عزلة عن العالم بين تضاريس الشمال ⛰️
تبوك هي الوجهة المثالية لمسارات متنوعة تستاهل تمسك خط عشانها.
تمشية في وادي الديسة
لكل شخص بدايات في أي مجال، وإذا توك مبتدئ بالمشي والتسلق لازم تختار مسار سهل وآمن، ولحسن الحظ أن وادي الديسة خيار مثالي. 🏞️
يُقال أن الديسة تعني الوادي المليء بالأشجار، ولذلك سُمي بهذا الاسم لكثرة النخيل فيه. يبعد وادي الديسة عن تبوك 230 كيلو، تقريبًا 3 ساعات بالسيارة، ويوجد داخل محمية الأمير محمد بن سلمان الملكية. المحمية مفتوحة طوال السنة، وما تحتاج إلى تصريح للدخول، لكن من الضروري اتّباع أنظمتها، خاصة قانون «عدم ترك الأثر»، يعني لا ترمي مخلفات أو تشب نار على الأرض مباشرة أو تعبث بالشجر والصخور.🌳
الأفضل تمسك خط من بدري، لأن الطريق طويل، وأول ما توصل المدخل الغربي بيبدأ انقطاعك عن العالم واتصالك بالطبيعة، لأنك بعد ما تمشي كيلو من المدخل بتختفي الشبكة. 🗼
الوادي مكان يجمع كل عناصر الطبيعة، مياه الينابيع اللي تنزل طوال السنة من الجبال إلى الوادي، والمحاصيل المنتشرة مثل: المانقو والحمضيات والحبق والنعناع. وأثناء ما تمشي بالوادي بتشوف الآثار والنقوش الحجرية من عهد الأنباط. 🗿
يمتد الوادي قرابة 10 كيلومتر للاتجاه الواحد، وتقدر توقّف عند الكيلو السادس، وبتكون مريت بأغلب المعالم. لكن دامك رحت كمّل للنهاية!
من مميزات الوادي أنك تقدر تقطعه مشي أو بالسيارة، فممكن تسوي تحريات بسيارتك للمرة الأولى، وتخليها كشتة وتعد القهوة تحت الشجر. 🚗
مدة المشي يصعب تحديدها، لأنك ما بتمشي باستمرار، ولازم توقف عشان تاكل وتشرب، وتكتشف الأماكن الخفية والممرات المتشعبة وتصوّرها وتتسلق بعض الصخور، فحاول تكون متفرّغ من لحظة وصولك إلى المغرب. 🌄
وإذا ودك بتجربة ترفع الأدرينالين، استأجر سيارة مفتوحة من المؤجرين في الوادي، وأسعارهم تبدأ من 300 ريال تقريبًا، حسب الجولة اللي تختار. 📈
🧭 إحداثيات مسار وادي الديسة على تطبيق «GaiaGps»
تتبّع الرجوم في مسار القوس الكبير
مسار القوس الكبير في بجده من أهم معالم نيوم، تقدر تقول متوسط الصعوبة. تتميّز بجده بترابها الناعم المائل للحُمرة، كأنك تمشي بمشهد من فِلم «Dune». 🎥
يبعد المسار عن تبوك تقريبًا ساعة بالسيارة، بعدها بتحتاج نص ساعة سواقة بالطريق الترابي الممتد 14 كيلومتر إلى بداية المسار. وخلك ملتزم بالمسارات القديمة للسيارات اللي سبقتك.
وإذا انتبهت للأحجار الصغيرة المصفوفة بترتيب، وتساءلت وش سالفتها؟ هذه «الرجوم» أو العلامات اللي كانت قديمًا تُستخدم للاستدلال، وهنا بتوديك للمسار الصحيح، لكن لا تعتمد عليها، واستخدم تطبيق «gaiagps». 🗺️
بتنقطع عليك الشبكة بعد ما تقطع نصف الطريق الترابي من المسار، فلازم تكون مستعد بثريا أو جهاز لاسلكي عشان تضمن أنك ما تنقطع عن الناس. يُفضل كذلك، ومن باب الاحتياط، أنك تعلم أحد عن روحتك للمسار وتشاركه الإحداثيات، وتعطيه خبر عن المدة المتوقع أنك تقضيها. 📴
أول ما توصل بتلاحظ أن طبيعة المسار صخرية وفيها شيء من الوعورة، فتحتاج لياقة للصعود والنزول. ويمتد مسار القوس الكبير مسافة 9.6 كيلو بشكل دائري، بحيث تاخذ لفة من نقطة البداية وترجع لها في النهاية. يُفضّل أنك تمشي باتجاه عقارب الساعة من نقطة البداية. ⏰
ممكن تاخذ معك عدّة تخييم إذا ناوي تقضي ليلة تتأمل فيها النجوم، لأنك في منطقة منخفضة التلوث، ونجومها ساطعة... ومرة وحدة جرّب تشهد الشروق من أعلى القوس الكبير أو من طعس قريب. وسواء قرّرت تخيّم أو لا، لا بد تاخذ معك مياه وأكل كافي. 🌯
المنطقة معروفة بمحمية بجده للحيوانات، مثل المها العربي والغزلان. إذا ودك تدخلها تحتاج تصريح مجاني عن طريق تطبيق «Visit NEOM»، لكن إذا ما ضبط معك مر مزرعة بانجيا وبيضبطونك. 🦌
🧭 إحداثيات مسار القوس الكبير على تطبيق «GaiaGps»
التحدي الحقيقي في مسار المَكوَن
المسارين اللي ذكرناهم في البداية يتنوعون بين السهل والمتوسط، لكن إذا عندك القدرة والجرأة والخبرة وتبي تتحدى نفسك، اتجه لمسار المَكوَن في الزيته اللي تبعد عن تبوك حوالي 150 كيلومتر، تقريبًا ساعتين بالسيارة.
معروف عن الزيته برودتها الشديدة في الشتاء، خاصة أنها محاطة بالجبال اللي يزيد ارتفاعها عن ألف متر، ولقربها من جبل اللوز المشهور بثلوجه، فيمكن تقدر تلحق عليه! 🏔️
الزيته منطقة فيها كل التضاريس، بتلقى تشكيلات صخرية ورمال ناعمة ملونة ومغارات تملأ الجبال، ولو رحت في موسم مطر احتمال تصادف كم شلال، يعني تجربة تسيطر على حواسك وتلهيك عن تعب المشي. 💧
قبل ما تطلع للمسار يُفضّل تكلّم أحد وتعطيه خبر أنك متجه للمنطقة، وتشاركه الإحداثيات والمدة المُتوقع أنك تقضيها، لأن الشبكة بتنقطع، ولا تحاول تصعد مكان مرتفع تدورها. 👀
تأكد من تعبئة بنزين سيارتك، وتوكل على الله من بعد الفجر مباشرة، لأن المسار يحتاج منك أقل شيء 4 ساعات عشان تقطعه بالكامل، هذا إذا افترضنا أنك ما مريت بأي عقبات أو وقفت تصوّر عشرين مرّة. بتحتاج تسوق مسافة 5 كيلومتر تقريبًا من الطريق الترابي إلى نقطة البداية. بتلاحظ أن المسار صخري رملي وعر، وبتحتاج لياقة للصعود والنزول المتكرّر. 🛻
يمتد المسار لمسافة 14.7 كيلومتر بشكل دائري، والأفضل تمشي عكس عقارب الساعة من نقطة بداية المسار، وتنزل من الجهة الثانية على مغارة المَكوَن، وترجع توصل لنقطة البداية.
أعلى نقطة تقدر توصلها بهالمسار تقريبًا 370 متر، وينتهي بنزولك من قمة الجبل إلى وصولك للمغارة اللي تقطعها ممرات طويلة ضيقة بين الجبال. وعادي تكون طريقة عبورك لبعض الأماكن هي أنك تحبي على يديك وركبك. لذا، يُستحسن أن تصير عندك خبرة سابقة في التسلّق الوعر، أو معك شخص عنده خبرة بالمجموعة. 🧗🏻
🧭 إحداثيات مسار الزيته على تطبيق «GaiaGps»
مزرعة دادان، توفر غرف فندقية أو تخييم وسط طبيعة وادي الديسة، ووجبات من تحضير أسر منتجة. 🏕️
مزرعة المانقو، تعطيك تجربة زراعة شتلات المانجو في المزرعة، وجولات بسيارات مكشوفة. 🥭
مقهى الطائر الرمادي، عندهم باقات للاحتفال بأي مناسبة.🎉
مطعم سرايا الألفي، الوحيد في تبوك اللي يسوي مشويات ومحاشي مصرية أصيلة.🥙
مطعم ألذ مقلوبة، الاسم يكفي... مقلوبة ومنسف كأنها طبخ بيت.😋
مقهى ريشيو، حلويات متنوعة ومضبوطة. مكان شرح وهادئ، ومحاصيل قهوة لذيذة، يعني مقهى متكامل. 🍰
مقهى ترياق، لا تتعداهم إذا اشتهيت كوكيز، وإذا تبي تسولف مع باريستا رايق.🍪
مقهى C&B، إذا قهوتك المختارة دائمًا V60، فهذا هو المقهى اللي تروحه.☕️
متحف قلعة تبوك الأثرية، قلعة عمرها 5 قرون، وواحدة من محطات طريق الحج اللي يربط بين الشام والمدينة المنورة، وقريب منها مسجد التوبة اللي صلى فيه الرسول صلى الله عليه وسلم. 🏯
متحف محطة سكة حديد الحجاز ، استخدمت لنقل الحجاج من الشام إلى مكة والمدينة. وأتلفت الحرب العالمية الأولى أجزاء كبيرة من سكة الحديد، ولذلك، تحولت المحطة لمتحف جمع الأدوات والبقايا. 🚈
أهل المكان جزء من أي سفرة، وينقل لك التجربة الحقيقية.
تعرفنا على عمر البلوي مدير مزرعة بانجيا في بجده، عن طريق محمد القليش.
عاش طفولته يرعى الجِمال، ومن هذيك الفترة بدأ عشقه للبر والسماء. من حبه للسماء والنجوم درس الفلك، وصار ينظّم جلسات تأمل للنجوم يشرح فيها المفاهيم الرئيسة ويسولف عن علاقة العربي الوثيقة قديمًا بالنجوم.
فإذا تبي تسولف معه، تكلم معه عن النجوم أو عن بَجْدَه وطبيعتها وبيفاجئك بالمعلومات.
تلقى عمر بمزرعة بانجيا طول أيام الأسبوع من 8:00 صباحًا إلى 4:00 عصرًا.
ثمانيةالأماكن كلها «معروفة» لك، إلا الموجودة في هذي النشرة. كل ثلاثاء سيصلك جدول لرحلة مختلفة، تتعرّف فيها على أماكن سرّية جديدة، وتشاهد المدن السعودية بعيون أهلها.