سوبرماركت حصلت فيه كل شيء أبيه 🛒

هالمرّة قلت خل أروح سوبرماركت ما تعودت أزوره. وتكون الروحة لحالي، عشان بدال ما أقضّي ساعة تصير ساعتين، وعلى سعة. -استعدادًا لماراثون المقاضي في رمضان-😆

المكان هو لولو ماركت فرع المربّع، وهو أول فرع لهم في الرياض. 

سمعت عنه أن التجربة فيه مختلفة، وأني بحصل هناك منتجات مستوردة وجديدة. 

أما عن موقعه فهو في وسط الرياض، بين الوزارات وبوسط الزحمة. 

وصلت هناك الساعة وحدة الظهر، في يوم من وسط الأسبوع. وكان أصعب جزء من الروحة كلها أنك تحصل لك مكان في قبو المواقف.🅿️

وبعد أربع دورات، حصلت موقف مقابل الباب -وقفة احتفاء وانتصار-🎊

للوهلة الأولى لمّا دخلت، حصلت الزوّار -حرفيًّا- من كل الجنسيات: الأوروبيين والهنود ومن الشام، خليط من كل مكان. وهذ مختلف عن العادة، فلو بتروح لأي سوبرماركت بتلقى أن الأغلب سعوديين مع تنوع بسيط وخفيف. 

ما علينا من التأملات، بدأت رحلة العربة الاستكشافية بدون هدف، مجرد تمشّي.🛒

وحتى تكون الروحة مفيدة شوي، استعنت بطبّاخنا البيتوتي، اللي كان عنده قائمة يكتب فيها عن طلباته السوبرماركتية.

سألته: عبدالعزيز، وش ممكن أشتري مقاضي تميّز لولو ماركت؟ وما قصّر، أعطاني قائمة فيها:

• طحين قولد ميدل: اللي يميزه معدّل البروتين، اللي كلما ارتفع؛ ساعد في ترابط القلوتين أكثر. نسبة البروتين في هذا الطحين 12.5% ويُعتبر خيار ممتاز لخبز الساوردو والفوكاتشا والبيقلز. 🥯

• بيستو «بريلا»: يميز هذا المنتج أنه مضاف معه نوعين من جبنة البارميزان: جبنة «بدانو» وجبنة «بكارينو رومانو»، وهذا شيء يعطيها تمازج غني، ومناسب للباستا والساندوتشات. 🥪

• سكر بني «سيس»: نوع من السكر، بني غامق. هذا النوع ممتاز من ناحيه الرطوبة، ومعدل دبس السكر. يُعتبر خيار ممتاز للكوكيز و الحلا بشكل عام. 🍪

• البابريكا لاتشيناتا: نوع ممتاز من الفلفل المدخّن المطحون، الشركة معروفة بجودتها. وفيه نوعين: البابريكا الحلوة والبابريكا الحارة، وهي مناسبة لتبهير الدجاج. 🍗

• تتبيلة الرز الياباني أوتافوكو: الرز الياباني معروف بطعم حالي وحامض بنفس الوقت «حامض حلو»، وهذي التتبيلة تساعد الرز الياباني في أنه يتشكّل، ويسهّل على الشخص أنه يسوي منه سوشي. 🍣

وما شريت من هالقائمة إلا البيستو وتتبيلة الرز. 😋

كمّلت ولفّيت كل السوبر ماركت، وكان فيه كل ما يخطر في بالك: مواعين، تغليف هدايا، أكل يُطبخ قدامك، منتجات مستوردة، أسعار بالجملة، حتى كيكات الزواج، موجودة!🎂

وعلى طاري كيكة الزواج، وأنا أصوّرها إلا أشوف «وعد» مسؤولة في المخبز.

سولفت لي عن السوبرماركت، قالت: لي سنة أشتغل هنا، وأكثر ما يعجبني هو تنوّع الناس في المكان. لأن الفرع يقع بين وزارات، وبين مؤسسات مختلفة. وعلقت على الأسعار، تقول: احنا دائمًا هنا عندنا خصم مستمر على مدار السنة. وهذا يخلي أسعارنا منافسة.

العربة في نهاية الرحلة 🛒

بشكل عام: 

• عجبني أن كل شيء فكرت فيه حصلته، والتنوع كان رهيب، وكل احتياجات الناس موجودة.

• الوقت اللي جيت فيه كان مثالي، ولكن يمكن من الأفضل لو أروح أبكر، يعني الساعة 11:00 الصباح، التسوّق بيصير أكثر رواق.

• تمنيت أن يكون توزيع المنتجات أوضح. مثلًا المنتجات المستوردة من طوكيو أخذت مني وقت على ما حصلتها.

• لو ودّك شيّك على عروضهم في الموقع، حتى ترتب قائمة مقاضيك. 

• عندهم توصيل، لكن تجربة التقضي تسوى. 

لا تنسى وأنت طالع تمر محل الآيسكريم «كولفي» 🍦

يقدم آيسكريم هندي تقليدي ينباع في شوارع الهند. وهو مختلف عن الآيسكريم العادي، كريمي ونكهاته تقليدية مثل نكهة المالاي. صار له من فتح هنا خمسة أشهر تقريبًا.

تجربة الروحة للسوبرماركت: إذا ما عندك شيء، وتبي تاخذها كفعّالية؟ فالأحسن تكون مع صحبة وناس.