مزرعة تحسسّك أن الحلال حلالك
كنت أبحث عن مزرعة تحسسّك أن الحلال حلالك، وتعيش تجربة المزرعة والمساحة الواسعة.
يوم السبت، ثاني أفضل يوم بالأسبوع بالنسبة لي. أحبه يكون مختلف، أكتشف وأعيش تجارب جديدة، سواءً كنت لحالي أو بصحبة أحد. والمكان هو الحَكَم.
قبل فترة كنت أبحث عن مزرعة تحسسّك أن الحلال حلالك، وتعيش تجربة المزرعة والمساحة الواسعة. بحثت في قوقل ماب ولقيت مزرعة «صوفي ورمضان» في الدرعية، ووجّهت لها 🚗.
وأنت في الطريق، أول ما تدخل الدرعية، تستقبلك المباني العريقة، والخضار محيط فيك من كل جهة، وطراز معماري يشبه الرياض.❤️
وبتمر على وادي حنيفة، اللي ما قدرت أتعداه دون ما أوقف عنده. أعجبتني التغييرات اللي صارت، وما ملّيت وأنا أتمشى. لكن لأني كنت مخططة أزور المزرعة، قررت أخصص يوم ثاني لاستكشافه.
الطريق يخليك تستمع حتى وأنت تمشي بالطريق إلى مشوارك.
أول ما وصلت استقبلني سامح أحد العاملين بالمزرعة، وقال لي: المكان مكانك.
دخلت وسويت جولة استكشافية، وشفت النخل والشجر وبعض الورقيات المزروعة.
وحصلت مشتل مقفّل، كل شيء أخضر، بدرجاته المختلفة، وشفت جنبه البطّ والدجاج.🦆🐓
سألت سامح عن المزرعة. وقال: هذي المزرعة نعمل فيها أنا وأخواني وعيال عمي، وعددنا ستة. امتهنّا الفلاحة والزراعة منذ زمن، والآن احنا هنا في الدرعية نزرع ونبيع، وأيضًا نسمح للزوّار وللعامة بدخول المزرعة من الساعة 6 الصباح إلى 6 المغرب. واللي ودّه يشتري من محاصيلنا فأبركها من ساعة.
وأصحاب هالمزرعة يبيعون منتجاتهم في سوق العزيزية، ويمدّون المطاعم من محاصيلهم. ولكن لأن الموسم الآن مو موسم حصاد، فما عندهم حاليًّا إلا الورقيات.🥬
وكان فيه ورقيات مقطّعة، مكيّسة وجاهزة، لكن قلت بعيش التجربة صدق وأقطفها.
قطفنا بعض الورقيات: حبق وبقدونس وجرجير. ولمّا جيت آخذ النعناع، قال: «ما أنصح من هنا. فيه إنتاج أحسن مننا.» إحسان وشفافية❤️
تجربة لطيفة، تنفع للعوائل الصغيرة، ولّا أنك تزورها مع الوالدة أو الوالد، تغيّر جوّهم.
ما فيه مكان تجلس فيه فالتجربة مدتها أبو ساعة تقريبًا.
لا تتوقع أن المزرعة مرتّبة مية بالمية، لأنك بتشوف فيها أثاث قديم موزّع في أرجائها، ولكنه جزء من التجربة😄.
تنويه:
لا تنس تجيب لك مشروب وموية.💧
وتلبس لبس مريح، وتلبس جزمة -الله يكرمك- مريحة، لكن مو غالية، لأنك بتمشي داخل مزرعة. 🤷🏽♀️
يفضل أنك تكلم الرقم الموجود في قوقل ماب، حتى تحصل على تصريح زائر يسهل دخولك بسبب وجود مشروع تطوير في وادي حنيفة، والتجاوب معي كان خلال دقيقة واحدة. ✅
يجي في بالي سؤال: وش النباتات اللي ينفع تقتنيها، بحيث أنها تتأقلم مع أجواء الرياض، الشتوية والصيفية، سواءً كانت نباتات توضع داخل البيت أو خارجه؟
ومن وين ممكن تشتريها؟
سألت رند نصّار، قارئة ومهتمة بعلم النبات وممارسة للبستنة، وقالت:
بالنسبة للنباتات الداخلية، فالمناسب لها كل أنواع الصبّاريّات أو العصاريّات مثل:
الأقاڤا: تصلح تكون خارجية، وتصلح داخلية. مناسبة للمداخل والمساحات الزجاجية، حوافّ أوراقها شوكية كنوع من الحماية، فانتبه منها.
نبتة السنسفيريا أو «جلد النمر»: مناسبة للمكاتب والأماكن شديدة الحرارة، أوراقها مدبّبة، لا تكثّر سقيها لأنها تجمّع موية على طول، فترتخي وتخسر أوراقها حتى بعد ما تجف منها الموية.
نبتة ايشيفيريا: من عائلة الأزهار الحيّة، وصحيح هي صبّار لكنها على شكل زهرة. تجي بألوان كثيرة، تتحمل الجفاف ويفضّل أنك ما تسقيها كثير، لأن طريقة نموها أحيانًا تخلي المسافة صغيرة بينها وبين التربة، ووارد تتعفن تربتها.
نبتة الببروميا المبرقشة: خيار مناسب للي ما عنده خلفية في العناية بالنباتات. كيف تعرف إنك كثّرت عليها الموية؟ لما تشوف أوراقها بدأت تتساقط.
البوتس «الأبنة البارّة»: اسم على مسمى ما تخيّب الظن 😆. ولأنها من أنواع المدّاد، فكلما تعودت على قلة السقاية، تأقلمت معاك أكثر. يعني عادي تجلس وقت طويل بدون سقاية. وكلما مدّدت أغصانها، تطول أكثر وأسرع.
البامبو، أحس أنها تشرب موية أكثر منا! 😅 لذلك ضروري نشيّك إذا موية المزهرية جفّت أو لا، والأهم مويتها الأصلية ما تتغير، فقط نضيف عليها كلما نقصت.
أما بالنسبة للنباتات الخارجية:
شجرة الياسمين الهندي: تنمو وتطول، وارتفاعها يصل إلى أمتار. لذلك فهي مناسبة للزراعة على أرصفة البيوت، بعد ما تنمو أوراقها، تطلع منها أزهار بيضاء تشبه الياسمين، رائحتها عطريّة تعطّر الجو، ويُفضَّل وقت سقايتها يكون نهاية العصرية.
شجرة الجهنمية: البعض يسميها «المجنونة»، وأقول وش زين هالجمال المجنون! تحبّ الشمس، ومناسبة للحر. يُفضَّل أنها تُقلَّم وتُسمَّد باستمرار، يعني مرّة كل كم شهر. ولأنها من أنواع المدّاد المتسلّق، يفضل أنك تساعدها وتربطها بخيوط على الجدار مثلًا. لو تعتني فيها زين، بتزهر كل عام.
النخيل بأنواعها: زي المثلث، الكوكس، الماجيستيك، الأريكا وغيره.. عشان تسرّع من نموها، ضروري تضمن وجودها في مكان توصله الشمس 6 ساعات يوميًّا، تتحمل العطش وملوحة الأرض، وفوق هذا توفّر ظل جميل.
وين ممكن تحصل هالنباتات؟ تحصَّلها في هذي الأماكن:
أحيانًا الشخص ودّه ينسق باقة ورد بدون ما يختار ألوان مو متناسقة أو يتورط بربطة الشريطة.🎀
لقينا محل في السليمانية، رياض بارك وفروع كثيرة، يقدم ورشة لتنسيق الورد بالأسلوب الكوري، سواء مزهرية أو باقة، ويجهزون لك كامل الأدوات مع شاي بوبا مجانًا.🧋
لما بحثت عن الأسلوب الكوري🔎 اكتشفت إنه مختلف عن التقليدي، لأنهم يستخدمون أكثر من شكل لأوراق التغليف، ويدمجونها بطبقات وألوان تتناغم مع الورد.🌻
الجميل بالمشروع أنه قبل كم سنة جات تريشيا من ماليزيا للسعودية عشان تشتغل في العلاقات العامة، اللي هو تخصصها، لكن شغفها الحقيقي الورد، وأخذت عدة شهادات في تنسيقه.
تعرفت تريشيا على رانيا، بنت سعودية متخصصة بالأزياء وتحب الفن، واكتشفوا اهتماماتهم المشتركة حول الثقافات، وقرروا يدمجونها مع تخصصاتهم، واشتغلوا ستة شهور على الفكرة اللي هدفها تقديم تجربة تعليمية ممتعة.
فقرروا ينشئون مشروع «فلورستنيشا» (Floristnicia) ويقدمون الورش في مقهى «واو تي أند دزيرتس» (WHOA Tea & Desserts).
الورش اللي يقدمونها خاصة بالنساء.🚺
تستقبل الورش عدد محدود، عشان يركزون على كل متدربة.
تقدرين تحجزين في الورشة الجاية عن طريق التواصل مع محل الورد في إنستقرام.🌸
🕯️ملاحظة 🕯️ تقدرين تحجزين احتفال يوم ميلاد صديقتك وينسقونه لك! 🎂
وللرجال ترى ما نسيناكم😉 المكان مو بس للورش، تقدر تستمتع بالمقهى نفسه، وتجرب الحلويات والكيك الصيني بالأسلوب التقليدي، وتختار لعبة من أرفف الألعاب وتلعبها.
صورة من حياة الرياض بعيون ناسها.
*وإذا جاك الفضول عن أفضل يوم بالأسبوع، فهو اليوم اللي وصلتك النشرة فيه، الأربعاء. 😆
ثمانيةتحس أنّك تعرف الرياض؟ سواءً كنت ساكن فيها، أو مختّمها، أو جديد فيها، هذه النشرة لك. قبل نهاية الأسبوع، نرسل لك تجارب وتوصيات وجديد الرياض وأماكنها المعروفة، والأهم، السريّة.