بوفيّات ومقاهي حولك وحواليك ☕️🥖

أحب المعصوب، وأذكر أنّي قبل سنتين تقريبًا بدأت بسلسلة أجرب فيها المعصوب. لكنها وقّفت في بدايتها، بعدما عرفت سعرات اللقمة الوحدة. 🫠

بعدها صار الموضوع يمشي على المزاج، اشتهيت معصوب أروح آكل. لكن أكتفي فيه كوجبة عن الثلاث وجبات، لأنه أكثر من دسم❤️

ما علينا، سألت الأكيلة حولي عن معصوب ينصحون فيه، ووصلتني عدّة اقتراحات. واخترت منها بوفيّة العروسي، واخترته عشان اسمه حقيقةً 😆

اللي بيروح للبوفيّة -بالشَّدة، ما نقولها بوفيه- يروح لها الصباح، قبل الـ 11:00 أهم شيء. 🕚 لأنهم يقفلون 11:30 عادةً، ويفتحون نهاية العصر تقريبًا على الـ 5:00. 

وجّهت لبوفيّة العروسي في الدريهمية، وكانت تبعد عني تقريبًا 30 دقيقة. رحت من طريق الملك فهد، الساعة 10:20 الصباح، وكان الطريق سالك.

أول ما دخلت شارع الأفلاج، اللي فيه بوفيّة العروسي، كان كله نخل، والخضار يحيط بك من كل مكان.🌴

وصلت على آخر لحظة.. لأني لقيتهم بدؤوا يضفون الطاولات والكراسي، ويتجهزون لتقفيلة المحل.

كلمت المحاسب أشرف، وطلبت منه معصوب، قال: للأسف خلّص. لكن بعد المحاولات وإظهار بطاقة وقت المشوار، والزيارة الأولى لهم. 😆

قال: أبد، اعتبريه تمّ. وقال: لازم تطلبين عريكة العروسي، لأننا مشهورين فيها. 

يقول أشرف أن المحل مفتوح من سنة ونصف، ومن وقتها والرّجِل على المحل ما وقفت، خصوصًا فترة الصباح. 

طلبتهم المعصوب والعريكة، حتى أجربهم، وشفت تجهيزه بالكامل. 😋

وأنا طالعة أتذكر توصية لمحل قريب منه، حوله وحواليه قلت فرصة نذوق ونقارن، مع محل شعبيات الزمن الجميل.

وفعليًّا يبعد تقريبًا 7 دقايق.⏳

مريتهم على عجالة ولحقت عليهم قبل ما يقفلون، حتى أخذ مطبق، وأجرب معصوبهم.

وفي الطريق من العروسي إلى الزمن الجميل، شفت منتزه السويدي، مكان مثالي لو حبيت تفطر داخل سيارتك، أو تنزل في المنتزه. رجعت له بعد المحطة الثانية، حتى أفطر فيه، لأني دايم أحب أفطر في مكان شَرح. وقفت عند المنتزه، وبديت أذوق من المحلين أطباقهم.

أفضل طبقين: 

• عريكة العروسي، أبهرتني! لذيذة، لكنها مغرّقة شوي، وحلاوتها زايدة شوي. 🥇

• مطبق الزمن الجميل، كان رهيب لدرجة ما حطيت ليمون، طعمه متكامل. 🥇

بشكل عام: 

• تمنيت أن البوفيّات يطولون ساعات العمل للظهرية.

• المحلين اثنينهم تقدر تتصل عليهم بجهزون طلبك، تاخذه معك أو تجلس في جلساتهم. 💥

• أسعار كل طلباتهم مناسبة.

• حتمًا لي رجعة للمحلين، وملاحظاتي بذكرها حتى تكون الطلبات موزونة. ⚖️

• لو تبي تجرب أصناف كثيرة، فالله الله بالصحبة، أو خطة تكتيكية لتوزيع الفائض. 👀

• المشاوير البعيدة حلاتها الضحى في وقت الدوامات، أو في عطلة نهاية الأسبوع.    🫱🏼‍🫲🏽

وصباح الخير من الرياض.❤️

شاركونا مقاهيكم المفضلة والسرّية للعمل والدراسة بالرد على هذه الرسالة، وإن شاء الله ما نعلّم أحد. 🫣