسمح بدخول الأكل، فممكن تاخذ خفايف لأطفالك. 🥪

• لا تنسَ تجيب معك ألعاب، بس تكون غير مزعجة، ولا تنسَ الأوراق والأقلام لدمج اللعب مع القراءة، حتى تنعش طاقة أطفالك وما يملّون. 🧸

•  المكتبة عندهم فعاليات متنوعة في أكثر من فرع، تلقاها على حسابهم. 🎨

• استفسر عن نظام الإعارة، وعن باقات الكتب، إذا ودك. 🎫

• إذا كان طفلك يحب الكتب والمكتبات، استفسر عن برنامج الموظف الصغير، اللي يجرب من خلاله الطفل العمل أمين للمكتبة. 👧🏻👦🏻

يمكن ما تكون المكتبات العامة خيار مناسب لك ولعائلتك، أو تكون بعيدة، هنا بقترح لك ثلاث مكتبات صغيرة مخصصة للأطفال وكتبهم:

• مكتبة كان يا ما كان. توفر كتب أدبية مميزة قليل تلقاها عند مكتبات أخرى. المكتبة صغيرة ومواقفها صعبة، فالأفضل تبتعد عن أوقات الذروة والازدحام.

• تفتح أبوابها طيلة أيام الأسبوع، عدا الجمعة والسبت، من 4:00 إلى 9:00. 🚗

• مكتبة دار الهدى. ما تشبه غيرها، إذا دخلتها ما بيطلع طفلك بسهولة، لأنها مليانة كنوز قديمة. صاحبها رجل سوري، بتسولف معه، ويمكن يقرأ لطفلك، وبيقترح لك كتب.

• أكيد بتلقى فيها أشياء غريبة، زي الغلاية والبساكيت وصناديق ما تعرف وش داخلها، ولكن كل هذا أعطى للمكتبة شخصيتها المختلفة.

• تفتح طيلة أيام الأسبوع، من 9:00 الصباح إلى 1:30 الظهر. ثم من 4:00 العصر إلى 11:00 مساء، إلا الجمعة، من 6:00 مساء إلى 11:00 مساء. 📜

• دار هبة. الدار اللي تقدر تاخذ منها أي كتاب وأنت مغمض. الكتب مختارة بعناية شديدة، وبتلقى فيها كتب مناسبة حتى للأطفال اللي أعمارهم بالأشهر، وعندهم باقات لطيفة ومتنوعة. والمكان مرتب ومعروضاته واضحة، وفيه طاولة صغيرة للقراءة السريعة.

• تفتح طيلة أيام الأسبوع من 4:00 العصر إلى 10:00 مساء. 🫶🏼

ودّك تلفّ الرياض بميزانية أقل؟ 💸

في الرياض، كل يوم ممكن تزور وجهة جديدة، ومع عروض صيف السعودية، مشوارك ما يوقف عند وجهة واحدة. كل مشوار يفتح لك باب لتجربة ما جربتها من قبل.

 تقدر تخلي رحلتك متكاملة: تجربة، وجبة، وحتى سكن، وكلها بأسعار أقل من اللي كنت متوقعه.
انبسط بالرياض، واكتشف عروض صيف السعودية.

لوّن صيفك، واحجز الان.