وين أركض بالرياض؟ 🏃🏽‍♀️🏃

لما قرّرت أشارك في مارثون الرياض، كان طموحي أكمله للنهاية. واستمريت 5 أشهر متواصلة من الركض، وواصلت ركضي شبه اليومي بدون أي انقطاع حتى أحقّق الهدف. 💪🏻

لكن بعد ما خلص المارثون، صارت الأسابيع اللي بعده غريبة شوي... صارت بدون هدف واضح يخليني أركض كل يوم. 🫠

مع استمراري على الركض في الشهور الماضية، كنت أحس بشعور عجيب... وهو أن الركض يشحن بطاريتي🪫ويعطيني شعور حلو أحتاجه حاجة ملحة بأكثر أيامي اعتيادية. 🔋

وبما أننا مقبلين على شهر رمضان، قررت هالسنة يكون مختلف، أكمّل الأنشطة الروحيّة اللي اعتدت أحييها في هالشهر بالأنشطة البدنيّة اللي دائمًا أحرص عليها، والركض جزء لا يتجزأ منها. لكن بخليه بجداول ركض خفيفة وبمسافات قليلة، حتى أقلّل الشدة ولا أقطع الرياضة في هالشهر الفضيل. 🌙

قبل ما أنقل تجربة الركض ، ودّي أقولكم ليش أحب أركض عمومًا، وليش ركضت أكثر من 300 كيلو تقريبًا من بديت بهالرياضة: 🏃🏽‍♀️

• الركض رياضة تأملية بالدرجة الأولى: كأنها السجة اللي تحتاجها مع نفسك.  

• رياضة تشغّل كل حواسك: تركز بالاتجاهات على الخريطة، تتذكر المواقع، تشوف الأشياء على مد البصر، وتحس بالروائح، مثل ريحة طبخ جيرانكم أو ريحة الأشجار، وغيرها كثير.

•  رياضة تفريغ الضغوط: مثالية لتفريغ الضغوط اليومية اللي نحس فيها تجاه العمل والحياة. والأفضل لو ترتب وقت يناسبك، ممكن الصباح حتى تكتسب الطاقة، أو تخليها بعد أسبوع مزدحم بالمهام.

• والأهم أنها رياضة تحسّن نومك: فكل ركضة تترك خلفها أفضل نومة عميقة متواصلة. 🛌

ما علينا...

يوم الثلاثاء، ضبّطت المنبه على الساعة 5:00 الفجر، وكان الحافز أني أحتاج أركض قبل مداهمة ساعات العمل الطويلة، اللي كنت أعرف أنها بتمتد بمعدل يتجاوز 12:00 ساعة. 😵‍💫

والأهم بالنسبة لي، أني في الليلة اللي تسبق صباح الركض، كنت عارفة أن فيه احتمالية ترافقني مطرة خفيفة في ركضتي الصباحية. 🌨❤️

وصلت للمسار السري اللي اكتشفته مؤخرًا. 🧐

(مسار وادي حنيفة الجديد المتصل بالدرعية)

ميزة هالمسار أنه مناسب لكل الناس؛ أرضية مستوية، ومزروع بالشجر، ومناطق استراحات للجلوس، والأهم من كل هذا أنه هادي ورايق.

ولعله وقف يكون مكانيّ السريّ 😆

بعد ما أُعلن عن افتتاح المسار الرياضي بالرياض بمرحلته الأولى واللي جاء بالصدفة أنه كان ممتد من مساري اللي أشاركم تفاصيله بهذا العدد.

نبذة على الطاير عن المسار الرياضي 🏃🏽‍♀️: 

• أكبر منتزه طولي في العالم! 

• المرحلة الأولى من المشروع مسار بطول 83 كم. 

• موزعة على عدة وجهات مختلفة منها:

1. وادي حنيفة

2. البرومينيد

3. مسار الدراجات في جامعة الأميرة نورة

4. منتزه الرمال الرياضي

وهنا من مسار وادي حنيفة:

قبل بداية أي ركضة أحرص أني ما أفاجئ عضلاتي، فأبدأ بالتحمية. ثم أختار الصاحب المؤنس، وهالمرّة فيروز.🎵

قرّرت أن ركضة اليوم تكون 10 كيلو مريحة. أستمتع فيها، بدون جهد بدني وسرعة عالية. بديت بالمسار ثم انتقلت لمسارات المشاة داخل الدرعية نفسها، بالقرب من البجيري ومزارعها ومركزها الفنيّ.

الحمدلله تمّت الركضة بنجاح قبل بداية ساعات العمل بساعتين، ورجعت لنقطة البداية. 

بعد كل ركضة أحب أكافئ نفسي بشيء آكله أو أتقهوى عليه، فلو مشيت بالمسار بالليل أو في رمضان، السمحانية مناسبة لهذا النوع من المكافآت، أو من مقاهي المسار. 

ولأن هالركضة صارت قبل رمضان، رحت لمحل كبدة أحبه. ❤️

ميزة هالبوفيّة أنها على طريقك، فما تحتاج تدورها، يقدم الكبدة مع حمسة وخلطة مختلفة، تشبه خلطات طبخ البيوت اللي فيها حمسة الطماطم والبصل.

بشكل عام أهم ما في التجربة: 

• المسار لم يُنجز بشكل كامل حتى الآن، كونه متصل بالمسار الرياضي. 

• لو اكتمل، أتخيله بيصير مثالي، لأنه واسع «تطرد فيه الخيل»، ومستوي الأرضية، وممتد على مد البصر.

• إذا تحب الهدوء، المسار مناسب في المساء أو صباح عطلة الأسبوع.

حتى تستمر:  

• اختار الوقت اللي يناسبك للركض.

• اختار المجتمع أو الصحبة اللي تحمسك للركض. وإذا كنت ما تعرف كيف تبدأ بعالم الركض، وبما أن رمضان على الأبواب، فأنصحك بمجموعة «r7runclub»، منزلين جدول رمضاني على مدار 3 أيام. لو التزمت معهم بتلاحظ تطوّر ملموس، بيشجعك على الاستمرار بهالرياضة.

• هنا توصية صغيرة فادتني في تتبّع أدائي في الركض: منصة «strava»، وهي منصة تواصل تشبه بقيّة مواقع التواصل الاجتماعية الثانية، لكنها مخصّصة للي يمارسون الركض والرياضات الثانية؛ تحسب فيها سرعتك، ومسار ركضتك، وتعلمك إذا أداؤك كان سريع مقارنة بركضاتك القديمة، والأهم أنك تقدر تشارك إنجازك مع مجتمع يشاركك نفس الاهتمام، وتقدر تعرف منهم مسارات ركض جديدة.