شبّة ضو ونفاهة البر في القصيم 🔥⛺️

كشتة في نفود الغضا

من حسن الحظ بالسنوات الأخيرة صارت أجواء رمضان مختلفة، ويغلب عليها الغيم والأمطار، وهذا يخلينا نتحمّس للكشتات اللي تعتبر فعالية جديدة ما اعتدنا نسويها خلال هذا الشهر. 🌧️

فإذا أغراك الجو تفطر بمكان مفتوح تمد فيه النظر، وتستمتع بمختلف تضاريسه، من الطعوس إلى المناطق الرملية المنخفضة وخَضَارها، تأكد إن نفود الغضا المكان المثالي لمثل هالرحلة. 🏜️

سمُي بـ«نفود الغضا» لانتشار أشجار الغضا فيه، الأشجار الصحراوية اللي حموها أهل عنيزة من الانقراض، وصار عندهم مهرجان سنوي للاحتفاء فيها. وإذا كنت هناك، تقدر تاخذ من بذورها اللي تتساقط تحت شجرة الغضا وتزرعها في مناطق مختلفة.🍃

يبعد نفود الغضا عن محافظة عنيزة 17 كيلو، تقريبًا 18 دقيقة بالسيارة. بتحتاج له سيارة دفع رباعي، ولو كنت مخطط بس تفطر هناك وترجع أنصحك تاخذ مؤونة السحور للاحتياط. 🚘

وطبعًا حلاة الكشتة أنك تجهّز عفشك وتمشي بالنهار مع أصحابك أو أهلك عشان توصل بدري وعلى رواق تستلذ بفطورك. وإذا امتدّت جلستك في هالمكان الشّرح، تسحّر هناك وارجع بعد ما تستمتع بتأمل الشروق. أو في حال نويت تخيّم كم يوم تأكد إنك أخذت الترخيص، أو استأجر واحد من المخيمات المجهّزة، بتحصلها بأسعار مختلفة، وأماكنها متنوعة.⛺️

النفود مكان مناسب لفعاليات التطعيس، وصعود الكثبان الرملية بالسيارة، وخصوصًا بعد الأمطار والأرض متماسكة. وما فيه زي تكية بالنفود لتأمل الشروق والغروب، وأكيد مناسب لقعدة هادية مع بيالة شاهي أو كوب قهوة، وسواليف حول شبّة الضو، وألعاب جماعية تحلّي السهرة. 🎲

📍موقع نفود الغضا على تطبيق «Google Maps» 

نفود الغضا

إطلالة على واحات المذنب

واحات المذنب من الأماكن الخضراء البديعة والعجيبة بنباتاتها متنوعة، وتبعد عن وسط المذنب 14 كيلو، تقريبًا 16 دقيقة بالسيارة، والوصول لها سهل. وتتكون من 60 واحة بين الكثبان الرملية المرتفعة في نفود الصعافيق (أو زي ما يسمونها أهلها الصعافيدز).

وصراحة أحس أن الواحات لازم تصير بقائمة أي شخص يزور القصيم، لأن منظر الخَضَار والنخل وسط النفود والرمل يثير الهيبة والتعجب بالنفس. 

فلو فضيت بعصرية رمضانية جوها مغيّم، وجاء على بالك تتمشى في مكان شرح وواسع، حمّل أغراضك وفطورك، واتّجه للواحات، بتلقى بعضها مجهّز بجلسات ضيافة داخلية وخارجية مثل واحة الحسو الداخلي. ⛺️

بهالرحلة بتمر بمعالم كثيرة، منها بيوت طينية عمرها أكثر من 300 سنة، وبتشوف الآبار اللي كان أهل المنطقة يعتمدون عليها في السقاية، وبتلاحظ انتشار النخيل وأشجار الغضا والأرطى، فلو حبيت تزور مكان يجمع بين الطبيعة والآثار، واحات المذنب هي المكان المنشود. 🌿

طبيعتها الرملية تستلزم سيارة دفع رباعي تمكنك من الصعود فوق أحد الكثبان الرملية المطلّة على الواحات إذا جت حزّة الغروب. وهناك مد سفرتك وجهّز قهوتك، واستمتع بتأمل الشمس وهي تودّع المكان. 🌄

الواحات عادةً تكون مزدحمة في عطلة نهاية الأسبوع، فإذا ودك تتجنّب الزحمة، حاول تخلي زيارتك لها خلال أيام الأسبوع، وانبسط بالنقاهة. 🗓️

أثناء ما تجهز جلستك، لا تنسَ تحط رواق يخفّف عنك الهواء. ولو بغيت تمدّد الجلسة، وتستمتع بتجهيز وجبة السحور، أو حتى تبيت هناك ليلة أو ليلتين، فاحرص تمشي بالنهار.

وتأكد ما تترك بعدك مخلّفات أو أثر. ☀️

📍موقع واحات المذنب على تطبيق (Google Maps) 

واحات المذنب

تتبّع السيل في شعيب السهل 

إذا كنت تبحث عن منطقة رملية لتتبع السيل ومسارات مياه الأمطار، وفي نفس الوقت ودك بجلسة بالخضرة وبين أشجار الطلح والسدر، وتسمع فيها أصوات العصافير، فوجهتك المناسبة شعيب السهل. 🌧️

يمتد الشعيب لمسافة 60 إلى 70 كيلو، ويقع على امتداده مجموعة من الشعبان والفياض، منها شعيب الماردة، اللي يمثل واحد من أكبر المغذيّات لشعيب السهل، طريقه سهل بالبداية ويصعب كلما تعمقت، ويبي له سيارة بر طبعًا. 🏕️

سُمي شعيب السهل لسهولة مجراه واخضرار المناطق حوله وسهولة المشي فيه. موقعه شمال شرق القصيم، وبالتحديد شرق مدينة قبة في محافظة الأسياح، اللي بينها وبينه 25.5 كيلو، تقريبًا 18 دقيقة بالسيارة. 🌿

قبل ما تتوجّه للشعيب تزوّد بأغراض فطورك أو سحورك على الطريق، وإذا وصلت، سواء كنت لحالك أو مع جماعة، بتحلى الجلسة حول الشعيب والطبخ على الضّو، وبعدها شاهي خادر أو قهوة كايفة. ومهم تعرف أن الشعيب من الأماكن المكتظّة، لكن لا تشيل هم، لأن المساحة واسعة وشرحة، وما بتحس بوجود الناس حولك مهما كانوا كثيرين. 🪵

احرص يكون وقت وصولك بالنهار وبمواسم نزول المطر، ولا تنسَ مظلتك، عشان تستمتع بتتبع مسارات المياه، وتتأمل جمالها وهي تتفرّق بين الشعبان اللي تتقاطع بشكل غريب وكأنها مرسومة. ولأن الليل دامس في البر، يُفضل ترجع قبل على الفجر إن ما كنت مستعد للمبيت. ☔️

📍موقع شعيب السهل على تطبيق «Google Maps» 

شعيب السهل

• متحف حمد بن ناصر للسيارات الكلاسيك 🏛️

  حمد بن ناصر متسابق راليات افتتح متحف للسيارات الكلاسيك، وبكذا تعرف الشغف اللي ورا المكان، المتحف يقع في بريدة ويعرض عدد كبير من السيارات الكلاسيكية المصنّعة من دول معروفة بمجال السيارات مثل اليابان، وألمانيا، وأمريكا.  ويحتوي سيارات ترجع لعام 1899، الجميل ارتباط بعض السيارات بتاريخنا زي سيارات شركة أرامكو، وبعض الشخصيات المهمة في التاريخ السعودي. 🏎️

  أهم توصية أنك تتصل وتتأكد أن المتحف مفتوح قبل زيارتك. 📞

  • مطعم أكلات جدودنا 👨🏻‍🍳

  الواحد برمضان «وغيره» يحن بين فترة وفترة للأكل الشعبي والجلسة الأرضية و «فلّة الحجاج»، وهالمطعم في بريدة يعطي تجربة متكاملة من أول ما تلمح تصميم المطعم النجدي من برا، وحتى تفاصيله مثل إبريق الشاي، غير الطبخ المحبوك والمتنوع من مندي اللحم، والمطازيز، والمظبي، إلى الحلويات زي القشد والحنيني، مع ختامية شاي أو قهوة، التنوع هذا يخليه وجهة مناسبة للفطور أو السحور. 🥘

  • منتجع عسيب الريفي 🦋

   مساحة رهيبة في بريدة تجمع نفاه الطبيعة وخَضَارها لدرجة تلقى فيه حديقة فراشات، وحديقة طيور، بالإضافة إلى المقاهي ومحلات الشاي وكشكات الحرف اليدوية والعبايات وغيرها، مناسب إذا كنتوا مجموعة لأن خياراته كثيرة. 

  لكن احرصوا تروحون بدري عشان زحمة المواقف. 🚗

  • قاردن تلنتس 🦚

  محمية مختلفة عن المعتاد، كانت حلم لصاحبها بدأ قبل 15 سنة بعد زيارته لدول شرق آسيا وانبهاره بطيورها، وبعد سنوات قرر يفتتح محمية طيور نادرة وغريبة جاية من شرق آسيا يتجاوز عددها 500 نوع، الجميل بالمحمية أنها مساحات مفتوحة مع أخرى مبنية بأسلوب معماري ريفي جميل بألوان مشرقة كأنها تحاكي ألوان الطيور، فإذا تبي تغير عن الوجهات السياحية المعتادة توجّه لها بعد ما تحجز. 🦜

    الحجز المسبق إلزامي. 🎫

  • مطعم مقمر 🔥

  يتعنّون أهل بريدة وعنيزة للمذنب عشانه على أن قائمته محدودة، كأنهم يقولون لك كل طبق ضابطينه لك ما تحتاج غيره، لكن يبي لك تختار وجهة قبل تروح تتسحر أو تفطر فيها لأن المطعم ما فيه جلسات، فإذا تبيه لكشتة سريعة خذ معك حافظة وازهل العشاء عليهم. 🍲

  • جادة النخيل 🌴

  مزرعة في عنيزة تحوّلت إلى مزار سياحي شامل مسارات كلها نخيل وشجر تتمشى فيها وتنقّي مكان قهوتك أو مطعم عشاك، المكان شرح جدًا ووسيع صدر حتى بالزحمة وهي الغالبة عليه،

  إذا ناوي تروح لمطعم الأفضل تشيّك عليه وتحجز مسبقًا عن طريق «ماي تيبل» 📱

أهل المكان هم أخبر الناس بآثاره وتاريخه.

التقينا بمحمد الصمعاني، أبو عادل، صاحب متحف ذكريات من الماضي بمحافظة بريدة، عن طريق أريام الحربي.

اهتمامه بتوثيق التاريخ وجمع القطع الأثرية من بدايات حياته، لكن مع انشغاله بعمله، ما قدر يبدأ يحترف في المجال إلا عام 1427. 

يوم من الأيام اشترى أبو عادل مجموعة قطع أثرية عُرضت بمزاد في سوق الثميري بالرياض، ومن هاللحظة تنامى حبه للأثريات، وفتح دكّان صغير يعرض فيه القطع اللي جمعها، ثم قرّر يتوسع وينقلها إلى بيته. وواصل جمع التحف والكنوز النادرة والقديمة إلى اليوم. 🏺

في المتحف بتشوف قطع ما تخيّلت إنك تلقاها بمتحف شخصي، منها دلّة الخليفة العباسي المستنصر، اللي يُقال إنها الوحيدة من نوعها بالعالم! وأيضًا عملة نادرة للإمبراطور البيزنطي قوستين الأول. وأبو عادل يتحدّى اللي يجيب له مثل هالتحفتين بمقابل 100 ألف ريال سعودي. وبتشوف عنده مصحف نادر مخطوط من عهد التابعين. 📜

وإذا تبي تعرف جدّيته في اقتناء القطع النادرة، بتتفاجأ بمجوهرات يُقال أنها تعود للملكة كليوباترا! 💎

وعلى نطاق التاريخ السعودي، فمن التحف الموجودة دلة الملك عبدالعزيز -رحمه الله- اللي شرب منها القهوة بحفل افتتاح سكة الحديد في الرياض عام 1371. 👑

فتخيل السواليف مع شخص عنده كل هذه القطع المتنوّعة، ثرية ومدهشة فلا تفوّتها.

تقدر تنسق زيارتك للمتحف بالتواصل على الرقم: (0505136842). 📞